Aŭstryja stanie pieršaj krainaj ES z ultrapravym prezidentam? 

Unikalnaja situacyja na prezidenckich vybarach u Aŭstryi. Pa stanie na 18.00 pa minskim časie i kandydat ad ultrapravaj Aŭstryjskaj partyi svabody Norbiert Chofier (na fota źleva, fota APA), i kandydat ad levaj Partyi zialonych nabirali pa 50% hałasoŭ, pieradaje aŭstryjskaje ahienctva APA.

Paśla padliku 60% biuleteniaŭ Chofier nabiraŭ 50,2% hałasoŭ. Adnak paśla padliku 80% napierad vyrvaŭsia ŭžo były lidar Partyi zialonych Van der Bielen z 50,1%.

Heta značyć, vynik vyrašać ličanyja hałasy.

Pad kaniec padliku napierad vyrvaŭsia Chofier. U jaho, biez uliku hałasoŭ, adpraŭlenych poštaj, 51,8%. Adnak paštovamu hałasavańniu addajuć pieravahu bolš adukavanyja vybarcy, a jany addajuć pieravahu Van der Bielenu. Poštaj u krainie hałasavała prykładna šostaja častka tych, chto addaŭ hałasy. Jak čakajecca, hałasy raździelacca amal roŭna 50 na 50.

Jaŭka na vybarach skłała rekordnyja dla krainy 72,27%.

Upieršyniu ad 1945 hoda skłałasia takaja situacyja, što ŭ druhi tur nie vyjšaŭ kandydat ni ad adnoj tradycyjnaj, mejnstrymavaj partyi: ani kansiervatar z Aŭstryjskaj narodnaj partyi, ani sacyjał-demakrat z Sacyjalistyčnaj.

Ciapier usie palityčnyja siły zhurtavalisia suprać Chofiera. Adnak krajnie pravyja vielmi papularnyja, dyj sam Chofier charyzmatyčny. U pieršym tury jon zdabyŭ 36% hałasoŭ, a jahony apanient — 23%.

Aŭstryjskaja partyja svabody była ŭ svoj čas zasnavanaja vieteranam SS. Ciapier joj simpatyzuje Rasija, bo APS vystupaje suprać jeŭraintehracyi. Kreml spadziajecca, što padzielenaja Jeŭropa budzie słabiejšaj. Ultrapravyja, u svaju čarhu, vyznajuć za Rasijaj histaryčnaje prava kantralavać krainy Uschodniaj Jeŭropy, u tym liku Biełaruś i Ukrainu. Adnak dla aŭstryjskich vybarcaŭ važnaje nie heta. Jany padtrymlivajuć APS za jaje antyimihranckuju pazicyju, a taksama za krytyku ciapierašniaj palityčnaj elity.

Kali Chofier pieramoža, jon stanie pieršym prezidentam jeŭrapiejskaj krainy ad ultrapravaj partyi. Prezident u Aŭstryi maje cyrymanijalnyja funkcyi, ale ŭ pieramozie Chofiera budzie i simvaličnaje značeńnie.

Aŭstryja — heta 9-miljonnaja kraina ŭ Alpach, miž Niamieččynaj i Italijaj. Jana — častka bahataha jadra ES. VUP na dušu nasielnictva ŭ Aŭstryi ŭ 3 razy bolšy, čym u Biełarusi.

Aŭstryja histaryčna katalickaja kraina. U svoj čas jana była centram Aŭstryjskaj, a paśla Aŭstra-Vienhierskaj impieryi. Ź jaje pachodziŭ Hitler, što spryjała anšlusu jaje Rejcham (1938). Paśla Druhoj suśvietnaj Aŭstryja była niejtralnaj dziaržavaj, što zrabiła Vienu špijonskim hniazdom dla ŭsich raźviedak śvietu, u tym liku savieckaha KHB. U postsavieckija časy Aŭstryja stała mahnitam dla postsavieckaha kapitału. Tamu jana maje asablivyja biznes-poviazi z Rasijaj, i Biełaruśsiu taksama, dy ličycca adnoj z samych prarasijskich krain ES. 

Akramia Aŭstryjskaj partyi svabody, Maskva aktyŭna spansaruje i prapahanduje Nacyjanalny front u Francyi, Alternatyvu dla Hiermanii, vienhierski Jobik, bałharskuju «Ataku» dy inšyja bolšyja i mienšyja ultrapravyja i ultralevyja siły, jakich abjadnoŭvaje nieprymańnie jeŭraintehracyi.

Chofier vystupaŭ «suprać štučnych miežaŭ pamiž Jeŭropaj i histaryčna i kulturna źviazanaj ź joj Rasiejaj» i vykazvaŭ upeŭnienaść u nieabchodnaści admieny sankcyj suprać Maskvy.

• 0
• 0
• 0
• 0
• 0
• 0
• 0
• 0