Kalekcyja tekstylu i knih ź niamieckaha Lajmena prybyła ŭ Vilenski biełaruski muziej razam z žukom-skurajedam
Kalekcyja tekstylu i knih ź niamieckaha Lajmiena prybyła ŭ Vilenski biełaruski muziej razam z žukom-skurajedam. Redkija rečy, adzieńnie i pieryjodyku, jakimi niadaŭna papoŭnilisia fondy Vilenskaha biełaruskaha muzieja imia Ivana Łuckieviča, muziejniki zmohuć dałučyć da ekspazicyi nie raniej jak praź niekalki miesiacaŭ. Pryčyny zatrymki patłumačyła Radyjo Svaboda supracoŭnica muzieja Paŭlina Vituščanka.
«U rečach znajšli škodnika — skurajeda, jaki asabliva niebiaśpiečny dla adzieńnia z voŭny, ale i knihi jon taksama moža paškodzić. Daviadziecca rabić śpiecyjalnyja miery abarony», — skazała Paŭlina.
Pavodle supracoŭnicy biełaruskaha muzieja, dniami jana pačała raźbirać rečy kalekcyi i znajšła ŭ ich ličynki žuka-skurajeda (pa-łacinsku Anthrenus verbasci. — RS). Paŭlina Vituščanka kaža, što ŭ asablivaj niebiaśpiecy tkaniny, jakija ciapier daviadziecca adpravić na dva tydni ŭ marazilnik, ale heta datyčycca i knih, jakim skurajed pahražaje źniščeńniem vokładak.
Taki bytavy sposab baraćby sa skurajedam, jak prańnie, dla tekstylnych rečaŭ z kalekcyi nie padychodzić, bo možna paškodzić farby ŭzoraŭ, moža źjavicca ćvil, što dla muziejnych ekspanataŭ taksama vielmi drenna.
U pačatku krasavika ŭ muziej z Hiermanii pryvieźli dziasiatki skrynak artefaktaŭ z asabistaj kalekcyi i archiva biełaruskaha dziejača Juryja Popki, jaki žyŭ u niamieckim horadzie Lajmienie i trymaŭ pryvatny biełaruski muziej.
Kalekcyja emihranta ź Biełarusi paśla jaho śmierci ŭ 1990 hodzie pavodle jaho zaviaščańnia dastałasia haradskim uładam i zachoŭvałasia na składzie.
Urešcie kalekcyjaj zaniaŭsia niamiecki hramadzianin biełaruskaha pachodžańnia Aleś Maisiejenka, jaki i pryvioz jaje ŭ vilenski muziej u minułym miesiacy.
Supracoŭniki biełaruskaha muzieja vielmi ŭdziačnyja Alesiu Maisiejenku i za dastaŭku kalekcyi, i za jaje vyratavańnie.
«Lajmienskija haradskija ŭłady de-fakta źniščyli muziej Popki ŭ 2015—2017 hadach (dakładny hod my nie viedajem). Ekspazicyju prosta ŭ biesparadku kinuli ŭ kardonnyja skryni, jakija zachoŭvalisia ŭ vilhotnych pamiaškańniach. I my vielmi-vielmi ŭdziačnyja Alesiu Maisiejenku, bo jon hadami damahaŭsia źmieny situacyi z hetaj kalekcyjaj — i narešcie damohsia. I taksama ŭdziačnyja aktyvistam arhanizacyi RAZAM Deutschland, jakija dapamahli pryvieźci rečy da nas. Bo inakš hetyja žuki hryźli b biełaruskija stroi jašče hadami», — kaža Paŭlina Vituščanka.
Pavodle Paŭliny Vituščanki, muziej užo šukaje mahčymaść arandavać płoščy ŭ marazilniku, kudy buduć źmieščany tekstylnyja rečy i knihi. Heta budzie kaštavać peŭnych hrošaj, tamu šukajuć i finansavańnie. Dobra jašče, što častka kalekcyi Juryja Popki nie zapatrabuje takich namahańniaŭ, miarkuje supracoŭnica muzieja.
«Tam jość inšyja rečy, naprykład karespandencyja, płakaty, sałamianyja košyki, jakija nie treba marozić. Ich dastatkova prosta karancinavać u vielmi ščylna zakrytych skrynkach. Taki karancin patrebny tamu, što choć tam i niama ničoha jadomaha dla našaha žuka, ale heta nie značyć, što jon tam nie znachodzicca, i kali nie karancinavać, to vybieracca i znojdzie niešta «smačnaje» z našaj asnoŭnaj kalekcyi, čaho my starajemsia nie dapuścić. U vyniku žuk, kali jon i tam jość, pamre z hoładu. Karancin hetych rečaŭ zojmie nie mienš za dva miesiacy», — raskazała Paŭlina Vituščanka.
Paśla karancinnych mier i apisańnia rečaŭ z kalekcyi Juryja Popki supracoŭniki Vilenskaha biełaruskaha muzieja imia Ivana Łuckieviča abiacajuć padrychtavać vystavu najbolš cikavych ekspanataŭ kalekcyi.
Ciapier čytajuć
Vandroŭnik i biznesoviec ź Minska za dva dni znajšoŭ sabie praz sacsietki niaviestu — najbolš spadabałasia dziaŭčyna z Rasii34
Vandroŭnik i biznesoviec ź Minska za dva dni znajšoŭ sabie praz sacsietki niaviestu — najbolš spadabałasia dziaŭčyna z Rasii
«Ź piaci varyjantaŭ try kvatery zdavalisia tolki hramadzianam Biełarusi». Rasijanie pierajechali ŭ Homiel paśla ataki USU na Bransk — što ich dzivić?3636
Kamientary