Internet i ŚMI1717

Biełaruski kaveenščyk staŭ adnym z samych papularnych televiadučych Ukrainy. Dźmitryj Tankovič: «Biełaruś zastyła, a Ukraina stanie jeŭrapiejskaj krainaj»

Zasnavalniki ŭkrainskaj kampanii pa vytvorčaści humarystyčnaha kantentu «Vaviorka-pradakšn» — try byłyja ŭdzielniki znakamitaj biełaruskaj kamandy Kłuba viasiołych i kiemlivych «ČP». Adzin ź ich — Dźmitryj Tankovič — siońnia papularny ŭkrainski televiadoŭca. Jon pačynaŭ svaju karjeru na biełaruskim telebačańni, ale nie ŭbačyŭ dla siabie pierśpiektyŭ u Biełarusi.

Dźmitryj naradziŭsia ŭ Minsku. Skončyŭ škołu sa srebranym miedalom. Atrymaŭ vyšejšuju adukacyju ŭ BDEU pa śpiecyjalnaści «ulik, analiz i aŭdyt u banku». Ciaham dvanaccaci hod byŭ udzielnikam kamandy KVK «ČP». Z 1999 hoda pačaŭ pracavać na biełaruskim telebačańni. Apošnija dziesiać hod supracoŭničaje z ukrainskim telekanałam STB u jakaści viadoŭcy prajektaŭ, samyja viadomyja ź jakich — «Ukraina maje talent», «Tancy z zorkami», «Tancujuć usie!».

Adzin z papularnych teleprajektaŭ na ŭkrainskim telebačańni — «Tancy z zorkami». 

Dźmitryj žyvie ŭ Kijevie razam z žonkaj i dačkoj. U Minsku ž zastalisia maci z bratam dy trochi ŭspaminaŭ.

«Ja nie hladžu KVK»

— Vy pačynali miedyjnuju karjeru z KVK. Što aznačaje dla vas hetaja hulnia?

— KVK — heta maładość, pryhody i vielizarny dośvied. Ale ŭ peŭny momant my zrazumieli, što vyraśli i musim zrabić krok napierad. Było vielmi prykra, što my skončyli svoj šlach za adzin krok da pieramohi. Paśla zakančeńnia siezonu my jechali na hastroli ŭ depresii, ź jakoj vybiralisia paru miesiacaŭ. Sumnyja byli kancerty… Ale ž zdužali. Ciapier, kali prajšło adzinaccać hod, ja baču, što dla asabistaha rostu kožnaha z nas hetaja niezavieršanaść stała mahutnym šturškom da samaraźvićcia. Jana nadała nam rašučaści i trochi złości. My zrabili ŭsio, što možna było zrabić. Čas ruchacca dalej.

Kamanda KVK «ČP». 

— Peŭna, uźnikaje žadańnie viarnucca ŭ toj čas?

— Byvaje, kali my źbirajemsia ź siabrami vypić i pahutaryć, źjaŭlajucca dumki: a pajedziem, zrobim kancert, uspomnim maładość! Ale nastupaje ranica, usio stanovicca na svaje miescy.

— Kali hladzicie KVK ciapier, napeŭna, dumajecie, što hulnia ŭžo nie taja, užo nie takaja śmiešnaja?

— Ja nie hladžu KVK. Niama kali, dy, ščyra kažučy, bajusia, što zachliśnie nastalhija. I tady pryjdziecca biehčy ŭ kijosk pa piva (śmiajecca).

Frahmient vystupu kamandy KVK «ČP». Numar «Punsovyja vietrazi», 2005 hod. 

«Biełaruskija kanały nie zmahajucca za hledača»

— Jašče vy pracavali na biełaruskim telebačańni i navat u 2009 hodzie atrymali ŭznaharodu «Najlepšy viadoŭca». Ale ž nieŭzabavie my bačym vas u Kijevie, zrešty, jak i bolšaść byłych siabroŭ biełaruskaj kamandy KVK. Čamu tak?

— Niechta atrymlivaje asałodu ad taho, što maje. A mnie, kab pačuvać siabie dobra, treba raści. Da taho ž tvorčaje raźvićcio — luboje raźvićcio asoby — niepaźbiežna pavyšaje ŭzrovień finansavaha spakoju.

— A raści ŭ Biełarusi niamožna?

— Mnie stała zrazumieła, što pry tych umovach, što tam skłalisia, raźvićcio dla telebačańnia i dla miedyjnaj piersony prosta nie praduhledžanaje. Najpierš praz toje, što ŭsie kanały dziaržaŭnyja, i kankurencyi zusim niama. Jany nie zmahajucca za hledača, nie zacikaŭlenyja ŭ raźvićci, u vytvorčaści aryhinalnaha kantentu. Nie viedaju, jak ciapier, a kali ja źjazdžaŭ, navat z rejtynhami nichto nie pracavaŭ. Nie viedali, što heta i dla čaho.

— Va Ukrainie inakš?

— Tut amal niama dziaržaŭnych kanałaŭ. Jany raźvivajucca vielmi dynamična — vymušanyja raźvivacca, bo inakš nie vyžyvuć. Kožny ranak ja prahladaju rejtynhi prahram za minuły dzień i adrazu baču, padabajecca maja prahrama hledaču ci nie.

— Peŭny čas paśla adjezdu vy praciahvali paralelna pracavać u Minsku. Ci płanujucca zaraz niejkija sumiesnyja z BT prajekty?

— Pačniom z taho, što našyja topavyja prajekty na STB, kštałtu «Tancujuć usie!», jość u internecie. Tak što ich mohuć hladzieć (i hladziać) ludzi z roznych krain, u tym liku ź Biełarusi. Ja viedaju heta dakładna tamu, što na kastynhi pryjazdžaje vielmi šmat biełarusaŭ.

Dźmitryj z udzielnicaj prajekta «Tancy z zorkami» Taćcianaj Dohilevaj. 

U miežach kampanii «Vaviorka-pradakšn» my z zadavalnieńniem supracoŭničali b ź biełaruskim telebačańniem. Ale pakul nie bačym zacikaŭlenaści. Naš siońniašni dośvied, skažam ščyra, nikomu ŭ Minsku nie patrebny.

U mianie skłałasia ŭražańnie, što Biełaruś u niejki momant zastyła i dahetul znachodzicca ŭ hetkim stanie. Akramia telebačańnia, toje tyčycca badaj što i ŭsiaho astatniaha. Ale mnie chočacca vieryć, što heta pytańnie času.

«Ja nie adchryščvajusia ad Biełarusi, ale Ukraina stała mnie rodnaj»

— U Biełarusi takija abstaviny praz kryzis?

— Ja dumaju, lubyja finansavyja składanaści — vydatnaja matyvacyja padniać piatuju kropku i pačać niešta rabić. Jak u luboj inšaj krainie, va Ukrainie taksama chapaje ludziej, jakija kažuć, što im ciažka. Čas kryzisu — udały dla samaraźvićcia: jon vymušaje ŭklučyć hałavu i pačać ruchacca. Ale projdzie jašče šmat času i źmienicca nie adno pakaleńnie, pakul my pačniom razumieć, što naš dabrabyt zaležyć nie ad taho, chto i jak kiruje krainaj. Jon zaležyć tolki ad nas.

— Jak tady spynić «uciečku mazhoŭ» z našaj krainy?

— Dla taho, kab ludzi nie źjazdžali, ich kraina pavinna być krainaj mahčymaściaŭ. Roŭnych dla kožnaha.

— A ci płanujecie sami viarnucca ŭ Biełaruś?

— Ja dla siabie nie pravodžu miežaŭ: tut Biełaruś, a tut Ukraina. U mianie biełaruski pašpart, u Minsku žyvuć maje maci i brat. Va Ukrainie ŭ mianie žonka i dačka. Ja viedaju biełaruskuju movu, praŭda, razmaŭlać na joj tut niama z kim. Vuču ŭkrainskuju. Ni ŭ jakim razie nie adchryščvajusia ad Biełarusi, jakuju lublu. Ale svaju budučyniu ja źviazvaju z Ukrainaj. Jana taksama stała mnie rodnaj.

Z žonkaj Volhaj. 

— Navat vajna nie paŭpłyvała na płany?

– Pa ščyraści, ja nie razumieŭ, što mnie rabić. Było vielmi strašna. Dahetul mnie niespakojna za svaju siamju — žonku i dačku. Ź inšaha boku, ja viedaju, što dla Ukrainy heta jašče adzin šaniec. I dahetul maju nadzieju, što jon budzie vykarystany. Ukraina pierastanie być krainaj «saŭka» i stanie jeŭrapiejskaj. Ja vielmi vieru ŭ heta, i ništo nie pieraškadžaje mnie adkryta vykazvać svaju pazicyju.

Kamientary17

Ciapier čytajuć

Stała viadoma, pa jakim miechaniźmie śpisvalisia hrošy z bankaŭskich kartak biełarusaŭ padčas maštabnaha zboju1

Stała viadoma, pa jakim miechaniźmie śpisvalisia hrošy z bankaŭskich kartak biełarusaŭ padčas maštabnaha zboju

Usie naviny →
Usie naviny

Kavaleŭski patłumačyŭ, za jaki dyjałoh pamiž hramadstvam i ŭładami jon vystupaje13

Duda praśviaciŭ Zialenskaha adnosna Vałynskaj trahiedyi. Toj pra jaje nie viedaŭ18

Voś jak vyhladaje pavaleny buraj les pad Mahilovam z vyšyni ptušynaha palotu FOTAFAKT1

U Minsku i vakolicach hrad z paŭjajka i vialiki patop VIDEA2

Ksienija Łuckina: «Usio my rabili pravilna, kali dahetul Łukašenka i prapahandysty biaskonca ŭspaminajuć»5

Niezvyčajnaja kašula Łukašenki — vyrab biełaruskaha lehprama FOTA24

Cichanoŭski raskazaŭ, što treba było rabić u žniŭni 2020-ha84

Bieraściejec za dzieviać hadoŭ pryvodziŭ na hienietyčnuju ekśpiertyzu šaściarych dziaciej

«Majem adnu važnuju začepku». Rasśledavalniki praciahvajuć pošuk Mielnikavaj6

bolš čytanych navin
bolš łajkanych navin

Stała viadoma, pa jakim miechaniźmie śpisvalisia hrošy z bankaŭskich kartak biełarusaŭ padčas maštabnaha zboju1

Stała viadoma, pa jakim miechaniźmie śpisvalisia hrošy z bankaŭskich kartak biełarusaŭ padčas maštabnaha zboju

Hałoŭnaje
Usie naviny →

Zaŭvaha:

 

 

 

 

Zakryć Paviedamić