Pretendenty na pieramohu ŭ konkursie «Zaśpiavaj 4x4», hurty Helious, «Małała», K3tyvana i «Tutejšyja», vystupiać na supolnym kancercie ŭ kłubie «ILI» 21 kastryčnika. Admysłovym hościem budzie adzin ź pieramožcaŭ minułaha konkursu — hurt Leibonik. Kvitki ŭžo ŭ prodažy!
Finalisty konkursu maładych vykanaŭcaŭ prajšli niekalki etapaŭ: prasłuchali lekcyi ad admysłoŭcaŭ u muzyčnaj śfiery i papracavali pry padtrymcy svaich mientaraŭ nad pieśniami ŭletku, dali spravazdačnyja kancerty, zapisali svaje tvory ŭ studyi i prezientavali ich słuchačam na pačatku vosieni. Zastaŭsia apošni etap — finalny kancert, na jakim budzie nazvany najlepšy z čatyroch vykanaŭcaŭ. Pieramožca atrymaje hrašovy pryz (1000 rubloŭ) i zdymki klipa ad režysiora Arcioma Łobača, jaki rabiŭ klipy J:Mors, Naka, Akute, The Toobes dy inšym biełaruskim vykanaŭcam. Žury konkursu acenić hetym razam vyniki adukacyjnaj siesii «Zaśpiavaj 4x4» i nazavie vykanaŭcu, jaki najlepš vykanaŭ tvorčuju zadaču i ŭvabraŭ dośvied, atrymany na lekcyjach, majstar-kłasach i ŭ studyi padčas konkursu.
Na pieramohu ŭ «Zaśpiavaj 4x4» pretendujuć:
Hurt Helious
Hurt Helious Maryi Haŭrylenki i Aliny Kazačenki ź pieśniaj «Pa nieadstupnaści» na słovy paetki Niny Listoty. «U joj raspaviadajecca pra kryzis pamiž dziaŭčynaj i chłopcam ci ŭvohule pra kaniec hetych adnosinaŭ. Jany zaviśli kožny ŭ svaim suśviecie i nijak im adtul nie vybracca. I, napeŭna, kožny ź ich čakaje adno ad adnaho kroku, jaki ŭratuje», — kaža Maryja. Dziaŭčatam pa 22 hady, jany vučacca ŭ Akademii mastactvaŭ. Razam vystupajuć z 2016 hodu, kali zajavilisia na konkurs festu «Bardaŭskaja vosień». Pradstaŭlalisia jak duet Maryja&Alina, ale padčas navučalnaj siesii «Zaśpiavaj 4x4» uziali nazvu Helious.
Fołk-hurt «Małała»
Dziaŭčaty z fołk-hurtu «Małała» ŭdzielničali ŭ finale «Zaśpiavaj 4x4» ź pieśniaj-žartam «Kavuny pasochli», pieśnia-žart, u jakoj spałučylisia słovy narodnaj pieśni i aŭtarski tekst Julijany Šyrmy. Aŭtarka ličyć, što sens hetaha tvoru aktualny jak dla minułaha, tak i dla sučasnaści: «Kožnaja dziaŭčyna šukaje kachańnie, ale jano chodzić nie tymi ściežkami. I tady davodzicca brać inicyjatyvu ŭ svaje ruki dy zajmacca pošukami. Ale dzie ŭsie padzielisia? U piesieńcy jakraz dajecca humarystyčnaja parada na hety kont», — kaža Julijana. «Małała» zasnavali studentki Biełaruskaj dziaržaŭnaj akademii mastactvaŭ u 2015 hodzie. Ich tvorčaść užo adznačyli na niekalkich tvorčych konkursach, a sioleta ŭ lutym u KZ «Vierchni horad» hurt daŭ pieršy solny kancert.
K3tyvana
Prajekt K3tyvana na čale ź biełaruskaj śpiavačkaj hruzinskaha pachodžańnia Kietevan Asratašvili ŭ miežach siesii dla finalistaŭ «Zaśpiavaj 4x4» padrychtavaŭ pieśniu «Tolki džaz» na vierš paetki Darji Bialkievič «Nie muzyka». «My vyrašyli zrabić tvor u modnym ciapier kirunku, bo chočacca, kab biełaruskaja mova hučała kruta i smačna, a hałoŭnaje, kab jana była normaj, a nie redkaściu», — kaža Kietevan. Akrom jaje u prajekt uvachodziać 23-hadovy kłavišnik Vasil Mielničak, jaki zadziejničany taksama ŭ ansambli «Vierasy», dy 27-hadovy dydžej Alaksandr Plut. Vystupaje prajekt i pašyranym žyvym składam.
«Tutejšyja»
Pretenduje na pieramohu ŭ «Zaśpiavaj 4x4» taksama hurt «Tutejšyja» ź pieśniaj «Navučy mianie žyć». «Heta pieśnia pra dziaŭčynu, jakaja doŭhi čas była samotnaj, čakała kachańnie, ale kali jaho atrymała, to dla jaje stała niezrazumiełym: jak ź im ciapier žyć. Bo byvaje tak, što ad kachańnia pačynaješ zaležyć, isnuje vialikaja spakusa ŭ im całkam rastvarycca, a heta nie raźvivaje ciabie jak asobu, a chutčej naadvarot, spyniaje raźvićcio», — tak pradstaŭlaje svaju pieśniu jaje aŭtarka Taciana Kazanovič, viadomaja taksama i jak paetka. Jaje hurt utvaryŭsia ŭ 2014 hodzie, hraje ŭ stylach kantry, fołk-rok i pop-rok. Letaś muzyki dali solny kancert na teatralnaj scenie.
21.10. Kłub «ILI» (pr.Niezaležnaści, 131/1). Kancert finalistaŭ «Zaśpiavaj 4x4». Pry padtrymcy Leibonik. Kvitki — 8 rub. (papiarednie), 12 rub. (u dzień). Telefon dla daviedak: +375 29 687-20-93
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary