Jak vybirajuć Papu: kankłaŭ — zamkniony pakoj i bieły dym

Papa vybirajecca schodam kardynałaŭ, viadomym jak kankłaŭ. Hetyja vybary majuć vielmi staražytnuju historyju i akružanyja zasłonaj tajamnicy.

Zaraz u śviecie naličvajecca 203 kardynały z 69 krain. Jany paznajucca siarod inšych katalickich ijerarchaŭ svaimi čyrvonymi strojami.

Pavodle praviłaŭ, ustanoŭlenych u 1975 h., kankłaŭ nie moža składacca bolš čym z 120 kardynałaŭ, i ŭ vybarach Papy nie mohuć brać udziełu kardynały starejšyja za 80 hadoŭ. Takich zaraz 118.

Tearetyčna Papam moža być abrany luby katalik mužčynskaha połu. Adnak na praktycy, praktyčna biez vyklučeńniaŭ, im stanovicca chtości z kardynałaŭ.

Vatykan zapeŭnivaje, što hety vybar zychodzić ad Śviatoha Ducha. Nasamreč u hetym pracesie šmat palityki. Kardynały farmujuć hrupy, jakija padtrymlivajuć taho ci inšaha kandydata, i navat tyja ź ich, chto maje mała šancaŭ na papstva, mohuć akazać istotny ŭpłyŭ na vybar pantyfika.

Abrany pantyfik stanie duchoŭnym lidaram dla bolš čym miljarda katalikoŭ va ŭsim śviecie, i jaho rašeńni buduć mieć niepasrednaje dačynieńnie da samych nadzionnych prablem ich žyćcia.

Zaviesa tajamnicy

Vybary Papy pravodziacca ŭ abstanoŭcy strohaj sakretnaści, jakaja praktyčna nie maje anałahaŭ u sučasnym śviecie. Hałasavańnie prachodzić u Sikstynskaj kapele.

Kardynałaŭ litaralna začyniajuć u Vatykanie da taho času, pakul jany nie prymuć rašeńnia. Samo słova «kankłaŭ» aznačaje «zamkniony pakoj».

Praces moža zaniać niekalki dzion. U minułyja stahodździ zdarałasia, što kankłavy praciahvalisia tydniami i navat miesiacami, niekatoryja kardynały nie dažyvali da ich kanca.

Za abnarodavańnie infarmacyi ab chodzie debataŭ na kankłavie parušalniku pahražaje adłučeńnie ad carkvy.

Paśla pačatku kankłava kardynału zabaronieny kožny kantakt z navakolnym śvietam, za vyniatkam vypadkaŭ, kali patrabujecca nieadkładnaja miedycynskaja dapamoha. Zabaronienyja radyjo, telebačańnie, haziety, časopisy i mabilnyja telefony.

Uvieś absłuhoŭvačy piersanał taksama daje klatvu maŭčańnia.

Hałasavańnie

U dzień pačatku pracy kankłava pracesija kardynałaŭ kirujecca ŭ Sikstynskuju kapełu.

Tut u kardynałaŭ budzie mahčymaść pravieści pieršaje hałasavańnie - ale tolki pieršaje, - jakoje dazvolić vyśvietlić, jaki padtrymkaj karystajecca kožny z kandydataŭ na vyšejšuju pasadu ŭ Kaściole.

Asnoŭnaje hałasavańnie pačniecca ranicaj nastupnaha dnia.

Imiony kandydataŭ pišuć na listku papiery, imknučysia rabić heta tak, kab nichto nie moh zdahadacca, čyjo imia ŭpisvajecca.

Paśla kožnaha druhoha hałasavańnia biuleteni ź imionami kandydataŭ spalvajuć. Robicca heta paśla abiedu i ŭviečary, pryčym da papier dadajucca śpiecyjalnyja chimičnyja rečyvy, kab ludzi, jakija buduć sačyć za vybarami zvonku, byli ŭ kursie taho, što adbyvajecca:

kali dym čorny - značyć, Papa jašče nie abrany, bieły ža dym aznačaje, što ŭ katalikoŭ śvietu jość novy kiraŭnik.

Raniej novaha Papu vybirali bolšaściu ŭ dźvie traciny hałasoŭ. Jan Pavieł II unios u Apostalskuju Kanstytucyju 1996 hoda źmianieńni, jakija dazvalajuć abrać Papu prostaj bolšaściu hałasoŭ, kali abrać novaha pantyfika nie atrymlivajecca paśla 30 raŭndaŭ hałasavańnia.

Novy pantyfik zatym vybiraje sabie carkoŭnaje imia, apranaje papskuju mantyju i vitaje viernikaŭ z bałkona Sabora Śviatoha Piatra.

• 0
• 0
• 0
• 0
• 0
• 0
• 0
• 0