Premjer-ministr Małajzii Nadžyb Razak zaklikaŭ da mižnarodnaj interviencyi ŭ Mjanmu, kab spynić «hienacyd musulman rachińja» ŭ hetaj krainie.
Sutyčki miž musulmanami rachińja i budystami ŭ Mjanmie ŭ 2012 hodzie pryviali da tysiač achviar. Sioleta armija Mjanmy praviała novuju karnuju apieracyju suprać partyzanaŭ-musulman. Heta i vyklikała abureńnie ŭ isłamskim śviecie.
Absalutnuju bolšaść u Mjanmie składajuć budysty.
Musulmanie-rachińja — heta pierasialency ź Bienhalii, jakich u kałanijalny pieryjad anhličanie pryvozili ŭ Mjanmu (tady viadomuju jak Birma) u jakaści hastarbajtaraŭ.
Jašče ŭ XIX st. uźnikli pieršyja etničnyja kanflikty miž pierasialencami-musulmanami i tutejšymi budystami.
U Druhuju suśvietnuju vajnu rachińja vajavali na baku anhličan suprać japoncaŭ i ich birmanskich kałabarantaŭ. Padziei ŭ štacie Arakan tady nahadvali polska-ŭkrainskuju vajnu, što razhortvałasia ŭ toj samy čas na Vałyni i Padlaššy, kali etničnaja bolšaść na dadzienaj terytoryi vyčyščała mienšaść.
Paśla vajny rachińja sprabavali dałučycca da Uschodniaj Bienhalii, ale byli razhromlenyja ŭradavymi vojskami.
Rachińja tak i nie atrymali pravoŭ hramadzianstva. Jany žyvuć u biednaści. Sprečki za ziamlu miž imi i budystami stvarajuć pryčyny napružańnia na terytoryjach ich kampaktnaha pražyvańnia. Pahromy musulmanskich kvartałaŭ pryviali da masavaj mihracyi rachińja ŭ Tajłand i, asabliva, musulmanskuju, zamožnuju Małajziju.
Prychod da ŭłady ŭ Mjanmie apazicyi nie vyrašyŭ prablem rachińja. Aunh San Su Čžy nie maje prahramy ŭ hetym pytańni i prosta sprabuje zamarozić situacyju.
Samyja strašnyja musulmanskija pahromy ŭ Mjanmie adbylisia ŭ 2012 hodzie.
Isnuje mierkavańnie, što Razak nahniataje situacyju ciapier, kab adciahnuć uvahu ad karupcyjnych skandałaŭ va ŭłasnaj krainie. Jaho papularnaść upała, paśla taho jak byli vyjaŭlenyja jaho afšornyja rachunki na sotni miljonaŭ dalaraŭ.
Ciapier čytajuć
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary