Raźmiaščeńnie vojskaŭ ZŠA i NATA ŭ Polščy padvodzić rysu pad daminacyjaj Rasii ŭ Centralnaj Jeŭropie, zajaviŭ ministr abarony Polščy Antoni Maciarevič.
Vajskoŭcy ZŠA prybyvajuć u Polšču ŭ ramkach apieracyi «Atłantyčnaja rašučaść» (Atlantic Resolve), bryhada prabudzie ŭ krainie dzieviać miesiacaŭ. Ratacyi majuć adbyvacca tak, kab nie było pierapynkaŭ, i ŭ rehijonie na pastajannaj asnovie znachodzilisia amierykanskija siły.
U skład bryhadnaj bajavoj hrupy ŭvachodziać kala 3500 vajskoŭcaŭ, 87 tankaŭ, 18 samachodnych haŭbic Paladin, bolš za 400 aŭtamabilaŭ Humwee, a taksama 144 BMP Bradley.
Techniku razhruzili ŭ niamieckim horadzie Bremierhafen.
«Jałta skončyłasia. Hadami paśla 1989 hodu my pavinny byli dumać i ŭličvać, ci nie nakładuć ruskija vieta na toje ci inšaje dziejańnie, ci možam my rabić toje, što dobra dla naroda, — usio heta skončyłasia. Rasijskaje vieta na terytoryi Centralnaj Jeŭropy, u Polščy raz i nazaŭsiody skončyłasia», — zajaviŭ Maciarevič u efiry Polskaha telebačańnia.
Pavodle jaho słoŭ, abrany prezident ZŠA Donald Tramp i naminavanyja na vysokija pasady amierykanskija palityki viedajuć Rasiju i «viedajuć, što jana źjaŭlajecca pahrozaj», tamu źmieny staŭleńnia da Rasii ŭ bližejšy čas čakać nie varta.
Maciarevič taksama skazaŭ, što Maskva niervova ŭsprymaje raźmiaščeńnie vajskoŭcaŭ NATA, bo razumieje stratehičnaje značeńnie takoha kroku.
«Hetyja słovy vykazvajuć jak strach, tak i vialikaje rasčaravańnie, što zaviaršajecca etap daminavańnia spačatku savieckaha, a ciapier rasiejskaha, nad Centralnaj Jeŭropaj. A mienavita nad klučom ad Jeŭropy, jakim źjaŭlajecca Polšča. Treba razumieć, i našy amierykanskija sajuźniki heta viedajuć, i mienavita tamu ŭ Polščy budzie znachodzicca kamandavańnie tankavaj bryhady i sił NATA, što Polšča źjaŭlajecca klučom ad Jeŭropy. źjaŭlajecca toj terytoryjaj, jakaja dziela svajho pamieru, kolkaści nasielnictva i hatoŭnaści da abarony i pamieru armii … budzie mieć klučavoje značeńnie dla strymańnia ci niestrymańnia mahčymaha rasijskaha napadu», — skazaŭ ministr abarony Polščy.
Kamientary