MUS Ukrainy abviaściŭ bataljon «Tarnada» pa-za zakonam: baza atočana, kamandzir aryštavany
Va Ukrainie nabiraje abaroty skandał z bataljonam milicyi «Tarnada», u jakim vajuje biełarus «Madžachied». MUS Ukrainy abvinavaciła kiraŭnictva bataljona ŭ stvareńni złačynnaj hrupoŭki, na što «tarnadaŭcy» zabarykadavalisia ŭ škole i pahražajuć stralać pa milicyjantach.
Pavodle ŭkrainskich pravaachoŭcaŭ, kiraŭnik atrada milicyi śpiecpryznačeńnia «Tarnada» Aniščanka razam ź niekatorymi paplečnikami zajmaŭsia katavańniem i vykradańniem ludziej.
Akramia taho, adzin z paciarpiełych abvinavačvaje słužboŭcaŭ u kalektyŭnym seksualnym hvałcie, jaki «tarnadaŭcy» jašče i zdymali na videa.
Praz hetyja dy inšyja epizody hałoŭny vajenny prakuror Ukrainy Anatol Macijos zahadaŭ rasfarmavać bataljon, ale ŭ adkaz bataljon «Tarnada» zabarykadavaŭsia ŭ budynku Sievieradanieckaj škoły, dzie mieścicca ichniaja baza.
«U dadzieny momant tam znachodzicca 170 čałaviek, 100 ź jakich aficyjna źjaŭlajucca milicyjantami. Jašče 70 – uzbrojenyja nieviadoma chto. Na bazie vializarnaja kolkaść zbroi i bajaprypasaŭ. Supracoŭniki milicyi z «Tarnada» zaminavali padychody da škoły i pastavili bajavyja punkty, ustalavali hranatamioty, prapuskać śledčych dla vobšuku jany admaŭlajucca», — skazaŭ u intervju «Ukrainskaj praŭdzie» Anatol Macijos i adznačyŭ, što značnaja kolkaść čalcoŭ «Tarnada» — nieadnarazova asudžanyja recedyvisty.
I śledstvu taksama naležyć razabracca, jakim čynam hetyja ludzi patrapili ŭ šerahi MUS i atrymali zbroju.
U samim ža «Tarnada» abviarhajuć abvinavačańni i abiacajuć adkryć ahoń pa kalehach, kali tyja pasprabujuć praniknuć na bazu.
U bataljonie vajuje biełarus «Madžachied», jaki raniej byŭ ranieny na froncie i vyznaje isłam.
Kamientary