Homielskija demakraty vyznačylisia z adzinym kandydatam na davybarach u parłamient

Ruch «Za Svabodu», Partyja BNF, kampanija «Havary praŭdu», Hramadzianskaja kampanija «Naš dom», Hramadzianskaja inicyjatyva «Homielski Demakratyčny Forum» i šerah inšych demakratyčnych partyj i hramadskich arhanizacyj padtrymajuć na majučych adbycca davybarach u parłamient pa Homielskaj-Navabielickaj vybarčaj akruzie №36 kandydaturu Haliny Kraŭčanka, paviedamlaje sajt pyx.by.

Davybary ŭ Pałatu pradstaŭnikoŭ projduć u Homielskaj-Navabielickaj vybarčaj akruzie №36 u suviazi z tym, što padčas parłamienckaj kampanii 2012 hoda tam nie byŭ abrany deputat. Heta — adzinaja ŭ Biełarusi akruha, jakaja nie maje svajho pradstaŭnika ŭ parłamiencie.

Vosiem homielskich demakratyčnych palityčnych partyj i hramadskich inicyjatyŭ, kaściak jakich składajuć arhanizacyi, jakija padtrymlivajuć kampaniju «Narodny refierendum», vyznačylisia sa svaim kandydatam. Im stanie aktyvistka Ruchu «Za Svabodu» Halina Kraŭčanka, viadomaja ŭ horadzie ź minułaj vybarčaj kampanii, kali jana ŭdała vystupiła ŭ Homielskaj- pramysłovaj vybarčaj akruzie №35.

Sama Halina Kraŭčanka kaža, što nie vieryć u sumlennaść majučych adbycca «vybaraŭ», ale źbirajecca … na ich pieramahać.

— Navat prykład susiedniaj Ukrainy, dzie narod masava vystupaje ŭ abaronu svaich intaresaŭ, pakazvaje: ideja moža pieramahać, kali jaje padtrymlivaje bolšaść. Niezaležna ad taho, jak siabie ciapier viadzie tam dziejučaja ŭłada, paśla ŭsiaho taho, što my bačyli, niama sumnievaŭ, što Ukraina budzie ŭ Jeŭropie. Heta prykład i dla nas taksama: ideja pavinna pieramahčy ŭ rozumach bolšaści ludziej, i tady jaje ŭvasableńnie — tolki sprava času, — kaža Kraŭčanka.

U majučaj adbycca kampanii Halina Kraŭčanka płanuje maksimalna vykarystoŭvać anłajn-ŚMI i sacyjalnyja sietki, asabistyja sustrečy i stasavańnie z hramadzianami, a taksama supracoŭnictva ź inšymi kandydatami, jakija na vybarach 23 sakavika 2014 hoda buduć bałatavacca ŭ miascovyja Saviety deputataŭ.

— My stvaryli kamandu. Adnačasova sa mnoj u Navabielicy buduć bałatavacca 4 demakratyčnyja kandydaty ŭ haradski Saviet — mienavita stolki tam miascovych akruhaŭ. Heta dazvolić nam davodzić našy idei da ludziej na ŭsich uzroŭniach, dapamahać adzin adnamu i demanstravać vybarščykam, što ŭ nas jość kamanda, što my — nie adzinočki, što hatovyja i pieramahać, i brać na siabie adkaznaść za budučyniu, — kaža Halina Kraŭčanka.

Staršynia homielskaha adździaleńnia Ruchu «Za Svabodu», u šerahi jakoha ŭvachodzić Kraŭčanka, Piotr Kuźniacoŭ nahadvaje, što ŭžo niekalki miesiacaŭ u Navabielicy idzie aktyŭnaja praca:

— Kamanda Haliny, kamanda Ruchu i inšych arhanizacyj-partnioraŭ, užo niekalki miesiacaŭ razam z žycharami Navabielicy vyrašaje tam łakalnyja prablemy jak svaimi rukami i siłami, tak i praź cisk na ŭładu. Heta daje nam pieravahu, tamu što ŭžo jość kantakty ź miascovym nasielnictvam, peŭnaja viadomaść i navat hrupy padtrymki. Halina zdoleła stvaryć i naraścić naš patencyjał u hetym rajonie, i heta budzie važkim faktaram u budučaj palityčnaj kampanii, — ličyć Piotr Kuźniacoŭ.

• 0
• 0
• 0
• 0
• 0
• 0
• 0
• 0