Brytanskija parłamientaryi admovilisia padtrymać inicyjatyvu premjera Devida Kemierana pra ŭvarvańnie ŭ Siryju.
Urad krainy hatovy padparadkavacca voli zakanadaŭcaŭ, ale rasčaravany ich rašeńniem. Pry hetym ZŠA admaŭlacca ad vajennaj apieracyi suprać Damaska pakul nie źbirajucca.
Bolšaść čalcoŭ pałaty abščyn brytanskaha parłamienta vystupiła suprać umiašańnia krainy ŭ siryjski kanflikt. Bok lejbarystaŭ, jakija ad pačatku nie padtrymlivali hetuju inicyjatyvu ŭrada, pryniała častka kansiervataraŭ. Ideju ŭdziełu Złučanaha Karaleŭstva ŭ vajennaj apieracyi ŭ Siryi adrynuli 285 parłamientaryjaŭ, padtrymali — 272.
Nahadajem, što premjer Devid Kemieran byŭ adnym ź inicyjataraŭ «žorstkaha adkazu» na mahčymaje vykarystańnie chimičnaj zbroi režymam Bašara Asada. Jon pierakonvaŭ u nieabchodnaści ŭmiašańnia ŭ kanflikt u Siryi prezidenta ZŠA Baraka Abamu, aktyŭnuju pazicyju pradstaŭniki Brytanii zajmali i ŭ AAN. Na dumku ahladalnikaŭ The Daily Telegraph, hałasavańnie ŭ brytanskim parłamiencie surjozna padarvie pazicyi Kemierana na mižnarodnaj arenie.
Sam premjer zajaviŭ, što razumieje matyvy hałasavańnia parłamientaryjaŭ, i ŭrad nie budzie dziejničać nasupierak ź ich rašeńniu.
«Ja ŭpeŭnieny, što na vykarystańnie ŭ Siryi chimičnaj zbroi treba adkazać, ale ja pavažaju volu parłamienta, jana adlustroŭvaje mierkavańnie hramadzian krainy, jakija nie chočuć uvarvańnia ŭ Siryju. My budziem dziejničać u adpaviednaści z hetym», — padkreśliŭ Kemieran.
Ministr abarony Vialikabrytanii Filip Chemand vykazaŭsia bolš žorstka: na jaho dumku, rašeńnie parłamientaryjaŭ budzie «z radaściu pryniataje» damaskim režymam.
«Ja rasčaravany. Na vykarystańnie chimičnaj zbroi pavinien być hodny adkaz» , — skazaŭ ministr.
Brytanskija ekśpierty miarkujuć, što hałasavańnie ŭ pałacie abščyn moža stać pačatkam palityčnaha kryzisu dla Kemierana i kansiervatyŭnaj bolšaści siarod parłamientaryjaŭ. Były ministr abarony Hierald Chohvarts užo nazvaŭ dziejańni ŭrada «paśpiešlivymi» i «nieabdumanymi» . Svajo rašeńnie parłamientaryi charaktaryzujuć jak «ciažkaje». Lidar lejbarystaŭ Ed Milibend rastłumačyŭ, što ćviordaj upeŭnienaści ŭ tym, što złačynstva ździejśniŭ Asad, niama.
Tym časam Barak Abama, pavodle źviestak krynic The New York Times, nie maje namieru admaŭlacca ad płanaŭ naniasieńnia ŭdaraŭ pa Siryi. Jon razhladaje takuju mahčymaść, niahledziačy na toje, što ŭ mahčymaj apieracyi ŭžo nie buduć udzielničać brytanskija ŭzbrojenyja siły. Pry hetym žurnalisty vydańnia miarkujuć, što hałasavańnie ŭ pałacie abščyn nanosić udar nie tolki pa Kemieranu, ale i pa Abamu, bo jon vielmi raźličvaŭ na padtrymku sajuźnikaŭ i asabliva Łondana.
Pra mahčymaść chutkaha naniasieńnia ŭdaru kaža pierasoŭvańnie piataha eśminca VMS ZŠA ŭ rajon kanfliktu. Hety karabiel abstalavany kryłatymi rakietami «Tamahaŭk», jakimi, vidać, i buduć nanosicca ŭdary.
Ciapier čytajuć
«Ženia pahadziŭsia na budoŭlu, a nie vajavać. I tolki kali vyjdzie z zapoju!»: jak pradali ŭ rasijskuju armiju žychara Lozna. Achviara nie adna4
Kamientary