«Kaśpierski»: Internet-karystalniki ŭ Biełarusi ŭsio jašče nie navučylisia pravilna ŭžyvać paroli

Kožny dziaviaty internet-karystalnik u Biełarusi sutykaŭsia sa sprobaj uzłomu anłajn-akaŭntu. Asnoŭnaja pryčyna ŭ tym, što karystalniki ŭsio jašče nie navučylisia pravilna ŭžyvać paroli, tym samym ryzykujučy svaimi ŭlikovymi zapisami i zachavanaściu asabistych źviestak. Da takoj vysnovy pryjšli analityki «Łabaratoryi Kaśpierskaha» pavodle vynikaŭ praviedzienaha daśledavańnia, paviedamiła pres-słužba kampanii.

Zhodna z acenkami «Łabaratoryi Kaśpierskaha», daloka nie ŭsie biełaruskija karystalniki ličać nieabchodnym achoŭvać svaje akaŭnty z dapamohaj nadziejnych i mocnych parolaŭ. Tak, tolki čverć (27%) stvarajuć novuju kambinacyju dla kožnaha asobnaha akaŭntu, bolšaść ža addajuć pieravahu apieravać abmiežavanym naboram parolaŭ, vykarystoŭvajučy adzin i toj ža dla dostupu adrazu da niekalkich ulikovych zapisaŭ. 13% apytanych žycharoŭ Biełarusi naohuł abychodziacca adnym parolem dla ŭsich svaich akaŭntaŭ.

Akramia hetaha, biełaruskija karystalniki nie asabliva imknucca zrabić svaje paroli ustojlivymi da ŭzłomu. Naprykład, vialikija i małyja litary kambinujuć tolki 23% udzielnikaŭ apytańnia, a nialitarnyja i nialičbavyja simvały vykarystoŭvajuć ŭsiaho 14%. Pry hetym značnaja kolkaść karystalnikaŭ ŭpeŭnienyja ŭ nieabchodnaści mocnych parolaŭ dla achovy svaich klučavych akaŭntaŭ — sistem anłajn-bankinhu (52%), sacyjalnych sietak (43%) i asabistych kabinietaŭ u anłajn-kramach (31%).

Daśledavańnie «Łabaratoryi Kaśpierskaha» taksama pakazała, što časta ludzi davoli niadbajna staviacca da svaich parolaŭ. Da prykładu tracina apytanych dzialilisia imi z členami siam`i, a 13% — ź siabrami. Akramia taho, 26% biełaruskich karystalnikaŭ pryvykli zapisvać kody dostupu na papiery, kab nie zabyć ich. Usie hetyja dziejańni mohuć spravakavać vypadkovuju uciečku źviestak.

Daśledavańnie praviedzienaje kampanijaj B2B International na zapyt «Łabaratoryi Kaśpierskaha» ŭ žniŭni 2016 hoda. U apytańni ŭziali ŭdzieł 12.546 internet-karystalnikaŭ u 21 krainie. U Biełarusi byli apytanyja 503 čałavieki.

«Łabaratoryja Kaśpierskaha» — zasnavanaja ŭ 1997 hodzie ŭ Rasii mižnarodnaja kampanija, jakaja śpiecyjalizujecca na raspracoŭcy sistem achovy ad kamp`iutarnych virusaŭ, spamu, chakierskich napadaŭ i inšych kibierpahroz. Adna z najbujniejšych antyvirusnych karparacyj ź sietkaj rehijanalnych ofisaŭ pa ŭsim śviecie.

• 0
• 0
• 0
• 0
• 0
• 0
• 0
• 0