Biełaruskamu i rasijskamu vytvorcam sielhastechniki — «Homsielmašu» i «Rastsielmašu» — treba abjadnacca ŭ adnu kampaniju. Takuju dumku vykazaŭ 13 maja na pres-kanfierencyi ŭ Minsku člen kalehii (ministr) pa pramysłovaści i ahrapramysłovym kompleksie JEEK Siarhiej Sidorski.
Jon nahadaŭ, što jašče raniej, kali zajmaŭ pasadu premjer-ministra, vystupaŭ za abjadnańnie vytvorcaŭ sielhastechniki Biełarusi i Rasii.
«Adnak, jak vy viedajecie, «Homsielmaš» — dziaržaŭnaje pradpryjemstva, a «Rastsielmaš» naležyć pryvatnym strukturam. My sprabavali heta pytańnie (abjadnańnia kampanij) vyrašyć na bolš vysokim uzroŭni, ale, na žal, nie atrymałasia», — kanstatavaŭ Sidorski.
Jon udakładniŭ, što pa-raniejšamu vystupaje za abjadnańnie hetych vytvorcaŭ. «Siońniašniaja situacyja nienarmalnaja. Maja pazicyja zaklučajecca ŭ tym, kab dźvie kampanii abjadnalisia — u ich adzin rynak zbytu, adna pradukcyja», — rastłumačyŭ svaju pazicyju Sidorski.
Pieršy namieśnik ministra pramysłovaści Hienadź Śvidzierski, vystupajučy 13 maja na plenarnym pasiadžeńni Biełaruskaha pramysłovaha forumu ŭ Minsku, kanstatavaŭ, što siońnia biełaruskija i rasijskija kampanii, jakija zajmajucca mašynabudavańniem, faktyčna kankuryrujuć adna z adnoj.
«MAZ i KAMAZ źjaŭlajucca partniorami, ale pry hetym i hałoŭnymi kankurentami, pakolki pracujuć u adnoj cenavaj nišy. Toje ž samaje možna skazać pra «Homsielmaš» i «Rastsielmaš» — jasna, što isnuje (pamiž imi) baraćba za rynak Jeŭrazijskaha ekanamičnaha sajuza», — zajaviŭ Śvidzierski.
Ciapier čytajuć
Što viadoma pra eks-aficera Słužby biaśpieki Łukašenki Andreja Spasava, jakoha pasadzili za palityku1
Kamientary