Skarha namieśnika staršyni zakrytaha biełaruskimi ŭładami pravaabarončaha centra «Viasna» Valancina Stefanoviča na rašeńnie Hienieralnaj prakuratury ab uniasieńni sajta spring96.org u śpis abmiežavanaha dostupu dla internet-karystalnikaŭ budzie razhledžana ŭ sudzie Centralnaha rajona Minska 18 lutaha, paviedamlajecca na sajcie pravaabarončaha centra.
23 śniežnia 2013 hoda ŭ svajoj skarzie Stefanovič zajaviŭ, što źjaŭlajecca aŭtaram i čytačom materyjałaŭ, raźmieščanych na sajcie, i ličyć pastanovu Hienprakuratury ab abmiežavańni dostupu da internet-resursu prajavaj cenzury. Pravaabaronca prosić sud pryznać pastanovu niepravamiernaj i abaviazać pravaachoŭny orhan vypravić dapuščanyja parušeńni.
«Usie padstavy dla abmiežavańnia maich pravoŭ na vykazvańnie svajho mierkavańnia, svabodny pošuk i raspaŭsiudžańnie infarmacyi, zhadanyja ŭ adkazie Hienieralnaj prakuratury, nie źviazany z dapuščalnymi abmiežavańniami (dla pavažańnia pravoŭ i reputacyi inšych asob, dla achovy dziaržaŭnaj biaśpieki, hramadskaha paradku, zdaroŭja ci maralnaści nasielnictva) hetych pravoŭ, zhadanych u adpaviednych artykułach Kanstytucyi Respubliki Biełaruś i pałažeńniach Mižnarodnaha pakta ab hramadzianskich i palityčnych pravach», — miarkuje Stefanovič.
Jak raniej paviedamlaŭ BiełaPAN, pastanova prakuratury ab uniasieńni sajta ŭ čorny śpis była pryniata na padstavie taho, što centr «Viasna» nie zarehistravany ŭ Biełarusi, a tamu lubyja dziejańni ad jaho imia supiarečać biełaruskamu zakanadaŭstvu.
«Hienieralnaj prakuraturaj u žniŭni 2011 hoda ŭstanoŭlena, što na sajcie www.spring96.org sistematyčna raźmiaščałasia infarmacyja ab dziejnaści pravaabarončaha centra «Viasna» šlacham apublikavańnia adpaviednych zajaŭ, vystupleńniaŭ ci kamientaryjaŭ pa roznych pytańniach hramadska-palityčnaha žyćcia dziaržavy, — havaryłasia ŭ liście Hienprakuratury. — U suviazi z tym, što doŭhi čas na internet-resursie www.spring96.org raźmiaščałasia infarmacyja, jakaja prapahanduje dziejańni, zabaronienyja zakanadaŭstvam, Hienieralnaj prakuraturaj u žniŭni 2011 hoda vyniesiena pastanova ab uklučeńni identyfikatara hetaha internet-resursu ŭ śpis abmiežavanaha dostupu i nakiravana ŭ RUP «BiełDIE» dla vykanańnia».
Kamientary