Juryj Čyž u sudzie patłumačyŭ, čamu napisaŭ u KDB zajavu na Uładzimira Japryncava

Čyža dastavili ŭ sud pad kanvojem, ale ŭ zału pasiadžeńnia jon zajšoŭ biez kajdankoŭ.

13.29

Na hetym dopyt Čyža skončany. U sudovym pasiadžeńni abvieščany pierapynak da 20 lipienia.

13:10

Pytańni Juryju Čyžu zadaje Uładzimir Japryncaŭ.

— Chaču śviedku spytać: ty Isaaka Papandopułosa viedaješ? Syna našaha ahulnaha siabra.

Čyž: — Tak, jon pracavaŭ u «Trajple» ŭ adździele prodažaŭ naftapraduktaŭ.

— Ty sam zajmaŭ ludziam? Tabie pavinny siońnia bujnyja sumy?

Čyž: — Tak.

— Dyk čamu ty na ich zajavu ŭ KDB nie napisaŭ? Im viera jość, a mnie niama?

Hetaje pytańnie, pa sutnaści, zastałosia biez adkazu.

Japryncaŭ-starejšy zadaje pytańni vyrazna i vyhladaje bolš upeŭniena, čym Čyž, choć i znachodzicca ŭ kletcy.

— Skažy, ci byli vypadki, kali my nie ŭ čas addavali hrošy? — spytaŭ Japryncaŭ u byłoha partniora.

Čyž: — Byli, ale staralisia svoječasova addavać.

— Na nas choć raz u KDB napisaŭ chto-niebudź?

Čyž: — Nie.

— Čyje hrošy byli ŭ Saviaka?

Čyž: — Praktyčna ŭsie hrošy ad Anzora byli.

— Pytańnie maralnaha charaktaru. Ty viedaŭ, što ja paśla taho, jak pierapisaŭ svaju dolu na Mamijašvili, trapiŭ u reanimacyju?

Čyž: — Tak, viedaŭ.

— Ty choć raz mnie patelefanavaŭ? Spytaŭ, što zdaryłasia?

Čyž: — Nie, navošta turbavać u reanimacyi?

— Zrazumieła. A było choć raz, kab ty prylacieŭ kudy-niebudź i ja tabie nie nabraŭ? — aburyŭsia Uładzimir Japryncaŭ.

Dalej jon spytaŭ, čamu Čyž vyjšaŭ da jaho žonki z achovaj, kali taja pryjechała da jaho paśla zatrymańnia muža i syna.

— Skažy, jakija ŭ nas byli adnosiny? Pamiž adzin adnym, siemjami?

Čyž: — Apošnija try hady ŭžo nie takija, jak raniej.

12:40

Zatym pytańni svajmu ŭžo byłomu partnioru zadaŭ Uładzimir Japryncaŭ.

— Ty sam hrošy na kampaniju zajmaŭ? — źviarnuŭsia Japryncaŭ-starejšy da Juryja Čyža.

— Zajmaŭ.

— Addavali zaŭsiody?

— Nie zaŭsiody.

— A čaho na ich zajavu nie pisaŭ? Značyć, mnie viery niama? A viedaješ, što mnie vialikija hrošy pavinny…

Čyž adznačyŭ, što jon pryciahvaŭ hrošy pad ahulnyja prajekty.

— A na nas, kali my nie addavali svoječasova, niechta ŭ KDB pisaŭ? — pacikaviŭsia Japryncaŭ.

Na heta Čyž adkazaŭ, što jon i Japryncaŭ niasuć kansalidavanuju adkaznaść pa daŭhach.

— Ty viedaŭ, što ja padpisvaŭ papiery ad kampanii? — spytaŭ Uładzimir Japryncaŭ.

— Postfaktum.

— A, tak ja, vychodzić, kradu dakumienty… A jość u materyjałach spravy — ty mnie kažaš: «Vałodzia, treba spyniać heta padpisvać» … Kali my pieraafarmlali doli, mnie stała niadobra, ja trapiŭ u reanimacyju. Ty viedaŭ, što ja trapiŭ u reanimacyju?

— Viedaŭ.

— A što navat nie patelefanavaŭ?

— Navošta hetyja pytańni? — niezadavolena spytaŭ Čyž.

— A maralnaje abličča? Heta važna viedać, — rastłumačyŭ Japryncaŭ-starejšy.

12:31

— Vam viadoma, što praz paŭhoda paśla majho zatrymańnia mianie zaprasiŭ supracoŭnik KDB i paabiacaŭ svabodu ŭ abmien na infarmacyju ab vašym biznesie? — cpytaŭ u Čyža Japryncaŭ-małodšy.

Čyž: — Nie.

- Dyk voś, ja admoviŭsia, tamu što liču, što jość rečy daražej hrošaj i svabody.

12:27

Pytańni Čyžu zadaje Kaźbiek Japryncaŭ.

- Vy skazali, što da 2012 hoda vałodali afšornymi kampanijami. Možacie nazvać ich?

Čyž: — Hetyja kampanii tut nie fihurujuć, heta nie maje dačynieńnia.

— Prosta dyrektaram adnoj z vašaj afšornaj kampanii źjaŭlajecca toj ža čałaviek, jaki ŭznačalvaje Edena Investments (praz hetuju kampaniju Kaźbiek i jaho partniory pravodzili kantrakty na pastaŭku paliva).

12:12

Čyž zajaviŭ, što Japryncaŭ-starejšy viarnuŭ častku doŭhu syna. Pra dakładnuju sumu jamu nieviadoma. Na pytańnie advakata Siarhieja Bujakieviča, ci była meta va Uładzimira Japryncava złačynnym šlacham zavałodać hrašyma, Čyž rastłumačyŭ koratka: «Nie».

11.56

Čyž paćvierdziŭ, što jaho supravadžała achova. Kaža, što bajaŭsia pahroz, u tym liku ŭ suviazi z abaviazkami Japryncava pierad Mamijašvili.

11.39

Juryj Čyž kaža, što Mamijašvili pastajanna telefanavaŭ jamu. «Kazaŭ, mnie patrebnyja hrošy, kuplaj u mianie dolu. Ale ja paŭtaraŭ, što ŭ mianie niama takoj mahčymaści».

11:40

Za dzień da zatrymańnia Japryncava Michaił Mamijašvili prylacieŭ u Miensk razam z Saviakom.

«Jany zajavili, što ŭ ich jość dakładnaja infarmacyja, što Uładzimir Hienadzievič (Japryncaŭ — red.) zaŭtra źjazdžaje ŭ Maskvu, a adtul — za miažu. Maŭlaŭ, u jaho hatovyja dakumienty na afarmleńnie inšaha hramadzianstva. I jość źviestki, što jon maje hrošy na zamiežnych rachunkach, — raspavioŭ Juryj Čyž. — Mamijašvili skazaŭ: zabiaśpieč mnie sustreču na samym vysokim uzroŭni. Ja skazaŭ: pišy zajavu, inšaha varyjantu ŭ mianie niama».

Na nastupny dzień Čyž razam z rasijskimi biznesmienami pajechaŭ u KDB.

«Ja spytaŭ Mamijašvili, ci nie mianiaje jon rašeńnie, tamu što zajavu zabrać nielha. Jon zrabiŭ niekalki zvankoŭ. I skazaŭ, što rašeńnie nie mianiaje, — rastłumačyŭ hiendyrektar «Trajpła». — Ja napisaŭ zajavu, to pajšli ŭžo spasyłki na harantyjnyja listy ad «Trajpła». Pahladzicie maju zajavu, ja tam prasiŭ razabracca ŭ situacyi, tamu što mohuć być zakranuty intaresy našaj kampanii».

Prakuror začytaŭ zajavu Čyža ŭ KDB. U pieršym skazie jon prosić razabracca i pryciahnuć da adkaznaści svajho dziełavoha partniora Uładzimira Japryncava.

Sa słoŭ Juryja Čyža, «aficyjnuju zajavu ŭ KDB napisaŭ Saviak», takaja była damoŭlenaść z Mamijašvili.

Prakuror udakładniŭ u Čyža, ci staŭ by toj źviartacca ŭ KDB, kali b nie viedaŭ ad Mamijašvili, što Uładzimir Japryncaŭ źbirajecca źjechać za miažu.

«11 čysła (žnivień 2015 h. — red.) — nie, ale paźniej my byli b vymušanyja heta zrabić. Užo pastupali listy ad inšych kampanij, ad ukrainskaj, naprykład», — rastłumačyŭ biznesmien.

11:20

U lipieni 2015 Japryncaŭ pryznaŭsia Čyžu, što nie maje hrošaj, kab raspłacicca pa svaich pazykach. Tamu jon prapanavaŭ Čyžu zabrać dolu akcyj u «Trajple», a ŭzamien treba było vyrašyć abaviazalnictvy pierad kredytorami — kala $60-70 miljonaŭ. Adnak u Čyža takich hrošaj nie było.

10:46

Jury Čyž kaža, što paznajomiŭsia ź Japryncavym da taho, jak byŭ stvorany «Trajpł», jany sustrakalisia na treniroŭkach.

Juryj Čyž zajaviŭ u sudzie, što ad pačatku dziejnaści ŭ kampanii «Trajpł» Japryncaŭ-starejšy mieŭ da prodažu naftapraduktaŭ «samaje minimalnaje dačynieńnie».

«U pieramovach udziełu nie braŭ, atrymlivaŭ minimalnuju infarmacyju, padrychtoŭka harantyjnych listoŭ u jaho paŭnamoctvy nie ŭvachodziła».

Juryj Čyž zaznačyŭ u sudzie, što ŭvohule harantyjnyja listy rychtavali redka, kali heta było nieabchodna, bo pastaŭki naftapraduktaŭ išli nierehularna. Kali rychtavali takija listy, byli abaviazanyja infarmavać pra heta banki. Pra harantyjnyja listy za podpisam Uładzimira Japryncava, jakija fihurujuć u spravie, Juryju Čyžu nie było viadoma.

10:20

Čyž koratka padstryžany, ale nie nahała, jak robiać ź viaźniami. Jon u šerym dvubortnym stroi, adkazvaje spakojna, ale nie hučna.

Pa słovach Čyža, jon nie viedaŭ, što «Trajpł» vystupaŭ harantam po ŭhodach na pastaŭku paliva, jakijami zajmalisia Kaźbiek Japryncaŭ i Alaksandr Arabian. Hetyja dakumienty byli padpisanyja Uładzimiram Japryncavym (jon vałodaŭ tracinaj akcyj «Trajpła»).

* * *

Juryj Čyž čaćviorty miesiac utrymlivajecca ŭ SIZA KDB. Jamu pradjaŭlena abvinavačańnie va ŭchileńni ad vypłaty padatkaŭ u asabliva bujnym pamiery.

Pa słovach paciarpiełych Saviaka i Michnieviča, mienavita Čyž paraiŭ im napisać zajavu na Japryncava. Toje ž samaje zrabiŭ i jon sam u dzień zatrymańnia svaich partnioraŭ. U pierapiscy Japryncaŭ-małodšy i Arabian abmiarkoŭvali upłyŭ i kantrol Čyža pa pastaŭkach naftapraduktaŭ za miažu praz afšornyja kampanii.

• 0
• 0
• 0
• 0
• 0
• 0
• 0
• 0