Adrazu paśla sustrečy z Pucinym u minskim Pałacy Niezaležnaści prezident Ukrainy pabačyŭsia z Ketryn Eštan. Spatkańnie adbyłosia ŭ pasolstvie Ukrainy ŭ Minsku — tam, dzie i ranišniaja sustreča ź joj.
Parašenka zajaviŭ: Kijeŭ i Maskva pačnuć kansultacyi pa zakryćci miažy. Taksama jon paviedamiŭ, što ŭ najbližejšy čas budzie padrychtavany płan dla najchutčejšaha spynieńnia ahniu ŭ Danbasie, pryčym hety režym pavinny buduć padtrymać abodva baki.
Uładzimir Pucin vyjšaŭ da žurnalistaŭ krychu paźniej. Jon udakładniŭ, što na dvuchbakovaj sustrečy z Parašenka ŭmovy spynieńnia ahniu pradmietna nie abmiarkoŭvalisia — maŭlaŭ, Rasija nie vyłučała i nie moža vyłučać umovaŭ pa ŭrehulavańni situacyi va Ukrainie.
«My, Rasija, nie možam kazać pra niejkija ŭmovach spynieńnia ahniu, mahčymych damoŭlenaściach pamiž Kijevam, Danieckam i Łuhanskam», — skazaŭ Pucin.
«My možam tolki spryjać tamu, kab stvaryć abstanoŭku davieru ŭ chodzie hetaha mahčymaha i vielmi nieabchodnaha, na moj pohlad, pieramoŭnaha pracesu», — dadaŭ rasijski prezident. Pieramovy z Parašenka jon acaniŭ jak pazityŭnyja.
Dla dasiahnieńnia mirnaha pracesu i spynieńnia krovapralićcia na Ukrainie, Rasija, pa słovach Pucina, budzie rabić usio. «Rasija sa svajho boku budzie rabić usio dla hetaha mirnaha pracesu, kali jon pačniecca. Hety praces treba pačać jak maha chutčej», — skazaŭ Pucin.
Zaviazać hety praces dapamoža kantaktavaja hrupa. «Dasiahnuta damoŭlenaść ab tym, što kantaktavaja hrupa pavinna jak maha chutčej adnavić svaju pracu», — padkreśliŭ Pucin. Jon nie vyklučyŭ, što pasiedžańnie taksama adbudziecca ŭ Minsku.
Z prapanovaj zrabić Minsk rehularnaj placoŭkaj dla sustreč kantaktnaj hrupy Ukraina — Rasija — ABSIE vystupiŭ Piatro Parašenka jašče ŭ chodzie kansultacyj z MS i ES. Alaksandr Łukašenka, u svaju čarhu, hatovy vystupać u roli niejkaha pasiarednika. Užo ŭ sieradu moža praciahnucca dyskusija ab urehulavańni kryzisu na Danbasie na ŭzroŭni kantaktavaj hrupy RF—Ukraina—ABSIE. «Prapanavana sabracca hrupie ŭ mahčyma karotkija terminy. Piatro Parašenka nastojvaje, kab hetaja sustreča była ŭžo zaŭtra», — skazaŭ Łukašenka.
Kijeŭ hatovy i dalej praciahvać trochbakovyja pieramovy ŭ farmacie Ukraina-ES-Rasija, u ich jość vialiki patencyjał, zajaviŭ u aŭtorak u Minsku Parašenka.
«Prezident Parašenka i nie admaŭlaje składanaść humanitarnaj situacyi, jana nie moža być acharaktaryzavanaja inakš jak katastrafičnaja», — adznačyŭ Pucin.
Kamientary