Siamja paśpiachovaha televiadučaha (Danijel Atoj) atrymlivaje videakasety, dzie źniaty ich dom. Da kasetaŭ dadajucca i strašnyja malunki. Palicyja nie śpiašajecca niešta rabić, i hieroj sam pačynaje vyšuk.
Aŭstryjec Michael Chanekie («Pijanistka») paviančaŭ u karcinie nudu j trymcieńnie. Pa piać chvilin u kadry ničoha nie adbyvajecca — statyčnaja kamera, doŭhija ahulnyja plany. Ale hetyja antyžanravyja pryjomy vykarystoŭvajucca aŭtaram dla lepšaha adčuvańnia rečaisnaści. My tak dakładna i nie daviedajemsia, chto dasyłaŭ kasety. Chanekie heta j niavažna.
Pryčyna ŭ minułym. Dziciem hieroj pazbaviŭsia ad alžyrskaha chłopčyka, jakoha źbiralisia ŭsynavić baćki, — niebaraku adpravili ŭ dziciačy prytułak. Ale minułaje viarnułasia.
Karcina, źniataja za piać miesiacaŭ da pahromaŭ u Francyi, vyhladaje praročaj.
Kalanijalnyja j dziciačyja kompleksy, biednaść i vymušanaja mihracyja, prychavany kanflikt kultur, jaki pahražaje vybucham, niemahčymaść parazumiecca — film sparadžaje mnostva tłumačeńniaŭ.
Ale ci nia jość manifestavany ŭ filmie «kavałak realnaści» kinailuzijaj, jakaja katuje hledačoŭ nudna-stojenaj sacyjalna-aŭtarskaj pavučalnaściu?
U Kanach Chanekie atrymaŭ pryz za režysuru, pryz ekumeničnaha žury j uznaharodu «Fipresi».
Film, što idzie ŭ «Pieramozie», — dla kinahurmanaŭ.
❏
«Stojenaje» («Cache / Hidden»)
Francyja—Aŭstryja—Niamieččyna—Italija, 2005, 117 chv.
Žanr: sacyjalna-psychalahičnaja drama, tryler.
Adznaka: 7 (z 10).
Ciapier čytajuć
Zakinutuju siadzibu Bahdanovičaŭ pierarobiać u bucikovy hatel FOTY7
Kamientary