Były mer Homiela Pilipiec prysudžany na piać hadoŭ kałonii ŭzmocnienaha režymu
«Były mer Homiela V.Pilipiec pryznany vinavatym u złoŭžyvańni ŭładaj i słužbovymi paŭnamoctvami. Sud prysudziŭ jaho da piaci hadoŭ kałonii ŭzmocnienaha režymu z kanfiskacyjaj majomaści i pazbaŭleńniem prava zajmać peŭnyja pasady na piać hadoŭ», — paviedamiła ŭ svaim fejsbuku pres-sakratar Śledčaha kamiteta Julija Hančarova.
Prysud u zakonnuju siłu jašče nie ŭstupiŭ.
Razhlad spravy pačaŭsia 4 listapada 2013 h. Mahiloŭskim abłsudom u dačynieńni da słužbovych asob Homielskaha harvykankama. Jak paviedamlałasia raniej, pavodle źviestak Śledčaha kamiteta, abvinavačvanyja ŭ vieraśni—kastryčniku 2011 hoda niezakonna raźmierkavali pamiž saboj, svajakami, blizkimi i znajomymi 24 kvatery ŭ damach, pryniatych u ekspłuatacyju ŭ studzieni—krasaviku 2011 hoda. Zatym hetyja kvatery byli pradadzienyja pa canie značna nižejšaj za rynačnuju. Častka žyłych pamiaškańniaŭ była aformlenaja na padstaŭnych asob.
Na łavie padsudnych akramia Pilipca taksama apynulisia dyrektar upraŭleńnia kapitalnaha budaŭnictva Homiela Ihar Adarčanka, jaho namieśnik pa ekanomicy i finansach Valeryj Barysievič, načalnik žyllova-inviestycyjnaha adździeła Antanina Zielanok i načalnik płanava-dahavornaha adździeła Ała Nizkoŭskaja.
Vystupajučy z apošnim słovam na minułym tydni, Viktar Pilipiec zajaviŭ, što pry rasśledavańni hetaj kryminalnaj spravy vykarystoŭvalisia «žachlivyja i časam zabaronienyja zakonam mietady».
Jon skazaŭ, što padčas rasśledavańnia navat u śviedak aryštoŭvałasia majomaść, što, na jaho dumku, źjaŭlajecca samaŭpraŭnaściu z boku asobnych členaŭ śledčaj hrupy.
«Vinavaciać u tym, što navat nie ŭkrali, a tolki kupili kvatery pa toj canie, pa jakoj tady hetyja kvatery pradavalisia», — adznačyŭ były staršynia Homielskaha harvykankama. Pavodle jaho śćviardžeńnia, usie abvinavačańni na adras padsudnych zasnavanyja na zdahadkach i mierkavańniach i ničym nie paćviardžajucca. «Ja ŭ šoku ad taho, što adbyvajecca», — zajaviŭ padsudny.
Astatnija fihuranty spravy taksama nie pryznali svaju vinu, zajaŭlajučy, što ich abvinavačańni biespadstaŭnyja i ŭ ich dziejańniach nie było nijakich złačynnych namieraŭ, a dziejańni całkam adpaviadali zakanadaŭstvu.
Ciapier čytajuć
Adstaŭny ministr-karupcyjanier pradaje reśpiektabielny katedž kala Drazdoŭ. Prosić $2 miljony3
Kamientary