Piać apazicyjnych arhanizacyj damovilisia ab praviadzieńni Kanhresa demakratyčnych siłaŭ

Pieramovy pa vyłučeńni adzinaha kandydata ad apazicyi vyjšli na novy ŭzrovień, zajaviŭ staršynia Partyi BNF Alaksiej Janukievič. Na siońniašni momant piaćciu ź siami asnoŭnych arhanizacyj apazicyi dasiahnuta zhoda ab pracedury vyłučeńnia adzinaha kandydata ŭ prezidenty. Samo vyłučeńnie pavinna adbycca ŭ kancy sakavika, na Kanhresie demakratyčnych sił.

Podpisy pad pahadnieńniem pastavili pradstaŭniki Biełaruskaj sacyjał-demakratyčnaj partyi (Hramada), ruchu «Za Svabodu», kampanii «Havary praŭdu!», Partyi BNF i arhkamiteta pa stvareńni partyi «Biełaruskaja chryścijanskaja demakratyja».

Źviartaje ŭvahu, što pad pahadnieńniem niama podpisaŭ Abjadnanaj hramadzianskaj partyi (Anatol Labiedźka) i Partyi levych «Spraviadlivy śviet» (Siarhiej Kalakin).

«Na siońniašnim pasiedžańni byŭ tolki Kalakin, a Labiedźka asabista nie prysutničaŭ — dasłaŭ svajho pradstaŭnika. Kalakin adznačyŭ, što hetaje pahadnieńnie — peŭny prahres, adnak, kab pryniać kančatkovaje rašeńnie, jamu treba paraicca z kirujučym orhanam svajoj partyi na schodzie, jaki adbudziecca pry kancy listapada, — patłumačyŭ Juraś Hubarevič, pieršy namieśnik staršyni Ruchu «Za Svabodu». — Pradstaŭnik Labiedźki paabiacaŭ pieradać usiu infarmacyju svajmu partyjnamu lidaru, i ŭ chutkim časie adkaz ad jaho budzie atrymany».

Na minułym pasiedžańni pradstaŭniki hetych dźviuch partyj hałasavali suprać hetaha dakumienta. Niezadavalnieńnie ŭ ich vyklikała mahčymaść vyłučeńnia delehataŭ na Kanhres šlacham zboru podpisaŭ, a nie ad arhanizacyj i schodaŭ miascovych aktyvistaŭ.

Niazhoda AHP i eks-kamunistaŭ mohuć adciahnuć termin Kanhresa až na maj. Pieramovy ab vyłučeńni adzinaha kandydata ad apazicyi i biez taho raściahnulisia ŭžo amal na hod.

Pryčym, padkreśliŭ Alaksiej Janukievič, pryniataje pahadnieńnie — heta nie prapanovy «Narodnaha refierendumu».

«Da nas dałučyłasia «Biełaruskaja chryścijanskaja demakratyja», ale «Siamierka» nie składajecca z pradstaŭnikoŭ «Narodnaha refierendumu», BCHD i «Tałaki». Jana składajecca z pradstaŭnikoŭ roznych subjektaŭ. I «Narodny refierendum» stvaraŭsia nie dziela vyłučeńnia adzinaha kandydata, ci kankretnaj pracy na prezidenckija vybary. I ŭ chadzie abmierkavańnia pracedury pradstaŭniki «hefierendumu» hałasavali pa-roznamu. Kaniečnie, toje, što my razam robim «Narodny refierendum» spraściła nam damaŭleńnie pamiž saboj. Ale apuskać «siamierku» da ŭzroŭniu pieramoŭnaj placoŭki pamiž «Refierendumam» i «Tałakoj» było b niapravilna i my vystupajem suprać hetaha».

• 0
• 0
• 0
• 0
• 0
• 0
• 0
• 0