«Kazaki» prosiać Łukašenku dazvolić im stać złučeńniem terytaryjalnych vojskaŭ krainy
Biełaruskija kazaki źviarnulisia da Alaksandra Łukašenki z prośbaj dazvolić im stać vajskovym złučeńniem terytaryjalnych vojskaŭ krainy. Zvarot byŭ pryniaty 6 lutaha ŭ Minsku na pazačarhovym siomym vialikim kruzie kazakoŭ, jaki praviało RHA «Biełaruskaje kazactva».
«U hety niaprosty čas my źviartajemsia da vas, jak da viarchoŭnaha hałoŭnakamandujučaha Respubliki Biełaruś, z nadziejaj, što biełaruskija kazaki na hetym etapie stanuć vajskovym złučeńniem terytaryjalnych vojskaŭ krainy, i na asnovie našaha respublikanskaha hramadskaha ab`iadnańnia «Biełaruskaje kazactva «budzie stvorana rejestravaje kazactva z vydańniem ukaza prezidenta Respubliki Biełaruś», — havorycca ŭ zvarocie.
U dakumiencie taksama adznačajecca, što dziakujučy jak dziejnaści asabista Łukašenki, tak i namahańniam hramadzian krainy, pracoŭnych kalektyvaŭ pradpryjemstvaŭ i arhanizacyj, hramadskich ab`iadnańniaŭ «sučasnaje abličča respubliki źmianiajecca». «Ajčyna prykmietna pamaładzieła, stała jarčejšaj, pryhažejšaj, bolš vietlivaj, atrymała mahutny impuls dla dalejšaha raźvićcia, sur`iozna palepšylisia ŭzajemaadnosiny ź dziaržavami Jeŭrasajuza», — ličać kazaki.
Na ich dumku, «dynamičnaje raźvićcio pramysłovaści i sielskaj haspadarki śviedčać ab vielizarnym patencyjale respubliki i jaje prezidenta», «vysoki davier» da jakoha pakazali prezidenckija vybary 2015 hoda.
U dakumiencie adznačajecca, što asnoŭnaj statutnaj metaj ab`iadnańnia ź`iaŭlajecca «adradžeńnie kazactva ŭ Respublicy Biełaruś na asnovach pravasłaŭja, patryjatyzmu, słužeńnia Ajčynie, addanaści biełaruskamu narodu i jaho prezidentu».
«My, kazaki, — hramadzianie Respubliki Biełaruś — vystupajem u vašu padtrymku i ŭpeŭnienyja ŭ vas, jak u apory mahutnaj, niezaležnaj i kvitniejučaj Biełarusi sučasnaści i budučyni», — padkreślivajecca ŭ zvarocie da Łukašenki.
Nahadajem, raniej viarchoŭny ataman arhanizacyi Mikałaj Ułachovič paraŭnaŭ Partyju BNF z «Isłamskaj dziaržavaj».
Kamientary