U pieršaj sieryi achviaru truciać prosta pasiarod dnia ŭ fijakry jadam, jakim, jak miarkujecca, zabili Alaksieja Navalnaha.
U siaredzinie krasavika na ekrany vyjšaŭ novy siezon lehiendarnaha sieryjała 90-ch. Jon maje nazvu «Kamisar Reks. Viena vyklikaje».
U pieršym siezonie abiacajuć šeść sieryjaj, prezientavanyja pakul dźvie, potym kožny tydzień budzie dadavacca pa adnoj.
U siaredzinie 1990-ch, jak vyjšaŭ na ekrany pieršy siezon, vulicy biełaruskich haradoŭ i viosak vymirali. Školniki i studenty kidali svaje spravy i biehli dachaty hladzieć televizar.
Pieršaja sieryja novaha siezona pačynajecca zvykła. Kamisar palicyi Vieny sa svaim naparnikam (ci naadvarot, Reks sa svaim naparnikam?) uviazvajucca ŭ adnu spravu.
Potym idzie znajomaja kožnamu zastaŭka: kaścioł sabora Štefana, Reks adbiraje burhier u naparnika hałoŭnaha hieroja, firmovy jaho skačok i aŭtohraf łapaj pad tuju ž samuju muzyku.
U pieršaj sieryi achviaru z manijaj pieraśledu (jon usim pradstaŭlajecca jak Jan Fleminh) prosta pasiarod Vieny zabili jadam, jakim zabili Alaksieja Navalnaha — jadam paŭdniovaamierykanskaj žaby-drevałaza. Jad prosta nanieśli na šyju, i mužčyna navat nie paśpieŭ raspłacicca za pajezdku.
Reks (jaho poŭnaje imia Redžynald fon Ravienchorst Vośmy) i inśpiektar Maks Štajnier biarucca za spravu.
Usio jak u raniejšych filmach. Reks sprytna biehaje, moža ŭniuchać torbu z hrašyma. I taksama jaho firmovy skačok z udaram łapami pa hrudziach.
Što dadałosia novaha?
Na hałavu hałoŭnamu hieroju — Maksu Štajnieru (aktor Maksimiljan Bruknier) — zvaliłasia paŭnaletniaja dačka, jakaja niečakana viarnułasia z Parahvaja. Pačynajecca kanflikt baćkoŭ i dziaciej. U viečna zaniataha Štajniera na dačku niama času.
Nu i novyja technałohii i trendy apošnich hadoŭ. Mierkavanaha złačyncu padazrajuć u zbory bomby. Jak tak? Naparnik Štajniera kaža, što, vidać, toj padhledzieŭ rolik u Jutubie.
A žabu-drevałaza možna zamović u darknecie za 60 jeŭra.
«Kamisar Reks» vyjšaŭ na ekrany ŭ 1994 hodzie. U pieršych siezonach Reks dapamahaŭ inśpiektaru Rychardu Mozeru (aktor Tobijas Mareci), zatym paśla jaho hibieli hałoŭnym hierojem zrabiŭsia Alaksandr Brandner (aktor Hiedeon Burkchart), potym Mark Chofman. Paśla 10 siezonaŭ sieryjał pieranieśli na try siezony ŭ Rym. Paśla ŭvohule zakryli. Uvosień 2024 hoda było zajaŭlena, što sieryjał adnoviać.
Ciapier čytajuć
Hieroj Biełarusi Maryna Vasileŭskaja naradziła dačku ad kasmanaŭta Aleha Navickaha44
Kamientary