Palitviaźni i ich svajaki zaklikali Šeran Stoŭn i Eryka Robiertsa nie zdymacca ŭ «Avieli»
Byłyja palitviaźni, palityki i hramadskija aktyvisty Biełarusi, a taksama svajaki viaźniaŭ sumleńnia, jakija zastajucca za kratami, zaklikali halivudskich akcioraŭ Šeran Stoŭn i Eryka Robiertsa prajavić hramadzianskuju salidarnaść i nie ŭdzielničać u zdymkach filma «Aviel».
Podpisy pad zvarotam pastavili Maryna Adamovič, Nasta i Źmicier Daškievičy, Pavieł Vinahradaŭ, Iryna Chalip, Maryna Łobava, Uładzimir Niaklajeŭ, Pavieł Sieviaryniec, Mikita Lichavid, Dźmitryj Drozd i inšyja, usiaho 25 čałaviek.
Admovicca ad stvareńnia filma aŭtary zvarotu taksama zaklikali režysiora filma «Aviel» Uiljama de Vitala.
Byłyja palitviaźni, a taksama ich svajaki adznačajuć, što padziei, pakazanyja ŭ filmie, źjaŭlajucca trahičnymi nie tolki dla ich, ale i dla ŭsioj krainy.
«19 śniežnia 2010 hoda była žorstka razahnanaja ŭładami mirnaja akcyja pratestu suprać falsifikacyj vybaraŭ u Biełarusi. Bolš za tysiaču demanstrantaŭ u hetuju noč byli zatrymanyja. Siem ź dzieviaci kandydataŭ u prezidenty apynulisia ŭ turmie KDB. Sotni ich prychilnikaŭ byli biesčałaviečna źbityja i aryštavanyja na terminy ad 15 sutak da čatyroch hadoŭ źniavoleńnia. Na hety čas u turmie strohaha režymu znachodzicca kandydat u prezidenty Mikałaj Statkievič, jaki atrymaŭ najbolšy prysud za mirnuju akcyju pratestu — šeść hadoŭ. Palityčna matyvavanyja prysudy praciahvajuć vynosicca ŭ našaj krainie dasiońnia», — havorycca ŭ dakumiencie.
Na žal, padkreślivajecca ŭ zvarocie, «hetyja trahičnyja padziei skažona adlustravanyja ŭ scenary filma, jaki zaklikany lehitymizavać ŭ vačach hramadstva dziejańni ŭłady, nakiravanyja suprać ułasnych hramadzian». Aŭtary dakumienta ličać hety prajekt «brudnaj hulnioj biełaruskich uładaŭ».
«My vykazvajem vialikaje škadavańnie i rasčaravańnie ad taho, što ŭłada vykarystoŭvaje vas, kab zamacavać svajo chłuślivaje adlustravańnie rečaisnaści.
Zamiest zdymak u kino vy ŭdzielničajecie ŭ zdymkach prarežymnaha, ahitacyjnaha filma.
My zaklikajem vas da hramadzianskaj salidarnaści. Kali łaska, admoŭciesia ŭdzielničać u brudnaj hulni biełaruskich uładaŭ «, - havorycca ŭ zvarocie.
Palitviaźni i ich svajaki taksama spadziajucca znajści parazumieńnie ź inšymi zorkami suśvietnaha kiniematohrafa ŭ vypadku pastupleńnia im prapanoŭ źniacca ŭ «Avieli».
Jak ličyć staršynia kampanii « Havary praŭdu» Uładzimir Niaklajeŭ, jašče nie fakt, što Eryk Robierts i Šeran Stoŭn buduć udzielničać u zdymkach filma. «Chutčej za ŭsio — heta pijar-chod, kab pryciahnuć uvahu da zdymak z metaj pavieličeńnia biudžetu filma za košt dziaržaŭnych srodkaŭ Respubliki Biełaruś. Dziejańni stvaralnikaŭ filma pakazvajuć, što jany imknucca pavialičyć biudžet filma», — zajaviŭ jon BiełaPAN.
Niaklajeŭ nie vyklučaje, što ŭ pavieličeńni biudžetu filma zacikaŭleny i niekatoryja biełaruskija čynoŭniki. «Bo niechta ž prapanavaŭ dla zdymak centr stalicy, choć u inšaj krainie heta varta było b miljony, chtości ž nahnaŭ biaspłatnych masovak», — adznačyŭ jon.
Niaklajeŭ nazvaŭ film «Aviel» «padazronym mastackim prajektam, u jakim zaniatyja padazronyja ludzi, praca jakich taksama ŭjaŭlajecca padazronaj».
U svaju čarhu, Maryna Adamovič, žonka palitviaźnia Mikałaja Statkieviča, adznačyła, što nie stała b źviartać uvahu na zdymki «Aviela», kali b nie dziejańni ŭładaŭ. «Ja maju na ŭvazie pierakryćcio prajeznaj častki praśpiekta ŭ mocny maroz, spynieńnie ruchu hramadskaha transpartu, bo mienavita heta i inkryminavałasia ŭdzielnikam Płoščy», — paviedamiła jana BiełaPAN.
«Dla mianie hety film nijakaj cikavaści nie ŭjaŭlaje.
Ja prosta chacieła b jašče raz źviarnuć uvahu na padvojnyja standarty uładaŭ, na parušeńni pravoŭ čałavieka, na toje, što ŭ Biełarusi jašče siadziać u turmie ludzi, asudžanyja za Płošču, padziei jakoj u filmie chočuć padać u skažonym i haniebnym vyhladzie suśvietnaj supolnaści», —
skazała Adamovič.
Nahadajem, kinastužka «Aviel» stvarajecca kampanijaj «Nonstop Miedyja» pa zamovie Ministerstva kultury. Na jaje vydatkavana bolš za 20 młrd rubloŭ ( 2,17 młn dalaraŭ ZŠA). Režysior- pastanoŭščyk karciny — vychadziec z Ukrainy kaskadzior i pastanoŭščyk trukaŭ Uiljam de Vital.
Kamientary