Maci zatrymanaha ŭ Litvie «biełaruskaha špijona»: Jon u Biełarusi nie byŭ 10 hadoŭ

Elektramiechanik litoŭskaj dziaržaŭnaj kampanii «Pavietranaja navihacyja» (Oro navigacija) Ramuald Lipski, jaki abvinavačvajecca ŭ špijanažy na karyść Biełarusi, znachodziŭsia ŭ pole zroku śpiecsłužbaŭ na praciahu troch hadoŭ.

Pra heta raspaviała maci 56-hadovaha Lipskaha, jaki amal hod znachodzicca ŭ Łukiškskim SIZA, Jaŭhienija Lipskaja, piša Delfi. Piensijanierka, jakoj sioleta spoŭniłasia 80 hadoŭ, nijak nie moža pavieryć, što jaje syn moh pieradavać biełaruskim śpiecsłužbam važnuju infarmacyju ab stratehičnych abjektach.

Hetamu nie vieryć i žonka abvinavačanaha, jakaja taksama pracuje ŭ «Pavietranaj navihacyi».

Miž tym supracoŭniki DHB i Hienprakuratury Litvy śćviardžajuć, što sabrali dastatkova infarmacyi, jakija dakazvajuć vinu Lipskaha. U sudzie sprava pačnuć razhladać u studzieni 2015 hoda. Słuchańnie budzie prachodzić za začynienymi dźviaryma.

— Kali Vy daviedalisia, što syna padazrajuć u špijanažy?

— Syn dva miesiacy nie viartaŭsia dadomu — jaho žonka kazała, što jon u kamandziroŭcy. Ja nie mahła pavieryć - nikoli nie adjazdžaŭ, a tut tak raptoŭna, nie raźvitaŭšysia. I jašče kudyści daloka.

Jon nie navat nie patelefanavaŭ — ja zrazumieła, što niešta tut nie tak. Patelefanavała jaho supracoŭniku, ale toj ničoha nie skazaŭ. Ja źbirałasia jechać u «Pavietranuju navihacyju», chacieła pahavaryć z dyrektaram, što heta za kamandziroŭka? Ale tady pryjechali dzieci, niaviestka — skazali, što jon zatrymany.

— Jon zatrymany ŭžo hod. Vy viedajecie, u čym jaho abvinavačvajuć?

- Ničoha nie viedaju, nam ničoha nie kažuć, tolki ŭ hazietach čytajem. Jakuju infarmacyju jon moh pieradavać? Jon z kabielami pracavaŭ, byŭ elektrykam. Moža, jaho napałochali, šantažavali, pahražali?

Daviedalisia, što za im sačyli try hady. Ale jon navat u Biełaruś nie jeździŭ — jon tam 10 hadoŭ nie byŭ, tolki ŭ minułym hodzie razam jeździli prybracca na mahiłach dziadoŭ i babul.

My z synam tam byli dva dni, maje baćki tam kupili ziamlu — 36 ha. Viernie jaje nam Łukašenka? Nikoli. Ja pamru, a nichto hetuju ziamlu nie ŭbačyć.

— Moža, Vy zaŭvažyli, što jon pierad aryštam źmianiŭsia — bo jaho niešta pavinna było hniaści, bo jon pracavaŭ na inšuju dziaržavu?

- Nie vieru, što jon špijoniŭ na karyść Biełarusi. Jon pra jaje nikoli dobra nie adhukaŭsia. Što heta za siabruk Łukašenka, kab jamu infarmacyju pieradavać?

Kali b jon špijoniŭ na karyść Biełarusi, jon tudy časta jeździŭ by. Ale ŭ jaho navat vizy nie było. Była tolki taja adnarazovaja, kali jechali na mohiłkach.

— Kali śćviardžajuć, što jon zajmaŭsia špijanažam, zrazumieła, što rabiŭ heta nie za dziakuj. Moža, u apošni čas jon staŭ lepš žyć?

- Vy žartujecie? Jon zaŭsiody byŭ u daŭhach — daŭhi i daŭhi. Navat žonka kvateru zakłała, kab uziać kredyt, ja kazała, što vy robicie, bo hrošy treba viarnuć.

Jakuju jon moh źbirać sakretnuju infarmacyju, kali ŭ jaho navat kabinieta nie było? Jon siadzieŭ u padvale. Što jon moh fatahrafavać? Kabiel?

(…) Kali jaho pryznajuć vinavatym, kali sud abvieścić, što jon - špijon, my nie supakoimsia, budziem šukać praŭdu. Moža, Jeŭrapiejski sud nam dapamoža.

Hienprakuratura Litvy paviedamlała, što Lipskaha padazrajuć u špijanažy na karyść Biełarusi. Padazrajuć, što jon tajemna fatahrafavaŭ dakumienty ŭ kampanii «Pavietranaja navihacyja» i inšyja abjekty i pieradavaŭ ich hałoŭnamu raźviedvalnamu ŭpraŭleńniu Hienštaba Uzbrojenych sił Respubliki Biełaruś.

Lipskamu pahražaje turemnaje źniavoleńnie na termin da 15 hadoŭ.

Kiraŭnik Departamienta biaśpieki Litvy Hiedyminas Hryna taksama adznačaŭ, što infarmacyjaj, pieradadzienaj špijonami, mahła karystacca i Rasija.

• 0
• 0
• 0
• 0
• 0
• 0
• 0
• 0