Pa vynikach pieršaha paŭhodździa 2016 hoda prybytak viadučych biełaruskich bankaŭ apynuŭsia istotna nižešym u paraŭnańni z anałahičnym pieryjadam 2015 hoda, śviedčać danyja Nacyjanalnaha banka.
Tak, prybytak «Biełarusbanka», najbujniejšaha pa pamiery aktyvaŭ banka Biełarusi, u pieršaj pałovie 2016 hoda skłaŭ 501,2 młrd. niedenaminavanych rubloŭ i źniziŭsia ŭ paraŭnańni z anałahičnym pieryjadam 2015 hoda amal na 20%.
Prybytak inšaha dziaržaŭnaha banka «Biełahraprambanka» skłaŭsia na ŭzroŭni 77,8 młrd. rubloŭ. U paraŭnańni z anałahičnym pieryjadam minułaha hoda heta mienš amal u 4 razy.
Prybytak dziaržaŭnaha «Bielinviestbanka» skłaŭ 23,5 młrd. rubloŭ i ŭpaŭ u 3,5 raza.
Taksama pamienšyŭsia prybytak u biełaruskaha banka z rasijskim kapitałam «BPS-Śbierbanka», jaki za pieršuju pałovu hoda zarabiŭ 85,7 młrd. rubloŭ, što na čverć mienš za pakazčyk za anałahičny pieryjad minułaha hoda.
Varta zaznačyć, što prybytak u paraŭnańni ź pieršaj pałovaj minułaha hoda skaraciŭsia i ŭ inšych hrašova-kredytnych ustanoŭ, jakija ŭvachodziać u siamiorku najbujniejšych bankaŭ krainy.
Tak, prybytak «Banka BiełVEB» u pieršym paŭhodździ skłaŭ 264,2 młrd. rubloŭ i źniziŭsia ŭ paraŭnańni z anałahičnym pieryjadam minułaha hoda na 5,2%. Bank z aŭstryjskim kapitałam «Pryjorbank» zarabiŭ u studzieni—červieni 512,8 młrd. rubloŭ (na 24% mienš). «Biełhazprambank» u studzieni—červieni zarabiŭ 435,5 młrd. rubloŭ, što amal na 18% mienš u paraŭnańni z anałahičnym pieryjadam minułaha hoda.
Na dumku ekśpiertaŭ, źnižeńnie prybytkovaści bankaŭskaha biźniesu sioleta vyklikanaje stałym rostam prablemnych aktyvaŭ. Heta pryviało da nieabchodnaści farmiravańnia śpiecyjalnych reziervaŭ za košt prybytku.
Pavodle danych Nacbanka, pa stanie na 1 červienia prablemnyja aktyvy bankaŭ skłali 51,5 trłn. rubloŭ i praktyčna padvoilisia z pačatku hoda. Dola prablemnych aktyvaŭ u bankaŭskaj sistemie Biełarusi dasiahnuła na 1 červienia 12,44% (suprać 6,83% na 1 studzienia).
Mižnarodnaje ahienctva Fitch Ratings, jakoje rejtynhuje biełaruskija banki, čakaje, što ich prablemnyja aktyvy na praciahu 2016 hoda buduć praciahvać raści.
«Ekanamičnaja situacyja pakul nie palapšajecca. I navat kali ŭ druhim paŭhodździ ekanomika pačnie adnaŭlacca, jakaść kredytnaha partfiela, vierahodna, budzie praciahvać niekatory čas jašče paharšacca, što budzie śledstvam ŭpłyvu na banki papiarednich stresaŭ», — vykazała zdahadku ŭ majskim intervju BiełaPAN staršy dyrektar maskoŭskaha ofisa Fitch Ratings Volha Ihnaćjeva.
Kamientary