Polšča pavialičvaje vajenny biudžet i vyłučaje na madernizacyju armii ŭ bližejšyja 15 hadoŭ dadatkovyja 200 młrd złotych (55 młrd dalaraŭ) dla «strymlivańnia rastučaj rasijskaj ahresii». Pra heta paviedamlajuć infarmahienctvy sa spasyłkaj na zajavu namieśnika ministra abarony krainy Tomaša Šatkoŭskaha, jakuju pryvodzić Reuters.
Pavodle jaho słoŭ, urad uchvaliŭ adpaviednuju papraŭku, jakaja dazvolić pavialičyć vajennyja vydatki na bližejšyja 15 hadoŭ i nablizić ich da 2,5% ad VUP. Heta bolš, čym paznačanyja na samicie NATA ŭ Ńjuparcie 2% VUP. Heta aznačaje, tłumačyć Reuters, što da 2032 hodzie štohadovyja vydatki amal padvojacca i składuć kala 80 młrd złotych.
Zakanadaŭčaja prapanova ministra nacyjanalnaj abarony Antonija Maciareviča, jakaja była pryniataja Radaj ministraŭ, uniesienaja ŭ Siejm pry hramadskaj padtrymcy hetaj inicyjatyvy prezidenta, raspavioŭ namieśnik ministra abarony vydańniu Rzeczpospolita.
Pa słovach Šatkoŭskaha, jano praduhledžvaje pavieličeńnie vydatkaŭ na 2,5% ad VUP u 2030 hodzie. «Bazavaha ŭzroŭniu — 2,1% ad VUP my dasiahniem ŭ 2020 hodzie, vydatki buduć pastupova pavialičvacca na praciahu bližejšych niekalkich hadoŭ», — skazaŭ jon.
U nastupnym hodzie na ŭzbrojenyja siły budzie vydatkavana na dva miljardy złotych bolš, čym płanavałasia. «Ahułam heta prykładna na čatyry miljardy bolš, čym sioleta», — adznačyŭ jon.
«My acanili nie tolki košt techničnaha abnaŭleńnia, ale i vykarystańnie abstalavańnia, navučańnie, zapasy i vydatki na piersanał. Hetyja vydatki nie ŭklučajuć u siabie vydatki na vajennuju adukacyju, achovu zdaroŭja abo infrastrukturu, jakija ŭklučanyja ŭ inšuju častku biudžetnaha prahnozu», — udakładniŭ namieśnik ministra.
Madernizacyja nieabchodnaja, bo amal dźvie traciny ŭzbrajeńniaŭ datujecca savieckaj epochaj, kali kraina znachodziłasia ŭ Varšaŭskim dahavory. U płanach pavialičyć asabovy skład suchaputnych sił i zakupić uzbrajeńni, jakija adpaviadajuć standartam NATA. U toj ža čas finansavańnie fłotu skaračajecca, adkładzienaja zakupka šmatfunkcyjanalnych frehataŭ dla VMS.
Kamientary