18-hadovyja. Kłaŭdrep: «miortvyja Najki» i «skrskrskr»

U kožnaj hienieracyi jość taja muzyka i tyja vykanaŭcy, jakich potym modnyja muzykalnyja krytyki karanujuć hučnymi tytułami nakštałt «hołas pakaleńnia». Kali na chvilinku pasprabavać ujavić ci sprahnazavać budučyniu, to praz hadoŭ dziesiać na hetu rolu ź vialikaj imaviernaściu moža trapić taki zahadkavy dla šyrokaha koła čytačoŭ termin, jak kłaŭdrep.

Jak možna zdahadacca, kłaŭdrep pa sutnaści svajoj jość adhalinavańniem chip-chop muzyki. Jak i bolšaść siońniašniaj kultury 18-cihadovych, hety žanr pryjšoŭ da nas z prastoraŭ internetu i za vielmi karotki čas zavajavaŭ cełuju armiju fanataŭ. Cloudrap litaralna aznačaje «vobłačny rep», nazva tut abumoŭlenaja hučańniem. Bit časta budujecca na veb-hučańni, charaktaryzujecca spakojnymi, pavolnymi instrumientalnymi partyjami, pry tym vielmi šyroka vykarystoŭvajucca elemienty embijentu, lo-fi, edm. Dadzienaja stylistyka ŭpieršyniu źjaviłasia ŭ Złučanych Štatach i vielmi dobra upisałasia ŭ tumbler-estetyku jakaja tak papularnaja siońnia ŭ siecivie.

Adnym z hałoŭnych hierojaŭ kłaŭdrepa ŭ ZŠA z'ŭlajecca Bones (sapraŭdnaje imia Ełma Kenedzi O'Konar) — 20 hadovy amierykanski bieły chłopiec z doŭhimi ciomnymi vałasami, jaki ŭsim svaim vyhladam moža nahadvać pra jakuju zaŭhodna inšuju subkulturu, tolki nie pra chip-chop. Bones zavajavaŭ novuju hienieracyju pa ŭsim śviecie svaim začaravalnym hučańniem, u tekstach časta hučać temy śmierci i zabaronienych rečyvaŭ, što, biezumoŭna, pryciahvaje da siabie ŭvahu moładzi.

Klipy zdymajucca ŭ vialikaj kolkaści ŭ estetycy VHS, što z časam stała sapraŭdnym trendam. Taksama varta adznačyć što raspaŭsiud tvorčaści idzie vyklučna praź internet: artyst nastojliva admaŭlajecca ad kantraktaŭ z bujnymi łejbłami, jaho nielha pabačyć pa telebačańni ci pačuć na radyjo. Hetaja rysa šmat u čym adnosicca da bolšaści źjaŭ moładzievaha asiarodździa.

Paśla davoli jaskravaha pośpiechu Bones pa ŭsim śviecie pačynajuć źjaŭlacca ludzi, jakija imknucca pierajmać trend. Takija ludzi praź niekalki hadoŭ znachodziacca i va ŭschodniaj susiedcy našaj krainy. Adsiul vychodzić ledź nie adzin z samych papularnych hierojaŭ moładzi na ŭsim abšary byłoha SSSR, Pharaoh (Faraon). Pieršapačatkova Pharaoh niaščadna kapijuje, i nie lepšym čynam, Bones. Kapijavałasia ŭsio: ad muzyki i klipaŭ i da źniešniaha vyhladu – što, u pryncypie, nie dziŭna, uličvajučy druhasny charaktar sučasnaj rasijskaj kultury, ale heta razmova dla asobnaha artykuła.

Sapraŭdny pośpiech Pharaoh prynios trek i klip «Blacksiemens». Klip roŭna za hod svajho isnavańnia nabraŭ 7 miljonaŭ prahladaŭ, a radki z prypievu pra «miortvyja Najki» i «skrskrskr» vam siońnia zmoža napieć absalutna luby padletak, možacie sami pierakanacca. Pharaoh pry ŭsioj svajoj druhasnaści źbiraje siońnia vialikija placoŭki, i źjaŭlajecca ruchavikom kłaŭdrepa na prastory SND.

Što tyčycca Biełarusi, to na dadzieny momant žanr pakul što ŭłasnych vykanaŭcaŭ nie maje. Za padobnuju sprobu možna zaličyć chiba što trek Vožyka «Abirajem Łukašenku» zrobleny na bit Bones, ale nazvać heta sprobaj zrabić kłaŭdrep było b niapravilna. 

Ci stanie kłaŭdrep kultavym, a jaho vykanaŭcy hałasami pakaleńnia — pakaža čas, ale pakul z upeŭnienaściu možna skazać, što hetaja muzyka — adzin z samych papularnych žanraŭ siarod sučasnych 18-hadovych.

• 0
• 0
• 0
• 0
• 0
• 0
• 0
• 0