Polšča choča pastrožyć umovy vydačy karty palaka. Hrupa biełarusaŭ pratestuje

Dniami stała viadoma, što polski Sojm płanuje pastrožyć umovy vydačy karty palaka: z zakona vykraślać mahčymaść atrymańnia karty naščadkami hramadzian druhoj Rečy Paspalitaj, zmohuć atrymać tolki naščadki palakaŭ pa nacyjanalnaści, a nie pa hramadzianstvie.

Pry raniejšaj praktycy kartu palaka atrymali tysiačy biełarusaŭ, jakija nie mieli polskich karanioŭ, ale prodki jakich volaj losu apynulisia na terytoryi Zachodniaj Biełarusi, što paśla Ryžskaj mirnaj damovy stała častkaj mižvajennaj Polščy.

Čytajcie taksama: Pasoł Polščy: Kala 100 tysiač biełarusaŭ atrymali «karty palaka»

Mahčymyja novaŭviadzieńni aburyli šerah biełarusaŭ, jakija inicyjavali ŭ niekatorych haradach krainy zbor podpisaŭ z prośbaj zachavańnia staroj redakcyi zakona. Podpisaŭ sabrali kala 400 — i ŭžo adpravili ich u Polšču.

«Naša Niva» spytała u kaardynataraŭ zboru podpisaŭ, navošta heta biełarusam. 

«Kali čałaviek zachoča, to źjedzie i tak, biez karty», — skazała nam Taćciana, kaardynatarka zboru podpisaŭ u Viciebsku, jakaja sabrała ŭ horadzie 10 podpisaŭ.

«A kab było dobra tut, to i nie źjazdžali b! U mianie siastra pajechała, bo tut ciažka było zarabić na žyćcio narmalnaje. Ale i nie ŭsie chočuć mienavita źjechać: chtości zarablaje tam, chtości, kab dzieci mahli vučycca biaspłatna», — dadała žančyna.

«U majho syna adzin adnahrupnik robić u Maskvie za $1000, druhi, z kartaj palaka, — u Varšavie za $1000, a moj za 500 rubloŭ tut. Jamu siamju treba zavodzić, a jak heta rabić u takoj ekanamičnaj situacyi? Ludzi šukajuć, dzie lepš. Ja žyvu ŭ Biełarusi, jak i bolšaść svajakoŭ. Ale karty palakaŭ majem, a ci mała što», — patłumačyła svaju pazicyju kaardynatarka pa Maładziečnie, jakaja sabrała 25 podpisaŭ.

U Hrodnie sabrali kala 30 podpisaŭ, kaardynavaŭ zbor Michaś.

«Ja jašče nie maju karty palaka. U płanach na budučyniu — pierajechać. Bo toje, što ŭ krainie robicca… Niemahčyma! Sapraŭdnyja biełarusy ŭ dušy zastajucca biełarusami», — skazaŭ nam Michaś.

Hałoŭny ž kaardynatar pa krainie, jaki pradstaviŭsia Siarhiejem, skazaŭ, što novaja redakcyja zakonu supiarečyć histaryčnaj tradycyi.

«Nacyjanalnaść — heta novaje paniaćcie, adnosna. U druhoj RP nie było palakaŭ, biełarusaŭ i habrejaŭ, jany byli hramadzianami, a tut jany chočuć, kab dakazvali nacyjanalnaść! A nacyjanalnaści źjavilisia za Savietami. Značyć, što naščadki ludziej, jakija vajavali ŭ adnych akopach suprać nacystaŭ ci balšavikoŭ, byli hramadzianami druhoj RP, nie zmohuć atrymać kartu. My suprać», — skazaŭ jon.

• 0
• 0
• 0
• 0
• 0
• 0
• 0
• 0