U Kryčaŭskim rajonie «najechali» na padpisantaŭ pad zvarotam za adstaŭku staršyni rajvykankama
U Kryčaŭskim rajonie staršyni sielskich savietaŭ jeździać pa vioskach i nastojliva «pierakonvajuć» padpisantaŭ pad zvarotami z patrabavańniem adstaŭki staršyni Kryčaŭskaha rajvykankama Vasila Sysojeva i nieabchodnaści admieny Dekreta №3 «Ab papiaredžańni sacyjalnaha ŭtrymalnictva» adklikać svaje podpisy, paviedamlaje vydańnie «Mahiloŭski rehijon».
Pa słovach siabra niezaležnaha prafsajuzu REP z Kryčava Juryja Šuvałava, sielsavietaŭskija čynoŭniki pierakonvajuć hramadzian napisać piśmovyja zajavy ab adklikanni svaich podpisaŭ pad hetymi zvarotami, pry hetym namiakajučy, što ŭ vypadku admovy dla ich mohuć być niepryjemnyja nastupstvy. Na vioscy narod bolš zapałochany i niekatoryja z padpisantaŭ paddajucca na ŭhavory uładaŭ.
«Pryčym nastojvajuć adklikać podpisy i pad zvarotam z patrabavańniem adstaŭki Vasila Sysojeva, i pad raniej padadzienym nami kalektyŭnym zvarot ab nieabchodnaści admieny dekreta ab darmajedstvie. Mnohija ludzi padpisalisia pad abodvuma hetymi zvaroty», — raspaviadaje Juryj Šuvałaŭ.
Asabliva nastojliva «pierakonvaje» viaskoŭcaŭ adklikać svaje podpisy pad zvarotami staršynia Čyrvanabudskaha sielsavieta Halina Michajłaŭna Hieraščanka, adznačaje kryčaŭski aktyvist.
Mahiloŭski pravaabaronca Barys Buchiel u kamientary «Mahiloŭskamu rehijonu» adznačyŭ, što čynoŭniki z Kryčaŭskaha rajvykankama i miascovyja sielvykankamy, u adpaviednaści z zakanadaŭstvam, sapraŭdy majuć prava praviarać dakładnaść podpisaŭ pad zvarotami hramadzian. Razam z tym pry praviadzieńni takich pravierak čaściakom na padpisantaŭ akazvajecca cisk, ich imknucca zapałochać. Barys Buchiel zaklikaje hramadzian nie paddavacca na cisk z boku pradstaŭnikoŭ miascovych uładaŭ, i adrazu ž paviedamlać pra takija vypadki pravaabaroncam, pa mahčymaści fiksujučy dziejańni čynoŭnikaŭ na videa- i aŭdyjanośbity.
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty27
Kamientary