«Казакі» просяць Лукашэнку дазволіць ім стаць злучэннем тэрытарыяльных войскаў краіны
Беларускія казакі звярнуліся да Аляксандра Лукашэнкі з просьбай дазволіць ім стаць вайсковым злучэннем тэрытарыяльных войскаў краіны. Зварот быў прыняты 6 лютага ў Мінску на пазачарговым сёмым вялікім крузе казакоў, які правяло РГА «Беларускае казацтва».
«У гэты няпросты час мы звяртаемся да вас, як да вярхоўнага галоўнакамандуючага Рэспублікі Беларусь, з надзеяй, што беларускія казакі на гэтым этапе стануць вайсковым злучэннем тэрытарыяльных войскаў краіны, і на аснове нашага рэспубліканскага грамадскага аб`яднання «Беларускае казацтва «будзе створана рэестравае казацтва з выданнем указа прэзідэнта Рэспублікі Беларусь», — гаворыцца ў звароце.
У дакуменце таксама адзначаецца, што дзякуючы як дзейнасці асабіста Лукашэнкі, так і намаганням грамадзян краіны, працоўных калектываў прадпрыемстваў і арганізацый, грамадскіх аб`яднанняў «сучаснае аблічча рэспублікі змяняецца». «Айчына прыкметна памаладзела, стала ярчэйшай, прыгажэйшай, больш ветлівай, атрымала магутны імпульс для далейшага развіцця, сур`ёзна палепшыліся ўзаемаадносіны з дзяржавамі Еўрасаюза», — лічаць казакі.
На іх думку, «дынамічнае развіццё прамысловасці і сельскай гаспадаркі сведчаць аб велізарным патэнцыяле рэспублікі і яе прэзідэнта», «высокі давер» да якога паказалі прэзідэнцкія выбары 2015 года.
У дакуменце адзначаецца, што асноўнай статутнай мэтай аб`яднання з`яўляецца «адраджэнне казацтва ў Рэспубліцы Беларусь на асновах праваслаўя, патрыятызму, служэння Айчыне, адданасці беларускаму народу і яго прэзідэнту».
«Мы, казакі, — грамадзяне Рэспублікі Беларусь — выступаем у вашу падтрымку і ўпэўненыя ў вас, як у апоры магутнай, незалежнай і квітнеючай Беларусі сучаснасці і будучыні», — падкрэсліваецца ў звароце да Лукашэнкі.
Нагадаем, раней вярхоўны атаман арганізацыі Мікалай Улаховіч параўнаў Партыю БНФ з «Ісламскай дзяржавай».
Цяпер чытаюць
Пратасевіч зноў жэніцца — цяпер з таролагам Настассяй, якая працавала ў элітным медцэнтры «Мерсі»40
Каментары