Złučanym Štatam nieabchodna pačać nanava vybudoŭvać adnosiny ź Biełaruśsiu, zajaviŭ žurnalistam člen Pałaty pradstaŭnikoŭ Kanhresa ZŠA ad štata Kalifornija respublikaniec Dana Rorabakier, naviedvajučy 3 žniŭnia ŭ Minsku Nacyjanalnuju akademiju navuk.
«Niejki čas tamu prezident ZŠA kazaŭ pra toje, što treba pačać pierazahruzku ŭ adnosinach z Rasijaj, — nahadaŭ kanhresmien. — Zaraz my možam kazać ab pierazahruzcy [adnosinaŭ ź Biełaruśsiu]. ZŠA i ŭsim krainam treba pahladzieć na situacyju z boku i padumać, jak možna palepšyć adnosiny. Apošnim časam adnosiny pamiž ZŠA i Biełaruśsiu, ZŠA i Rasijaj raźvivalisia ŭ nie vielmi pazityŭnym kirunku i hetu prablemu treba vyrašać sumiesna».
Supracoŭnictva dźviuch krain u śfiery navuki moža pasadziejničać «viartańniu našych adnosinaŭ u pazityŭnaje rečyšča», skazaŭ Rorabakier. Pavodle słoŭ kanhresmiena, viarnuŭšysia na radzimu, jon u pieršuju čarhu budzie «havaryć ab uražańniach», jakija ŭ jaho skłalisia paśla pajezdki ŭ Biełaruś. «Nas sprabujuć pierakanać, što Biełaruś i Rasija varožyja našaj krainie, ale padčas svajho vizitu ja nie znachodžu hetamu paćviardžeńnia», — skazaŭ amierykanski palityk.
«Ja ŭ pieršuju čarhu budu havaryć pra toje, što ludzi tut dobryja, cudoŭnyja i nie žadajuć nam zła. Pradstaŭniki ŭrada mianie zapeŭnivali, što Biełaruś choča palapšeńnia adnosinaŭ. Treba skazać, što aśviatleńnie Biełarusi ŭ našaj presie — niehatyŭnaje, tamu, kali ja viarnusia, ja pasprabuju heta vypravić», — paabiacaŭ Dana Rorabakier.
Delehacyja Pałaty pradstaŭnikoŭ Kanhresa ZŠA prybyła ŭ Biełaruś 2 žniŭnia. Pajezdka prachodzić pa inicyjatyvie amierykanskaha boku. U pieršy dzień vizitu kanhresmieny naviedali miesca hibieli achviaraŭ stalinskich represij va ŭročyščy Kurapaty i terytoryju byłoha nacysckaha kancłahiera ŭ Małym Traściancy.
3 žniŭnia delehacyja sustrełasia z prezidentam Alaksandram Łukašenkam i namieśnikam ministra zamiežnych spraŭ Alaksandram Hurjanavym. Na sustrečy z kiraŭnikom dziaržavy Rorabakier prapanavaŭ Biełarusi i ZŠA pavysić uzrovień dypłamatyčnaha pradstaŭnictva, a taksama viarnuć pasła ZŠA ŭ Minsk i pasła Biełarusi — u Vašynhton. U svaju čarhu Łukašenka zapeŭniŭ haściej, što Biełaruś była i budzie zacikaŭlenaja ŭ padtrymańni paŭnacennaha supracoŭnictva z ZŠA.
U paniadziełak amierykanskija kanhresmieny taksama sustrenucca z kiraŭnikom Nacyjanalnaha banka Paŭłam Kałauram. Zavieršycca vizit 4 žniŭnia.
Ciapier čytajuć
Kala Safii ŭ Połacku pastavili pomnik lotčykam Ničyparčyku i Kukanienku. Ale navat nie samalot toj madeli, na jakoj jany zahinuli, a aerapłan stalinskaha času2020
Kamientary