Dziela $900 miljonaŭ: što pavinien zrabić Minsk, kab atrymać novyja tranšy kredytu

Atrymańnie Minskam piataha-siomaha tranšaŭ kredytu Jeŭrazijskaha fondu stabilizacyi i raźvićcia na ahulnuju sumu 900 młn dalaraŭ budzie mahčymaje pry vykanańni adkarektavanych umoŭ, «skiravanych na pavyšeńnie efiektyŭnaści kiravańnia dziaržaŭnymi pradpryjemstvami». U časopisie Minfina «Finansy. Ulik. Aŭdyt» pieraličanyja niekatoryja z dadatkovych patrabavańniaŭ.

U pryvatnaści, JEFSR patrabuje ŭdaskanaleńnia mietadaŭ karparatyŭnaha kiravańnia ŭ 17 akcyjaniernych tavarystvach (u tym liku razmova idzie pra ŭzmacnieńnie składu naziralnaj rady niezaležnymi dyrektarami), aptymizacyi dziaržułasnaści na respublikanskim uzroŭni praź pieradaču ŭ kamunalnuju ŭłasnaść nie mienš za 45 dziaržpradpryjemstvaŭ, a taksama dziarždoli akcyj asobnych AAT na biržy.

Va ŭmovy šostaha tranšu uklučany novy kantrolny pakazčyk pa raspracoŭcy i ŭkaranieńniu miechanizmaŭ sacyjalnaj abarony, jakija praduhledžvajuć pieranavučańnie zvolnienych pry rearhanizacyi rabotnikaŭ i ich dalejšaje pracaŭładkavańnie. Takim čynam ekśpierty raźličvajuć kampiensavać nievykanańnie ŭmovy treciaha tranšu ab pavyšeńni dapamohi pa biespracoŭi da biudžetu pražytkavaha minimumu.

Va ŭmovy siomaha tranšu paŭtorna prapisali zakanadaŭčaje zaćviardžeńnie paradku pryniaćcia miascovymi ŭładami rašeńniaŭ ab pieradačy im u davierčaje kiravańnie kamunalnych pradpryjemstvaŭ jak dadatkovaha miechanizmu azdaraŭleńnia finansava niaŭstojlivych dziaržpradpryjemstvaŭ (u asnoŭnym sielskahaspadarčych). Pry hetym status umovy staŭ «kantrolnym».

Na takija karekciroŭki JEFSR pajšoŭ paśla nievykanańnia Biełaruśsiu umoŭ vydzialeńnia treciaha tranšu. Havorka idzie pra try indykatyŭnyja pakazčyki — pryniaćcie Stratehii pavyšeńnia efiektyŭnaści kiravańnia dziaržsiektaram i dvuch zahadaŭ prezidenta, ab mierach dadatkovaj padtrymki niekatorych katehoryj biespracoŭnych i ab zaćviardžeńni paradku pieradačy ŭ davierčaje kiravańnie finansava niaŭstojlivych pradpryjemstvaŭ.

Kančatkovy pieralik dadatkovych mier płanavałasia pradstavić na razhlad čarhovaj Rady Fondu, pasiadžeńnie jakoj płanujecca na kaniec červienia - lipień biahučaha hoda.

Pradastaŭleńnie finansavaha kredytu Biełarusi ŭ pamiery 2 młrd dalaraŭ siamiu tranšami na praciahu 2016—2018 hadoŭ uchvalena Radaj Fondu 25 sakavika 2016 hoda. Suma pieršaha tranšu pry hetym vyznačana ŭ 500 młn dalaraŭ, druhoha-čaćviortaha - pa 300 młn dołaraŭ, piataha-siomaha tranšaŭ - pa 200 młn dalaraŭ kožny. Pakul Biełaruś atrymała try tranšy na ahulnuju sumu za 1,1 młrd dalaraŭ. Asnoŭnaj metaj kredytu źjaŭlajecca padtrymka prahramy reformaŭ ŭrada i Nacbanka, skiravanaj na stvareńnie ŭmoŭ dla vychadu krainy na trajektoryju ŭstojlivaha rostu praz pavyšeńnie jakaści ekanamičnaj palityki i praviadzieńnie strukturnych reformaŭ.

• 0
• 0
• 0
• 0
• 0
• 0
• 0
• 0