Łukašenka ŭ špahacie

Maskva zakusiła cuhli. Miadźviedzieŭ pryznaŭ niezaležnaść Paŭdzionnaj Asetyi dy Abchazii, vydatna razumiejučy, što heta — klinč z Zachadam. Biełaruś ža, dakładniej jaje kiraŭnictva, pavodle niamieckaha palitolaha Rara, apynułasia ŭ špahacie miž dvuma patencyjnymi bakami novaj chałodnaj vajny. Nia samaja zručnaja poza.

Rasieja praciahvaje «ŭstavać z kaleniaŭ» tak, jak jana heta razumieje: zaraz usim pa pysie nadajem! Kaŭkaskaja «viktoryja» apjaniła. Užo i supracu z NATO pasłali padalej, i Ŭsiaśvietnaja handlovaja arhanizacyja pa barabanie. Hałoŭnaje — pakazać «hryzunam», «pindosam» dy inšym kuźkavu maci.

I voś na hetym fonie Brusel dy Vašynhton apynulisia pierad biełaruskaj dylemaj. Z adnaho boku, zrazumieła, što zmušanaje vyzvaleńnie palitviaźniaŭ tolki pry vialikaj doli fantazii možna padahnać pad hrafu «Demakratyzacyja». Sapraŭdnaj demakratyzacyi tutejšaja viarchoŭka baicca jak čort kryža, bo ź lubaściu adbudavanaja systema «adnaho palityka» rassypiecca ŭ druz jak vokam mirhnuć.

Ź inšaha boku, kali nia dać biełaruskamu kiraŭnictvu niejkaj morkaŭki, to ŭsia adliha — katu pad chvost, a heta tolki i patrebna Rasiei. Jana čakaje momantu, kali Biełaruś narešcie možna budzie ŭziać hołymi rukami.

Miž tym tytulnaja apazycyja nervujecca, kab Zachad jaje nia «zdaŭ», ładziačy prahmatyčnyja stasunki ź ciapierašnim režymam. Varta tolki kamuści ź letuviskich, polskich ci inšych eŭrapiejskich palitykaŭ zakinuć tezu pra bolej hnutki padychod, jak ź lahieru zmaharoŭ-maksymalistaŭ čujecca: nijakich kampramisaŭ z sami-viedajecie-jakim režymam!

Nakont cudadziejnaj pierakoŭki režymu iluzijaŭ, badaj, niama ni ŭ koha. Ale, u rešcie reštaŭ, ci nie zašmat asobnyja našyja demakraty chočuć ad Zachadu?

Nakolki karektna patrabavać ad zachodnikaŭ, kab jany pierajmalisia pytańniem śvietłaj demakratyčnaj budučyni Biełarusi macniej, čym masa «tutejšych»?

Na dumku mienskaha palitolaha Andreja Fiodarava, moža skłaścisia paradaksalnaja sytuacyja, kali dziela ŭratavańnia biełaruskaj niezaležnaści Zachadu daviadziecca trochi prypluščyć vočy na asobnyja chiby režymu i pajści na ščylniejšuju supracu ź im, nie čakajučy z mora pahody (to bok vialikaha prahresu ŭ vykanańni sakramentalnych 12 umoŭ). Sa słoŭ Fiodarava,

«Eŭropa i Štaty razumiejuć, što kali Maskva pahłynie Biełaruś, a potym stanie tačyć zuby i na Ŭkrainu, to takoj Rasiei ŭžo nie dasi rady».

Palitolah Dzianis Mieljancoŭ zaznačaje: takoha pachaładańnia ŭ adnosinach Rasiei z Zachadam jašče nie było. «Biełaruski režym pryzvyčaiŭsia łaviravać, — kaža jon, — ale zaraz, pry takoj palaryzacyi, davodzicca žorstka vybirać». Alternatyva: abo dałučacca da zachodniaj supolnaści i rabić kompleksnyja reformy, abo dałučacca da Rasiei (ci, va ŭsiakim razie, całkam pieratvaracca ŭ maryjanetku). Inačaj kažučy, Biełaruś zaraz u punkcie bifurkacyi, i vynik pradkazać ciažka.

«Stratehija Zachadu musić palahać u tym, kab vykarystoŭvać usie mahčymaści dziela naroščvańnia svajoj prysutnaści tut, uzmacniać vahary ŭpłyvu na biełaruskuju sytuacyju. Apazycyja ŭ peŭnych vypadkach nia musić zanadta ciahnuć koŭdru na siabie, bo staić pytańnie pra vyžyvańnie krainy. Kali trapim pad Rasieju, to heta budzie kali nie nazaŭždy, dyk na hadoŭ 50-60 dakładna», — ličyć Dzianis Mieljancoŭ.

Nu a pakul što, jak bačym, zamiest adzinaha rubla Miensku vyrašyli nakinuć adzinuju systemu supraćpavietranaj abarony. A heta, ja vam skažu, strata ci nia bolšaha kavałku suverenitetu, čym jak pry zhodzie na rasiejskuju valutu. Uvohule vojski SPA dźviuch krain ščylna ŭzajemadziejničali i dasiul.

Fiška ž novaj damovy pra SPA ŭ tym, kab kamandny punkt byŭ ŭ Rasiei. To bok, kali što jakoje, ichni hienerał addaść zahad mačyć imperyjalistaŭ, nie pytajučysia ŭ miascovaha pravadyra.

Analityk Valer Karbalevič ličyć, što nijakaj peŭnaj zamiežnapalityčnaj stratehii ŭ aficyjnaha Miensku niama. «Biełaruskaje kiraŭnictva prosta viadzie azartnuju hulniu, dajučy biezadkaznyja abiacańni i Zachadu, i Rasiei. Ale pradać toj samy tovar dvum pakupnikam nia ŭdasca. Adnaho daviadziecca «kinuć», — miarkuje ekspert.

Zaraz biełaruskaje kiraŭnictva pasprabujuć «nachilić», kab pryznała niezaležnaść dvuch miaciežnych anklavaŭ. Dyk ci doŭha pašencić trymać toj špahat?

• 0
• 0
• 0
• 0
• 0
• 0
• 0
• 0