Łukašenka prapanavaŭ Tapuzidzisu raspaŭsiudzić sietku «Karony» na vioski

Kiraŭnik dziaržavy adznačyŭ, što napiaredadni ŭ internecie aznajomiŭsia ź infarmacyjaj na niekatorych resursach «z pacham žaŭcizny». «Pračytaŭ, što tam za niekalki hadoŭ nazapasili pra Łukašenku, i, rychtujučysia da hetaj sustrečy, padumaŭ pra toje, što kali b hetyja žoŭtyja pisaki viedali, jak ja napružvaju biednych biznesmienaŭ, dyk jany, napeŭna, napałovu mienš pisali b paskudstva», — skazaŭ Alaksandr Łukašenka.

«U mianie niama zvyčki dla siabie asabista niešta prasić. Nivodny biznesoviec pra heta nie skaža», — padkreśliŭ biełaruski kiraŭnik.

Jon adznačyŭ važnaść realizacyi prajekta ŭ śfiery handlovaha absłuhoŭvańnia nasielnictva, asabliva sielskaha. Pry hetym jon kanstatavaŭ, što časam składvajecca niespraviadlivaja situacyja, kali na vioscy tavary ŭ kramach, u tym liku pradukty, pradajucca pa cenach daražejšych, čym u horadzie.

«Nie skažu, što nam patrebna zamiena biełkaapsajuzaŭskaha handlu, — patrebna kankurencyja, kab my bačyli realnuju karcinu. I voś tady ja paprasiŭ, kab ty spłanavaŭ u adnym z rajonaŭ Biełarusi takuju sietku absłuhoŭvańnia. I ty mnie adnaznačna zajaviŭ, što heta budzie pa cenach nižej, čym isnujučyja. Heta mianie padkuplaje», — skazaŭ kiraŭnik dziaržavy.

Jon adznačyŭ, što ŭ vypadku paśpiachovaj realizacyi zapłanavanaha ŭ adnym z rajonaŭ anałahičnuju schiemu možna budzie ŭ nastupnym vykarystać pa ŭsioj krainie. «Viadoma, treba, kab nasielnictva absłuhoŭvałasia dastojna», — padkreśliŭ Łukašenka.

Alaksandr Łukašenka ŭ suviazi z hetym nahadaŭ, što ŭ Biełarusi ŭžo skłałasia sistema pražyvańnia ludziej na vioscy i ŭ rajonach ŭ cełym.

«Jość ahraharadki, jany stabilnyja i stałyja, jany nazaŭsiody (nie dumaju, što niechta hetuju sistemu złomić). U rajonnym centry pavinien być prystojny handlovy centr, jaki budzie raźmierkavalnym centram pa ŭsim rajonie. U ahraharadkach pavinny być pamienš kramy, ale prystojnyja. Tam pavinny ludzi kupić usio, što ich cikavić. heta značyć tavar, jaki jość u Minsku, jon pavinien być dastupny dla našych viaskoŭcaŭ, — skazaŭ kiraŭnik dziaržavy. — Treci ŭzrovień — vialikija vioski, jakija byli kaliści centrami kałhasaŭ, saŭhasaŭ, — jany zastanucca. Tam jość kramy, ich treba pryvieści ŭ paradak. Abo pabudavać prościeńkuju kramku».

Čaćviorty ŭzrovień, pavodle słoŭ Łukašenki, — nievialikija vioski, jakija było pryniata nazyvać niepierśpiektyŭnymi. Razam z tym jon adznačyŭ, što ciapier aktyŭna zaklikaje biźniesmienaŭ pryniać udzieł u adradžeńni i naviadzieńni paradku ŭ hetych nasielenych punktach, asabliva tych, adkul jany sami rodam. «Heta ž usio-taki niečaja radzima. I mnie ŭžo kažuć, što kala tysiačy takich biźniesmienaŭ, jakija chočuć adradzić svajo radavoje hniazdo. U advarotnym vypadku vioska zahinie. Ale tam pakul žyvuć ludzi. Ich treba, mabyć, absłuhoŭvać praz aŭtałaŭki», — adznačyŭ Alaksandr Łukašenka.

Jon upeŭnieny, što biznes na vioscy moža paśpiachova raźvivacca, i nie tolki handal, ale i akazańnie ŭ kompleksie roznych dadatkovych pasłuh. «Ale na pavierchni lažyć handlovaje absłuhoŭvańnie. Voś hety błok pytańniaŭ ja chaču nie prosta abmierkavać, a chacieŭ by, kab ty hodna realizavaŭ biez usialakich praźmiernaściaŭ. Bo ty jak pryvatnik svaje hrošy prosta tracić marna nie budzieš i nie pavinien, — skazaŭ kiraŭnik dziaržavy. — Mianie cikavić, kab ty vielmi ekanamična, prytym aptymalna, stvaryŭ u adnym z rajonaŭ takuju sietku, jakaja i taboj, i inšymi handlovymi apieratarami budzie realizoŭvacca pa ŭsioj krainie».

Alaksandr Łukašenka taksama prapanavaŭ abmierkavać padrychtoŭku pakieta dakumientaŭ pa libieralizacyi ŭmoŭ viadzieńnia biźniesu i padtrymcy ŭ Biełarusi pradprymalnictva, bo Pavieł Tapuzidzis byŭ niepasredna ŭklučany ŭ hetuju pracu.

U svaju čarhu biźniesmien adznačyŭ, što sacyjalnaja adkaznaść biźniesu na siońniašni dzień vielmi važnaja. «Sapraŭdy, ludzi pavinny adradžać svaje vioski. My ŭsie ź vioski. Ja naradziŭsia ŭ hłuchoj vioscy ŭ harach Hruzii. Vy absalutna słušna kažacie: my abaviazanyja davieźci da vioski toje, što jość u horadzie. I pry hetym my nie pavinny zamianiać adnu sietku inšaj. Bo Biełkaapsajuz — heta siońnia raźvitaja struktura ŭ vioscy», — skazaŭ Pavieł Tapuzidzis.

«Jana ž nie tolki handluje, ale i zakuplaje ŭ nasielnictva liški pradukcyi — funkcyi vialikija», — dadaŭ Alaksandr Łukašenka.

«U ich hihanckija sacyjalnyja funkcyi, tamu što ludzi na vioscy pavinny atrymlivać uvieś kompleks pasłuh. Heta takija ž našy ludzi, takija ž biełarusy, i nie pavinny ni čym być abmiežavanyja», — pahadziŭsia Pavieł Tapuzidzis.

• 0
• 0
• 0
• 0
• 0
• 0
• 0
• 0