Imparciory pra pastanovu №666: «My nie razumiejem, jak pracavać pa hetym dakumiencie»

Druhi dzień biznes-supolnaść abmiarkoŭvaje dakumient ab ekśpiertyzach dla zamiežnych tavaraŭ. Pastanova pad złaviesnym numaram 666 źjaviłasia jašče 6 žniŭnia, adnak uvahu da siabie pryciahnuła, tolki kali pačała realizoŭvacca na praktycy.

Kali kazać prosta, źmianieńnie ŭ zakanadaŭstva pradpisvaje imparcioram pravodzić ekśpiertyzu zamiežnych tavaraŭ. Heta značyć dakumientaŭ, jakija raniej pastaŭščyki brali ŭ zamiežnych vytvorcaŭ dla paćviardžeńnia adpaviednaści, užo niedastatkova. FINANCE.TUT.BY pahutaryŭ z bujnymi hulcami rynku. Jak vyśvietliłasia, jasnaści ab tym, jak pracavać z novym dakumientam, pakul niama.

«Nichto nie moža skazać dakładna, jakich mienavita katehoryj tavaraŭ datyčycca hety dakumient, — kaža pradstaŭnik kampanii-imparciora bytavoj techniki i elektroniki. — Adny kažuć, što pad dziejańnie pastanovy traplajuć usie zamiežnyja tavary, inšyja — što jon nie tyčycca tavaraŭ, zroblenych u Rasii. Tamu mnohija addajuć pieravahu nie ryzykavać i pakul uziać paŭzu. Apłačanyja partyi tavaru pryjazdžajuć i adpraŭlajucca na skład. Nu a my čakajem tłumačeńniaŭ ad Saŭmina i inšych zacikaŭlenych orhanaŭ».

Siońnia tłumačeńnie da pastanovy na svajoj staroncy ŭ fejsbuku raźmiaściła Ministerstva achovy zdaroŭja. Adnaznačna ź jaho možna zrazumieć, što ekśpiertyzu nie treba rabić dla tavaraŭ z abmiežavanymi terminami prydatnaści, tavarami sekand-chend, humanitarnaj dapamohi. Adnak praściej ad hetaha tłumačeńnia biznesu nie stała.

Klučavy punkt u novym dakumiencie taki: «abjektam dziaržaŭnaj sanitarna-hihijeničnaj ekśpiertyzy źjaŭlajecca pradukcyja (za vyklučeńniem pradukcyi, jakaja padlahaje dziaržaŭnaj rehistracyi) pa pieraliku, vyznačanamu pastanovaj Savieta ministraŭ Respubliki Biełaruś ad 11 lipienia 2012 hoda № 635 «Ab niekatorych pytańniach sanitarna-epidemijałahičnaha dabrabytu nasielnictva».

Vychodzić, što ekśpiertyzu treba rabić dla ŭsiaho, što ŭvachodzić u pieralik, zaćvierdžany hetaj samaj 635-m pastanovaj. I voś tut i pačynajucca pytańni, na jakija biznes pakul nie atrymaŭ adnaznačnych adkazaŭ.

Ekśpiertyza na samaj spravie dobraachvotnaja, a nie abaviazkovaja?

Pa kamientar my źviarnulisia ŭ jurydyčny adździeł TDA «Mostra-hrup». Hetaja kampanija, jakaja pracuje na rynku bolš za 20 hadoŭ i źjaŭlajecca najbujniejšym imparcioram praduktaŭ charčavańnia, kaśmietyki i inšych tavaraŭ u krainu.

«Jašče ŭ 2013 hodzie Ministerstva achovy zdaroŭja hodzie pa našym zapycie davała tłumačeńnie, ź jakoha vynikaje, što imparcior ŭ dačynieńni da pradukcyi, uklučanaj u nazvany pieralik (havorka pra pastanovu № 635. — FINANCE.TUT.BY), maje prava samastojna vyznačać sposab paćviardžeńnia adpaviednaści pradukcyi adzinym sanitarnym patrabavańniam, kali inšaje nie pradpisana zakanadaŭstvam Mytnaha sajuza ŭ halinie techničnaha rehulavańnia, prymianieńnia fitasanitarnych i vieterynarnych mier, — kaža načalnik jurydyčnaha adździeła TDA «Mostra-hrup» Iłona Hiercyk. — U suviazi z čym rabiłasia vysnova pra toje, što najaŭnaść sanitarna-hihijeničnaj vysnovy nie źjaŭlajecca abaviazkovaj i subjekt haspadarańnia maje prava, ale nie abaviazak źviartacca pa praviadzieńnie sanitarna-hihijeničnaj ekśpiertyzy tavaraŭ, uklučanych u pieralik».

Na dumku jurysta kampanii, novaja pastanova Saŭmina ničoha nie źmianiła: dakumient tyčycca administracyjnych pracedur praviadzieńnia ekśpiertyzy, a nie samoha śpisu tavaraŭ. Heta značyć rehłamientavali paradak praviadzieńnia pracedur dla taho, što i raniej traplała na ekśpiertyzu. «Status pieraliku pradukcyi, zaćvierdžanaha pastanovaj Saŭmina № 635, roŭna jak i status samaj sanitarna-hihijeničnaj ekśpiertyzy nijak nie źmianiajecca, u suviazi z čym najaŭnaść sanitarna-hihijeničnaj vysnovy na pradukcyju nie źjaŭlajecca abaviazkovaj», — padvodzić vynik śpiecyjalist. Pry hetym u TDA «Mostra-Hrup» udakładnili, što dla atrymańnia dadatkovych tłumačeńniaŭ kampanija nakiravała zvarot u Ministerstva achovy zdaroŭja.

Ci nieści na ekśpiertyzu smartfon i čachoł dla jaho?

Jurysty inšych kampanij taksama nie pryjšli da adnaznačnaj vysnovy adnosna dakumienta.

«Pa 635-aj pastanovie ekśpiertyzie padlahajuć, u pryvatnaści, materyjały dla vyrabaŭ (vyraby), jakija kantaktujuć sa skuraj čałavieka, adzieńnie, abutak (punkt 10 pieraliku), — razvažaje pradstaŭnik kampanii imparciora elektroniki. — Ale sprava ŭ tym, što terminałohija dadzienaha pieraliku nie pryviazana da TN ZED i dapuskaje mnostva tłumačeńniaŭ. Naprykład, možna skazać, što sa skuraj čałavieka kantaktuje i smartfon, i čachoł, i kłavijatura, i tym bolš navušniki. Atrymlivajecca, što ich treba nieści na ekśpiertyzu?»

Anałahičnaja situacyja, pavodle słoŭ śpiecyjalista, i z paniaćciem pryboraŭ bytavoha pryznačeńnia (heta značyć tych, jakija pryznačany dla asabistaha štodzionnaha vykarystańnia).

«Voś, naprykład, punkt 7 pieraliku: pradukcyja mašyna- i pryborabudavańnia vytvorčaha, miedycynskaha i bytavoha pryznačeńnia, akramia zapasnych častak da transpartnych srodkaŭ i bytavoj techniki (za vyklučeńniem tych, jakija kantaktujuć ź pitnoj vadoj i charčovymi praduktami), — začytvaje dakumient imparcior. — Ci adnosicca da jaje televizar ci chaładzilnik?»

U vyniku kampanija nakiravała zapyt u dziaržorhany z prośbaj rastłumačyć «infarmacyju ab pieraliku pradukcyi, jakaja padlahaje ekśpiertyzie, pra miechanizm farmiravańnia zajaŭki na takuju pradukcyju, pra toje, što ličyć adzinkaj pradukcyi, jakaja padlahaje siertyfikacyi (artykuł, madel, kod) i h.d.».

Nahadajem, dakumient, ź jakim ciapier sprabuje razabracca biznes-supolnaść, ustupiŭ u siłu z 27 žniŭnia.

• 0
• 0
• 0
• 0
• 0
• 0
• 0
• 0