Kitaj i Paŭdniovaja Kareja zaniepakojenyja novym zakonam, jaki pryniali ŭ Japonii
U Japonii pryniaty zakon, jaki dazvalaje vykarystoŭvać vojski sił samaabarony krainy za miežami nacyjanalnaj terytoryi. Kitaj zajaviŭ, što novy zakon pahražaje miru ŭ rehijonie.
Z pryniaćciem zakona japonskija vajennyja atrymlivajuć prava ŭdzielničać u kanfliktach za miažoj. Takaja norma źjaviłasia ŭpieršyniu z 1945 hoda, paśla kapitulacyi Japonii ŭ Druhoj suśvietnaj vajnie.
Na dumku premjer-ministra Japonii Sindza Abe, inicyjavany im zakon patrebny, kab mieć mahčymaść dać adkaz na novyja vykliki, u pryvatnaści na pahrozu z boku Kitaja.
Ułady Kitaja śćviardžajuć, što imknucca raźvivać dvuchbakovyja adnosiny ŭ duchu miru, raźvićcia i supracoŭnictva. Adnak u apošnija miesiacy napružanaść u adnosinach pamiž Kitajem i Japonijaj ŭzmacniajecca na fonie terytaryjalnaj sprečki za hrupu vyspaŭ.
U samoj Japonii pryniaćciu zakona papiaredničała bolš za 200 hadzin palityčnych debataŭ, a hałasavańnie było adkładziena na niekalki hadzin z pryčyny pratestaŭ apazicyi, jakaja sprabavała zabłakavać pryniaćcie zakona.
Mnohija japoncy prytrymlivajucca asnoŭ pacyfistskoj paślavajennaj kanstytucyi krainy, jakaja zabaraniała vykarystańnie stvoranych u 1954 sił samaabarony za miažoj. Krytyki śćviardžajuć, što inicyjatyva parušaje pacyfisckuju kanstytucyju i moža ŭciahnuć Japoniju ŭ vajennyja apieracyi jaje asnoŭnaha sajuźnika — ZŠA.
Prychilniki inicyjatyvy, nasuprać, nastojvajuć, što hetyja miery žyćciova nieabchodnyja dla abarony Japonii i jaje rehijanalnych sajuźnikaŭ i dazvolać ažyćciaŭlać bolš šyrokija dziejańni pa padtrymańni miru na ŭsioj płaniecie.
Aścierahajucca pryniataha ŭ Japonii zakona i ŭ Paŭdniovaj Karei. Sieuł taksama maje niavyrašanyja terytaryjalnyja sprečki z Tokia.
Da hetaha času nie padpisała mirnuju damovu ź Japonijaj i Rasija. Tokia vykazvaje terytaryjalnyja pretenzii na vyspy Kurylskaj hrady, jakija adyšli Maskvie pa vynikach Druhoj suśvietnaj vajny.
Sajuźniki Tokia — ZŠA i Vialikabrytanija — ŭchvalili rašeńnie japonskaha parłamienta. Pavodle słoŭ ministra zamiežnych spraŭ Vialikabrytanii Filipa Chemanda, jon čakaje, što Japonija budzie ciapier aktyŭna udzielničać u miratvorčych apieracyjach.
Što za Dźmitryj Skindzieraŭ, jaki abviaściŭ vajnu Cichanoŭskaj? Supracoŭnictva z HUBAZiKam, daŭhi ŭ Biełarusi, daŭhi ŭ Litvie34
Kamientary