Pahonia za pjanym dalnabojem FOTY, VIDEA
Hrodzienskaja Dziaržaŭtainśpiekcyja paviedamiła padrabiaznaści pieraśledu ŭviečary 27 lipienia pjanaha kiroŭcy fury, jakaja pieravoziła novyja mašyny. Pahonia doŭžyłasia ad Zelvy až da Baranavič.
Jak paviedamlaje ŭpraŭleńnie DAI UUS Hrodzienskaha abłvykankama, u 20 hadzin u dziažurnuju častku Zelvienskaha RAUS pastupiła infarmacyja ab DTZ u rajonnym centry. Kiroŭca vialikahruznaha aŭtamabila na vulicy Šasiejnaj pry vyjeździe sa stajanki paškodziŭ «Chundaj», jaki stajaŭ, i ź miesca zdareńnia ŭciok. Praz 15 chvilin u milicyju patelefanavaŭ ŭładalnik «Miersiedesa», jaki paviedamiŭ, što jaho aŭtamabil, jaki znachodziŭsia na ŭzbočynie, niepadalok ad vioski Jołka Zelvienskaha rajona začapiła «Skanija», jakaja prajazdžała mima.
Kala 21 hadziny na 61-m kiłamietry aŭtadarohi Baranavičy - Hrodna ŭ pole zroku supracoŭnikaŭ DAI trapiŭ siedłavy ciahač, jaki, mahčyma, byŭ datyčny da hetych avaryj. Inśpiektary pasprabavali spynić «Skaniju», adnak jaje kiroŭca praihnaravaŭ patrabavańni spynicca i pasprabavaŭ schavacca.
Ruchajučysia ŭ napramku Minska, kiroŭca vialikahruza, vykonvajučy abhon, sutyknuŭsia z «Folksvahienam», jaki ruchaŭsia ŭ spadarožnym napramku, i ździejśniŭ treciaje DTZ.
Nie źviartajučy ŭvahi na nieadnarazovyja patrabavańni supracoŭnikaŭ DAI spynicca, «Skanija» praciahnuła ruch. Vilała z boku ŭ bok, ihnaravała znaki i darožnuju raźmietku. Inśpiektary pryniali rašeńnie ŭžyć tabielnuju zbroju.
Pa fury było vypuščana 80 patronaŭ, ale jana praciahvała ruch. Tolki kali kulami byŭ šmat razoŭ prabity bak i vyciekła paliva, mašyna spyniłasia. Na 183-m kiłamietry aŭtadarohi Brest — Minsk kiroŭcu zatrymali.
Im akazaŭsia 30-hadovy žychar stalicy, jaki byŭ u stanie ałkaholnaha apjanieńnia. Pa vynikach miedycynskaha ahladu, praviedzienaha ŭ Słonimskaj rajonnaj balnicy, kancentracyja paroŭ etyłavaha śpirtu ŭ vydychanym pavietry kiroŭcy skłała 1,94 pramile.
Dajučy tłumačeńni, jon skazaŭ, što vypiŭ harełki, bo stamiŭsia ŭ darozie i chacieŭ rassłabicca.
Na kiroŭcu nadzieli naručniki i dastavili ŭ Słonimski RAUS.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna6
Kamientary