Siensacyja: astranomy znajšli płaniety, padobnyja da Ziamli. Na ŭsich ź ich moža być žyćcio
NASA 20 lutaha abviaściła pra pres-kanfierencyju, pryśviečanuju «adkryćciam pa-za miežami Soniečnaj sistemy». Nieadkładna źjavilisia kanśpirałahičnyja teoryi ab inšapłaniecianach. 22 lutaha vyśvietliłasia, što ŭsio ž sprava nie ŭ inšapłaniecianach. Astranomy znajšli padobnyja na Ziamlu płaniety, jakija kruciacca vakoł zorki TRAPPIST-1 u suzorji Vadaleja. Pryčym na ŭsich siami płanietach moža być vada, piša Meduza.
Čyrvony karlik TRAPPIST-1 u suzorji Vadaleja raźmieščany ŭ 39 śvietłavych hadach ad Sonca. U 2016 hodzie astranomy pry dapamozie naziemnych teleskopaŭ vyjavili try płaniety, jakija kruciacca vakoł hetaj zorki.
Paśla hetaha astranomy daśledavali TRAPPIST-1 pry dapamozie kaśmičnaha teleskopa «Śpitcer» i vyjavili jašče čatyry płaniety. Na ŭsich ź ich moža być vada. «Heta sapraŭdny siurpryz», — zajaviŭ bielhijski astranom Mikiel Žyjon. Raniej navukoŭcy ŭžo znachodzili sistemy ź siamiu płanietami, ale nikoli jany nie byli tak padobnyja na Ziamlu.
Pra znojdzienyja płaniety viadoma nie šmat. Jak zajaviŭ Mikiel Žyjon, «ich atmaśfiera moža być padobnaja na atmaśfieru Ziamli abo Vieniery, a moža być i zusim inšaj». Navukoŭcy viedajuć tolki prybliznyja pamiery płaniet — płaniety padobnyja na Ziamlu. Akramia taho, viadoma, jak časta jany robiać adzin abarot vakoł svajoj zorki: ad paŭtara da 20 dzion. Usie płaniety znachodziacca značna bližej da zorki, čym u Soniečnaj sistemie: kali TRAPPIST-1 źmiaścić na miesca Sonca, to ŭsie jaje płaniety apynucca ŭnutry arbity Mierkuryja. Płaniety raźmieščany tak blizka, što z kožnaj ź ich možna ŭbačyć susiednija, jak Miesiac ź Ziamli.
U žniŭni 2016 hoda astranomy abviaścili, što znajšli płanietu la bližejšaj da Ziamli zorki. Płanieta nazyvajecca Proksima b; jana krucicca vakoł zorki Proksima Centaŭra, jakaja raźmieščana ŭ Alfa Centaŭra.
Za ŭvieś čas daśledavańnia navukoŭcy paćvierdzili isnavańnie 3,4 tysiačy płaniet pa-za Soniečnaj sistemaj. Ich ahulnaja kolkaść aceńvajecca ŭ 100-400 miljardaŭ.
NASA adrazu vypuściła malaŭničy poster, što zaprašaje kaśmičnych padarožnikaŭ adpravicca na TRAPPIST-1E, čaćviortuju ekzapłanietu.
Kamientary