«Biełaruśkalij» voźmie na siabie ŭsie vydatki pa arhanizacyi pachavańnia, vypłacić kampiensacyju i budzie ŭ dalejšym akazvać padtrymku siemjam harniakoŭ. Pra heta ŭ efiry telekanała ANT zajaviŭ hiendyrektar zavoda Ivan Hałavaty, piša TUT.BY.
U Maksima Ivanova zastałasia žonka i dźvie dački, u Dźmitryja Valkova — žonka i syn.
Cieły šachcioraŭ byli znojdzienyja siońnia nočču pry razbory zavałaŭ. Ich šukali na praciahu 30 hadzin. Vyratavalnaja apieracyja spynienaja, na miescy zdareńnia pracujuć śledčyja.
Šachciory pracavali na hłybini 620 mietraŭ. U pracesie zarubki adbyŭsia raptoŭny vykid soli i hazu. Abvaliłasia kala 600 kubamietraŭ parody. Prachodčy kambajn i samachodny vahon apynulisia całkam zasypanyja parodaj.
— Śmierć nastupiła imhnienna, u doli siekundy, kali adbyłosia abrušeńnie, — rastłumačyŭ Ivan Hałavaty.
U dzień trahiedyi na rudniku pracavała kala 150 čałaviek, a ŭ kirunku, dzie adbyłasia avaryja — 14 čałaviek.
Na «Biełaruśkalii» kažuć, što pryčynaj zdareńnia stali asablivyja hieałahičnyja struktury — muldy, u jadrach jakich pad vielizarnym ciskam znachodziacca hazy, u tym liku mietan. Mienavita treci kalijny haryzont, dzie zahinuli harniaki, ličycca najbolš niebiaśpiečnym.
Zvyčajna vykidam papiaredničajuć patreskvańnie masiva, prahin słajoŭ abo adskok frahmientaŭ parody. U takim vypadku nieabchodna spynić hornyja raboty. Ale na hety raz padazronych sihnałaŭ nie było.
Salihorski rajonny adździeł Śledčaha kamiteta raspačaŭ kryminalnuju spravu pa fakcie parušeńnia praviłaŭ biaśpieki hornych rabot (art. 303 KK). Śledčyja vyznačajuć pryčyny avaryi.
Ciapier čytajuć
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času2020
Kamientary