Ci razhoniać siońnia Jeŭramajdan? Mierkavańnie ŭkrainskaha pravaabaroncy
Ukrainskija ŚMI paviedamlajuć pra mahčymaść siłavoha razhonu Jeŭramajdana ŭ Kijevie — nibyta heta moža adbycca ŭžo siońnia, i dziela začystki na Majdanie Niezaležnaści adklučać śviatło i kamiery videanazirańnia.
Karespandent «NN» pahutaryŭ z ukrainskim pravaabaroncam i kandydatam u narodnyja deputaty Ukrainy Vasilom Kavalčukom.
«NN»: Ci sapraŭdy siłavy varyjant razhonu Jeŭramajdana moža adbycca siońnia ci bližejšym časam?
Vasil Kavalčuk: Ciapierašniaja ŭłada moža ŭsio, što zaŭhodna — na maralnyja jakaści ciapierašniaha ŭkrainskaha ŭrada raźličvać nie prychodzicca. Heta hrupoŭka, jakaja siońnia zachapiła i skancentravała ŭsio resursy i moc u svaich rukach. U ich jość kantrol nad siłavikami, unutranymi vojskami.
«NN»: Ci nie było b bolš razumnym z boku ŭłady ničoha nie rabić i čakać, pakul ludzi razyjducca sami. Bo, padajecca, u apazicyi niama dakładnaha płanu dziejańniaŭ.
VK: Kali b nie hvałtoŭnaje źbićcio moładzi ŭ noč ź piatnicy na subotu, ludzi chutčej za ŭsio razyšlisia b. Adnak hetaje źbićcio mieła vielmi vialikaje mabilizacyjnaje značeńnie. Kraina pračnułasia hudučaj, nibyta vulej, paśla taho, jak u jaho zasunuli pałku.
Takoha hvałtu, jak padčas razhonu pieršaha Jeŭramajdana, Ukraina nie viedała.
Navat siem adstaŭnych hienierałaŭ vystupali z nahody razhonu i pryznali, što padobnaha staŭleńnia da svaich ludziej jašče nie było. Heta, chutčej za ŭsio sprava danieckaha i krymskaha «Bierkuta». Bo, naprykład, vińnicki «Bierkut», kali daviedaŭsia, što ich chočuć pierakinuć u Kijeŭ, admoviŭsia jechać, a bajcy lvoŭskaha «Bierkuta» skazali, što jany sarvuć ź siabie šeŭrony i admovilisia jechać. Hety hvałt i vyvieŭ na vulicy ludziej.
Apazicyja nasamreč u razhublenaści, jana nie viedaje, što rabić z narodam, jaki sabrała. U ich navat pohlad razhubleny. Niama nijakaha adnahałośsia.
Hladzicie, naprykład, vy chočacie sała i harbatu, ja chaču kaŭbasu i harbatu. Što nas abjadnoŭvaje? My abodva chočam harbatu. Kamunisty chočuć u Mytny sajuz, apazicyja ŭ Jeŭropu. Ale i tyja, i tyja chacieli adstaŭki ŭrada Azarava i pravalili hałasavańnie.
Jość navat viersija, što pravodzić Jeŭramajdan dapamahaje ułada.
«NN»: Navošta?
VK: Kab «vypuścić paru», panizić hramadskija pratestnyja nastroi — pry narastańni cisku rana ci pozna adbudziecca vybuch. Revalucyi nie pačynajucca z vydatnaha materyjalnaha zabieśpiačeńnia. A tut Janukovič dziŭnym čynam dazvoliŭ pastavić vializarnuju scenu, zabarykadavać uvieś centr.
Kamientary