Hramadskaść sabrała dla HA «Tavarystva biełaruskaj movy imia Franciška Skaryny» (TBM) kala 20 młn. rubloŭ, što dazvalaje apłacić dvuchmiesiačnuju arendu ofisa,paviedamiŭ staršynia arhanizacyi Aleh Trusaŭ.
Nahadajem, 2 maja TBM źviarnułasia da hramadskaści pa dapamohu ŭ suviazi z rezkim pavieličeńniem z 1 krasavika koštu arendy ofisa — z 5,1 młn. da 9,8 młn. rubloŭ u miesiac. Na nastupny dzień stała viadoma, što TBM nie trapiła ŭ śpis sa 195 hramadskich abjadnańniaŭ, jakim pastanovaj Savieta ministraŭ ad 30 krasavika byli pradastaŭleny lhoty pa arendnaj płacie.
«Vielmi šmat achviaravańniaŭ pastupaje ad prostych hramadzian, jakija pieraličvajuć pa 5, 10, 20, 100 tysiač rubloŭ. Za dzień dapamahaje pa 20-30 čałaviek. My vielmi ŭdziačnyja prostym biełarusam», — skazaŭ Trusaŭ.
Ad arhanizacyj pieršaja hrašovaja dapamoha pastupiła ź Libieralna-demakratyčnaj partyi, namieśnik staršyni jakoj Aleh Hajdukievič 20 maja pieradaŭ Trusavu 2 młn. rubloŭ.Jak paviedamlaje pres-słužba ŁDP, u chodzie sustrečy z Trusavym Hajdukievič adznačyŭ, što «adnym z hałoŭnych składalnikaŭ suvierenitetu luboj dziaržavy źjaŭlajecca raźvićcio i ŭmacavańnie rodnaj movy». «Dla taho kab naša kraina zaŭsiody była niezaležnaj suvierennaj dziaržavaj, my prosta abaviazany raźvivać i ŭmacoŭvać biełaruskuju movu. My vielmi cenim układ TBM u pytańniach papularyzacyi, padtrymki i raźvićcia biełaruskaj movy i kultury», — skazaŭ jon.
Inšyja arhanizacyi dapamohu TBM pakul nie akazvali. Pavodle słoŭ Trusava, raniej abiacaŭ akazać dapamohu ad kampanii «Havary praŭdu!» jaje lidar Uładzimir Niaklajeŭ.
Jon taksama paviedamiŭ, što stvorany elektronny kašalok, praź jaki možna achviaravać hrošy na dziejnaść TBM u roznaj valucie elektronnym sposabam praź internet na rachunki Webmoney: B113622712368 (biełaruskija rubli), E283244759093 (jeŭra), B113622712368 (dołary).
Kamientary