Na biržavym rynku Biełarusi źniaty abmiežavańni pa kupli kamiercyjnymi bankami zamiežnaj valuty dla patreb nasielnictva.
Hetu infarmacyju BiełaPAN paćvierdzili pradstaŭniki bankaŭ.
Jany kanstatavali, što pryniataje Nacbankam rašeńnie faktyčna dazvalaje bankam nabyvać luby abjom zamiežnaj valuty na biržy.
«Niama abmiežavańniaŭ pa sumach kupli valuty na biržy dla patreb nasielnictva. Kali bank miarkuje, što jon hetu valutu pradaść na praciahu dnia, jon moža kupić luby abjom valuty», — rastłumačyli pradstaŭniki bankaŭskaha siektara.
Pry hetym jany zaznačyli, što raniej abjom valuty, jaki nabyvajuć na biržy, byŭ abmiežavany. «Bankam vydzialali valutu ŭ nievialikich kolkaściach, ale jany nie adpraŭlali jaje ŭ abmieńniki, a pracavali ad abarotu, pradajučy toj abjom valuty, jaki kuplali», — udakładniŭ pradstaŭnik banka.
Nahadajem, jašče ŭ kancy minułaha tydnia abmiennyja punkty faktyčna ŭsich bankaŭ Biełarusi praciahvali pracavać ad abarotu. Takim čynam, zaznačali ekśpierty finansavaha rynku, popyt nasielnictva na zamiežnuju valutu nie dachodziŭ da biržy.
Svabodny dostup da zamiežnaj valuty ŭ abmiennych punktach zachoŭvaŭsia da 19 śniežnia 2014 hoda. Z 20 śniežnia z-za ažyjatažnaha popytu na zamiežnuju valutu Nacbank uvioŭ 30-pracentny zbor, jaki fizičnyja asoby abaviazanyja byli vypłačvać pry kupli valuty. Z 9 studzienia hałoŭny bank krainy admianiŭ dziejańnie valutnaha zboru na najaŭnym rynku, ale pry hetym abmiennyja punkty biełaruskich bankaŭ praciahvali pradavać klijentam tolki toj abjom valuty, jaki kuplali ŭ nasielnictva na praciahu dnia.
Ciapier čytajuć
Chto pradaŭ kvateru ŭ «Majaku Minska» źnikłaj Mielnikavaj? Takoha čałavieka nie isnuje19
Kamientary