Daždžavych čarviakoŭ upieršyniu zapuścili ŭ marsijanski hrunt, i vynik akazaŭsia niečakanym
Daśledčyki ź Niderłandaŭ vyrašyli pravieryć, jak buduć pavodzić siabie čarviaki ŭ marsijanskim hruncie. Metaj było zrazumieć, jak na Čyrvonaj płaniecie buduć raźvivacca zamknionyja ekasistemy.
Ciaham ekśpierymientu kamanda źmiaściła dvuch darosłych daždžavych čarviakoŭ u simulatar marsijanskaha hruntu, jaki byŭ stvorany ekśpiertami NASA. «Hlebu» ŭhnaili naturalnymi adchodami i pasiejali nasieńnie, a paśla źjaŭleńnia pieršych uschodaŭ u adzin z uzoraŭ zapuścili čarviakoŭ.
Vyjaviłasia, što rukała cudoŭna raście va ŭhnojenym hruncie z čarviakami, a voś va ŭzorach biez čarviakoŭ rost adbyvaŭsia značna bolš pavolna.
«Vidavočna, što ŭhnajeńnie stymulavała rost, i my bačyli, što čarviaki byli aktyŭnymi. Adnak najbolšy siurpryz nas čakaŭ u kancy ekśpierymientu: my vyjavili dvuch maładych čarviakoŭ u imitacyi hrunta Marsa», — raspaviadaje aŭtar daśledavańnia Vihier Vejmlink z Vahininhienskaha ŭniviersiteta.
Pavodle jaho słovaŭ, taho, što čarviaki tak chutka pryvyknuć da marsijanskaj «hleby», dy jašče i pačnuć množycca, daśledčyki nie čakali.
Aŭtary tłumačać: čarviaki vielmi važnyja dla rostu raślin nie tolki na Ziamli, ale i na Marsie, i na Miesiacy. Jany vielmi efiektyŭna pierapracoŭvajuć źmiarćviełyja reštki raślin, a ichnyja vydzialeńni paśla pieravarvańnia takoj ježy ŭtrymlivajuć arhaničnyja złučeńni. Kali hetaja arhanika traplaje u hlebu, za spravu biarucca bakteryi, jakija vydzialajuć pažyŭnyja rečyvy: azot, fosfar, kalij. A ich, u svaju čarhu, vykarystoŭvajuć dla rostu maładyja raśliny.
Akramia taho, «nory» čarviakoŭ spryjajuć nasyčeńniu hleby kisłarodam, a taksama palapšajuć strukturu hleby, robiačy paliŭ bolš efiektyŭnym.
Pakul što ŭ śpisie prydatnych dla rostu na Marsie raślin znachodzicca dvanaccać najmieńniaŭ. Siarod ich — sparžavaja fasola, haroch, radyska, tamaty, bulba, rukała i morkva.
-
Boty OpenAI atakujuć Vikipiedyju i vypraboŭvajuć jaje sistemy biaśpieki. Raspracoŭščykaŭ ŠI abvinavacili ŭ techničnym škodnictvie
-
Jak biełaruskija łaziery dapamahli daśledavańniam, za jakija sioleta ŭručyli Nobieleŭskuju premiju pa miedycynie
-
Sučasnyja mietady sudovaj ekśpiertyzy pakazali: pieršyja cary Jehipta mahli adpraŭlacca ŭ zamahilny śviet nie adny
Redki vypadak: pamiłavany biełaruski palitviazień pajšoŭ na vajnu suprać Ukrainy16
Redki vypadak: pamiłavany biełaruski palitviazień pajšoŭ na vajnu suprać Ukrainy
«Strelba kali i strelić, to naŭrad ci kulamiotnaj čarhoj». Maksim Znak acaniŭ realnaść pahroz biełaruskaj prapahandy pazbavić hramadzianstva palitemihrantaŭ1212
Kamientary