Rasijskija chakiery padčas apošniaj stadyi prezidenckaj kampanii ŭ ZŠA ŭskosna dapamahali Donaldu Trampu i škodzili Chiłary Klintan, piša The New York Times sa spasyłkaj na krynicy ŭ amierykanskaj vyviedcy.
Heta śćviardžeńnie hazieta abhruntoŭvaje tym, što chakiery ŭzłamali nie tolki Nacyjanalny kamitet Demakratyčnaj partyi, ale i Respublikanskaj. Pry hetym dakumienty respublikancaŭ nie publikavalisia. Za ŭzłomam stajała taja ž hrupa chakieraŭ Fancy Bear.
U Respublikanskaj partyi ŭzłom partyjnych struktur admaŭlajuć. Tam kažuć, što byli ŭzłomy asobnych funkcyjanieraŭ (u publičny dostup trapiła kala 200 listoŭ).
U amierykanskaj vyviedcy ličać, što na samoj spravie Rasieja chacieła dapamahać Donaldu Trampu, a nie prosta sprabavała padarvać davier da samoj vybarčaj sistemy. Pieramoha Trampa dla Rasii akazałasia takoj ža niečakanaj, jak i dla ŭsich astatnich, skazała na zakančeńnie adna z krynic NYT.
Pa źviestkach vydańnia, na bryfinhach ŭ Biełym domie i Kanhresie pradstaŭniki raźviedki nazvali rasijskich čynoŭnikaŭ, adkaznych za ŭzłomy. Tym nie mienš, u artykule ich imiony nie padajucca.
U vieraśni 2016 hoda respublikaniec Majkł Makkoł, kiraŭnik kamiteta pa biaśpiecy Pałaty pradstaŭnikoŭ, zajaviŭ, što Nacyjanalny kamitet Respublikanskaj partyi byŭ uzłamany, ale nieŭzabavie admoviŭsia ad svaich słoŭ.
Vybary prezidenta ZŠA adbylisia ŭ listapadzie 2016 hoda. Pieramohu atrymaŭ pradstaŭnik Respublikanskaj partyi Donald Tramp, choć bolšaść apytańniaŭ pakazvali, što pieramoža demakrat Chiłary Klintan.
Na praciahu niekalkich miesiacaŭ da vybaraŭ hrupa chakieraŭ Fancy Bear publikavała skradzienyja ŭ demakrataŭ dakumienty, u tym liku pierapisku členaŭ jaje kamandy až da kiraŭnika štaba.
Kamientary