Minskaja milicyja zatrymała 32-hadovaha žychara stalicy, jaki padazrajecca ŭ sieryi machlarstvaŭ, paviedamiła pres-aficer Leninskaha RUUS Minska Taćciana Kavalova.
«Mužčyna telefanavaŭ u słužbu taksi, zamaŭlaŭ mašynu, raspaviadajučy, što znachodzicca ŭ Nacyjanalnym aeraporcie Minsk, praz hadzinu ŭ jaho vylet, a nieabchodnyja dakumienty jon zabyŭsia ŭ Minsku. Dla zvankoŭ złamyśnik karystaŭsia telefonami vypadkovych minakoŭ», — rastłumačyli ŭ RUUS. Pry hetym padazravany prasiŭ padjechać kiroŭcaŭ na peŭny adras, zabrać dakumienty i pieradać čałavieku 600 tysiač rubloŭ, jakija potym abiacaŭ abaviazkova viarnuć i kampiensavać usie vydatki.
Kiroŭcy pieradavali hrošy, jak paźniej vyśvietliłasia, samomu padazravanamu. Zatym taksisty vyjazdžali ŭ aeraport, paralelna telefanujučy na numar, ź jakoha pastupiŭ zakaz. Adnak u kožnym vypadku adkazvali, što taksi nie vyklikali i mužčynu nie viedajuć.
«Adzin kiroŭca pa šlachu ŭ aeraport nie ŭtrymaŭsia i pahladzieŭ, što ž za dakumienty znachodziacca ŭ kanviercie. Tam lažaŭ kavałak haziety. Pa radyjostancyi jon pačuŭ, što anałahičnaja zamova pastupiła inšamu kiroŭcu. Ściamiŭšy, u čym sprava, mužčyna źviarnuŭsia ŭ milicyju i paviedamiŭ adras, dzie addavaŭ hrošy. Tam padazravany i byŭ zatrymany supracoŭnikami kryminalnaha vyšuku Leninskaha RUUS», — raspaviali ŭ milicyi.
Akazałasia, što hety čałaviek užo byŭ sudzimy za anałahičnaje złačynstva. Milicyja zaklikaje ŭsich, chto paciarpieŭ ad hetych ašukanskich dziejańniaŭ, źviartacca ŭ Leninskaje RUUS asabista albo pa telefonach: (029) 356-02-20, (029) 169-46-19, (017) 368-63-49 abo 102.
Kamientary