Stali viadomyja žančyny, jakija buduć novymi «Łaŭcami pryvidaŭ»
Nazvany vierahodny aktorski skład pierazapusku «Łaŭcoŭ pryvidaŭ» režysiora Poła Fiha.
Kultavaja dyłohija «Łaŭcy pryvidaŭ» ź Biłam Miurejem, Denam Ejkrajdam i Sihurni Uivier u chutkim časie atrymaje praciah, u jakim hałoŭnymi hierojami stanuć žančyny. Reju, Ihanu, Uinstanu i Venkmanu źmiena poła nie pahražaje: na ich miesca pryjdzie novaje pakaleńnie hierojaŭ.
Roli novych Łaŭcoŭ pryvidaŭ dastanucca siabroŭcy režysiora Mielisie MakKarci, Krysten Uih, Łeśli Džons i Kiejt MakKinan.
Pieramovy nie zavieršanyja, ale znachodziacca ŭ finalnaj stadyi, śćviardžaje The Hollywood Reporter. Studyja Sony viała pieramovy i sa słavutaj Emaj Stoŭn, ale taja nie znajšła času dla filma, zhadvaje «Kinapošuk».
Režyjoram filma stanie Poł Fih, jaki dobra siabie zarekamiendavaŭ u kamiedyjach «Kopy ŭ spadnicach» i «Dziavičnik u Viehasie».
Režysior aryhinalnaj dyłohii Ajvien Rajtman admoviŭsia pracavać nad pierazapuskam paśla taho, jak vykanaŭca hałoŭnaj roli Bił Miurej nie prajaviŭ cikaŭnaści da novaha filma. Sam Miurej raniej kazaŭ, što zdymiecca ŭ novych «Łaŭcach pryvidaŭ» tolki kali jaho piersanaža zabjuć u pieršyja ž siekundy.
Scenarystam novaha filma stanie Keci Dypołd, jakaja raniej pracavała nad «Kopami ŭ spadnicach». Jana śćviardžaje, što pierazapusk «Łaŭcoŭ pryvidaŭ» budzie «šalona śmiešnym i adnačasova pa-sapraŭdnamu strašnym».
Daty pačatku zdymak i vychadu na ekrany nie ŭdakładniajucca. Zhona z čutkami, film najchutčej vyjdzie na ekrany ŭ 2016 hodzie.
Kamientary