Kaardynatar «Chartyi-97» Źmicier Bandarenka vystupiŭ ź idejaj novaj stratehii dziejańnia demakratyčnych siłaŭ na bližejšy čas.
Bandarenka letaś byŭ adnym ź inicyjataraŭ idei dyjalohu miž uładami i apazycyjaj. Jon tłumačyć heta tym, što ŭ pačatku 2007 hodu kraina apynułasia ŭ ciažkim ekanamičnym stanoviščy, a razam z hetym uźnikła pahroza dla niezaležnaści. U takich umovach «apazycyja całkam śviadoma praciahnuła ruku dapamohi biełaruskim uładam».
Jak kaža Bandarenka, taja prapanova paspryjała realizacyi «šerahu investycyjnych prajektaŭ, značna ŭzmacniła pazycyi krainy na pieramovach z Rasiejskaj Federacyjaj, dazvoliła adkryć novyja kredytnyja linii ŭ Eŭropie». Ale ciapier na dumku pravaabaroncy, «nadyšoŭ čas apazycyi admovicca ad dyjalohu».
Bandarenka kaža, što apazycyja padčas usich mižnarodnych vizytaŭ viała razmovy pra mahčymaści taho, kab krainy Eŭrasajuzu i ZŠA zrabili kroki nasustrač aficyjnamu Miensku ŭ vypadku vyzvaleńnia ŭsich palitviaźniaŭ.
«Niadaŭna ŭ Vašynhtonie my abmiarkoŭvali z pradstaŭnikami Dziarždepartamentu mahčymaść vizytu ministra zamiežnych spravaŭ Biełarusi i pradstaŭnika Administracyi Łukašenki ŭ ZŠA. Ameryka sapraŭdy była hatova da realnaha praryvu ŭ adnosinach z našaj krainaj», — kaža kaardynatar «Chartyi-97».
«Kali b biełaruskija ŭłady vyzvalili Alaksandra Kazulina da kanca lutaha, jak i abiacali amerykanskim i eŭrapiejskim palitykam, to z 1 sakavika my b žyli ŭ novaj Biełarusi. Pakul ža ŭłady pastavili na dyjalohu i demakratyzacyi kryž», — praciahvaje pravaabaronca.
Źmicier Bandarenka prapanoŭvaje novuju stratehiju dziejańnia apazycyi na bližejšy čas. «Novaja stratehija siońnia — hetaje ćviordaje supraćstajańnie dyktatury va ŭsich kirunkach», — kaža jon.
Bandarenka absalutna nia vieryć, što sioletnija parlamenckija vybary buduć demakratyčnymi. «Tamu na paviestku dnia ŭstajuć lozunhi "Bajkot vybarčamu farsu!", "Bajkot režymu Łukašenki!", "Bajkot dyktatury!"», — ličyć kaardynatar «Chartyi-97».
Bandarenka kaža, što ŭ historyi byli vypadki, kali paśpiachovyja bajkoty prymušali ŭłady iści na sastupki apazycyi na nastupnych vybarach.
«Značna horš — bajkot niepadrychtavany. Nieefektyŭna rabić zajavy pra bajkot vybaraŭ za niekalki dzion da hałasavańnia. Takija kampanii, nasamreč, pryvodziać da depresii ŭ hramadztvie. Bajkot vybaraŭ u 2000 hodzie ŭ značnaj stupieni skansalidavaŭ demakratyčnyja ruchi moładzi. Bajavy duch apazycyi paśla kampanii bajkotu byŭ vielmi vysoki. Bajkot-2008 taksama stanie pieraškodaj namieram u čarhovy raz sumiaścić vybary z referendumam. Naprykład, ab Kanstytucyjnym akcie abjadnańnia z Rasiejaj» — praciahvaje Z.Bandarenka.
«Ź siaredziny červienia i možna budzie pačynać kampaniju bajkotu siłami hramadzianskaj supolnaści. Partyi na pieršym etapie pasprabujuć skarystać mahčymaść vybarčaj kampanii dla prasoŭvańnia svaich idejaŭ, ale, sutyknuŭšysia z čarhovym biazładździem, dałučacca da bajkotu. Mahčyma, nie ŭsio adrazu padtrymajuć bajkot, ale, u rešcie rešt, da jaho dałučycca absalutnaja bolšaść demakratyčnych struktur. Bajkot źjaŭlajecca adkazam na represii. Da taho ž, reakcyjaj na cisk uładaŭ musić stać značnaje ŭzmacnieńnie kampanii salidarnaści jak u krainie, tak i za miežami. Formu bajkotu dyktatury kožny moža vyznačać sam. Heta dapamoža realnamu abjadnańniu ŭsich narmalnych ludziej, jak va ŭładzie, tak i ŭ apazycyi», — padsumoŭvaje Źmicier Bandarenka.
Kamientary