Razborki ŭ Maładziečnie: u centry horada «pravyja» žorstka pabili «levych», paciarpieŭ Kasinieraŭ
Sierada 21 červienia, centralnaja płošča Maładziečna. Nievialikuju hrupu moładzi ŭ adzieńni ź simvolikaj anarchisckich ruchaŭ spyniaje kolkasna bolšaja kampanija — pradstaŭlajucca «pravymi».
Dyjałoh chutka skončyŭsia, zahavaryli ŭžo ruki i nohi — paśla karotkaj bojki anarchisty sychodziać pabitymi.
Siarod ich — šyroka viadomy svaimi pierformansami Viačasłaŭ Kasinieraŭ, u jaho złamany nos i zakrytaja ČMT.
Što heta było?
Niekatoryja ŚMI pisali, što «natoŭp neanacystaŭ źbiŭ Kasinierava ź siabrami», što «niekalki bitkom nabitych mašyn jeździli pa horadzie i šukali ich».
Vychodzić, u Maładziečnie jość nieanacysty, jakija siarod biełaha dnia na mašynach i ŭ centry horada napadajuć na ludziej?
«Naša Niva» pasprabavała razabracca z hetaj historyjaj.
My pacikavilisia ŭ Kasinierava, čamu jon apynuŭsia ŭ Maładziečnie.
«Pryjechaŭ pahulać, — skazaŭ Kasinieraŭ. — Z čaho naradžajecca dumka prosta pahulać? Da siabroŭ skatacca, da znajomych. Tam ža nie było ni futboła nijakaha, ničoha. Usio spakojna było».
Što padkazała paciarpiełym, što pierad imi mienavita «nieanacysty»?
«Ludzi tak pradstavilisia: maŭlaŭ, my pravych pohladaŭ, vy — antyfašysty, a my pravyja, nacysty. Siabry maje čuli heta», — skazaŭ Kasinieraŭ.
Pavodle jaho, uzrost napadnikaŭ — u asnoŭnym prykładna pa 19-20 hadoŭ, byli i trochi starejšyja.
Ci mahli b heta być fanaty miascovaha futbolnaha kłuba?
«Dumaju, ź vialikaj imaviernaściu heta miascovyja, moža, i fanaty. Ja čuŭ, što tam zaŭsiody mocny ruch byŭ pravy», — skazaŭ paciarpieły chłopiec.
Adznačym, što niekalki dzion tamu na sajcie dla fanataŭ troublemakers.com.ua vyjšła hutarka z ananimnym fanatam «levaha» minskaha kłuba «Partyzan», jaki apisaŭ siabie jak «aktyŭnaha chulihana apošniaj piacihodki».
Aproč inšaha, źviartajuć na siabie ŭvahu nastupnyja słovy:
«Nie ŭličvajučy drobnych bojek, majoj pieršaj temaj było nakryćcio (nakryćcio — źbićcio kampanijaj inšaj kampanii) kahości z pravincyjnych ruchaŭ, napeŭna, Maładziečna. I tak, hvałt — heta toje, u što ja adrazu ž ulubiŭsia i na heta padsieŭ. My vyjšli na ich ź ciemry, jany nie čakali hetaha ŭ svaim ža horadzie i byli absalutna nie hatovyja. Častka pabiehła, tyja, što zastalisia — akazalisia na ziamli ŭžo praz paru imhnieńniaŭ. Vydatna adčuvać adrenalin, jaki skałynaje tvajo cieła, čuć chrust kostak niebaraki, na jakim ty skačaš, lamant vypadkovych śviedkaŭ… U Maładziečna my naviedvalisia jašče nie raz i, napeŭna, hety horad lidziruje pa kolkaści kalectvaŭ, pakinutych paśla nas», — pryvodzić sajt słovy minskaha fanata.
I voś jašče jon kaža pra fanackaje žyćcio, kali kłub užo vylacieŭ z Vyšejšaj lihi čempijanatu Biełarusi:
«U dyvizijonie my hulali ŭ asnoŭnym z prynižanymi pravincyjnymi ruchami, tak što standartnaja mutka, u tyja časy, prachodziła pa schiemie apisanaha vyjezdu ŭ Maładziečna: pryjechać składam u ich horad, paścialić usich, chto nie paśpieŭ uciačy, jechać dadomu adpačyvać. U pryncypie, taksama viesieła».
Ci mieŭ dačynieńnie Kasinieraŭ da fanataŭ «Partyzana»?
Jak jon nam skazaŭ — tolki ŭskosnaje.
«Byli siabry adtul, u pryncypie, mieŭ kantakty. «Haniać» za «Partyzan» — nie było takoha, ja futbołam nie vielmi cikaŭlusia. A tak, padtrymlivaŭ svaich siabroŭ. Tamu što my vyznajem adnolkavyja pohlady», — patłumačyŭ Kasinieraŭ.
Jakija vysnovy možna zrabić paśla hetaha?
Mahčyma, što Kasinieraŭ staŭ achviaraj svaich, tak by mović, znajomstvaŭ — raniejšych hierojstvaŭ svaich siabroŭ u Maładziečnie.
Viačasłaŭ — publičnaja asoba, nie chavaje svaich suviaziaŭ z fanatami «Partyzana», jakija sami pryznajucca, što maładziečanskija ad ich naciarpielisia chiba nie bolš za ŭsich.
Možna padumać, što, ubačyŭšy znajomyja tvary, adnyja subkulturščyki, jakija nazyvajuć siabie «pravymi», vyrašyli adpomścić pradstaŭnikam inšaj płyni subkultury — hetak zvanym «antyfa». U ich heta ličycca narmalnym, jak vynikaje z vyšejzhadanaha intervju.
U milicyi pakul nijak nie kamientujuć zdareńnie: «Viadziecca pravierka».
Tyja maładziečanskija fanaty, ź jakimi my źviazalisia, robiać vyhlad, što ničoha nie viedajuć pra incydent.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna5
Kamientary