Rasijskaja dysidentka try miesiacy chavałasia ad aryštu ŭ Biełarusi, pierš čym razam z synam nielehalna pierajści miažu z Ukrainaj
55-hadovaj Irynie Kałmykovaj na radzimie pahražaŭ aryšt za ŭdzieł u akcyjach pratestu.
Razam z 14-hadovym synam jana pierajechała ŭ Biełaruś, i tut chavałasia try miesiacy. Žyła ŭ roznych rajonach. Joj dapamahali pravaabaroncy i prostyja biełarusy. Urešcie jana pierajšła va Ukrainu na miažy z adnoj z abłaściej Rasii.
Kałmykova — viadomaja ŭ Maskvie aktyvistka. Jana zładziła adzinočnyja pikietavańni ŭ centry Maskvy z płakatami: «Kriemlovskije łžiepatrioty! Priekratitie vojevať s jedoj, v stranie milliony małoimuŝich! Sžihajtie svoi avto», «Politika v Rośsii: voruj — milliony, nie možieš — mołči, hovoriš — v tiuŕmu», «Hieroi nie umirajut», «Śmierť kriemlevskim okkupantam», «Žizń i svoboda Nadieždy Savčienko — ličnaja otvietstviennosť Putina», «Otdadim poślednieje, no spasiom Asada», «Putin — druh Sirii i vrah Rośsii», «Putin, žuj sopli, a nie oppoziciju», «Asad — ubijca, eta vojna — pozor Rośsii».
U vyniku ŭ Rasii na Irynu zaviali kryminalnuju spravu pa artykule Kryminalnaha kodeksa «Arhanizacyja niesankcyjanavanych mitynhaŭ i schodaŭ». Žančynie pahražała da 5 hadoŭ turmy.
Kali źjaviłasia pahroza źmianieńnia miery strymańnia z padpiski pra niavyjezd na aryšt, Iryna razam z 14-hadovym synam u panicy vyjechała z Rasii ŭ Biełaruś.
Prablema była ŭ tym, što syn nie mieŭ pašparta. Kab atrymać dakumient, Irynie z synam tre' było jechać pa miescy žycharstva byłoha muža, u Chanty-Mansijskuju akruhu, u Kahałym. Zrabić heta było niemahčyma, bo Iryna nie mahła pakinuć Maskvu, znachodziłasia pad padpiskaj pra niavyjezd.
U rospačy jana vyjechała ŭ Biełaruś. Trojčy sprabavała pierajechać biełaruska-ŭkrainskuju miažu ź biaspašpartnym synam — jaje zaviartali.
Try miesiacy jana žyła ŭ Minsku i Hrodzienskim rajonie, paśla rašyłasia na pierachod miažy.
Iryna Kałmykova kaža, što jaje paplečniki pa zmahańni albo źjechali z Rasiei, albo trapili za kraty: «Uładzimier Ionaŭ, jakomu 76 hod, taksama źjechaŭ va Ukrainu. U jaho taki ž samy artykuł, jak i ŭ mianie. Ildaru Dadzinu prysudzili try hady źniavoleńnia. Mark Halpieryn — pad śledstvam, sudu jašče nie było. Voś što zdaryłasia z nami. I što my rabili? Adzinočnyja pikiety. My nie padryvali, nie padpalvali, nie krali. Prosta stajali z płakatami. Ale nas ličać złačyncami, i našyja złačynstvy rasceńvajucca jak asablivyja», — narakaje Kałmykova.
Urešcie jana rašyłasia na nielehalny pierachod miažy. Udałosia.
Jaje syn narešcie pajšoŭ u škołu, va Ukrainie.
«Ja vielmi ŭdziačnaja biełarusam, jakija dapamahli mnie i majmu synu. Ja try miesiacy pražyła ŭ Biełarusi. Nia budu nazyvać proźviščy, bo nie chaču padstaŭlać ludziej, ale ja ŭdziačnaja biełarusam: jany dapamahali mnie z usich bakoŭ, i ja vyžyła», — kaža žančyna.
Kamientary