Jašče plus try

Hazety «Narodnaja vola», «Salidarnaść» i «Zhoda» nia ŭklučany ŭ padpisny kataloh RUP «Biełpošta» na pieršaje paŭhodździe 2006 hodu. Ułada robić lehalny vychad apazycyjnaj presy niemahčymym. Hazety rychtujucca da pierachodu ŭ padpolle. U aŭtorak 8 listapada try hazety atrymali listy, padpisanyja v.a. kiraŭnika «Biełpošty» Iryny Samsonavaj. A ŭžo paśla vychodnych, z 8 listapada, jana nie načalnik. Novaj dyrektarkaj RUP «Biełpošta» pryznačana Alaksandra Čarniak. Adkazvajučy na telefanavańni redaktaraŭ niezaležnych hazet, jana padkreślivaje, što «nie skasavała nivodnaj damovy». Nichto nie vinavaty.

Hazety «Narodnaja vola», «Salidarnaść» i «Zhoda» z 1 studzienia nia buduć raznosić pa padpiscy, jany źniknuć z šapikaŭ «Biełpošty», što handlujuć urazdrob. «Biełpošta» paviedamiła pra spynieńnie damovy z vydańniam, zychodziačy z roznych pryčynaŭ: źmianieńnie hrafikaŭ vychadu biez paviedamleńniaŭ, u suviazi z małym padpisnym nakładam i ekanamičnaj niemetazhodnaściu, u suviazi z zamienaj drukarni… Ale vidavočna, što admova palityčnaja. Ad HRUP «Biełsajuzdruk» na adras «Salidarnaści» nijakich papier pra spynieńnie damovy (pakul?) nie prychodziła. Na adras «Zhody» — taksama (u stalicy «Mienharsajuzdruk» hazetu nie raspaŭsiudžvaje). Z «Narodnaj volaj» «Biełsajuzdruk» razarvaŭ adnosiny ŭžo z 1 kastryčnika.

Hałoŭny redaktar «Salidarnaści» Alaksandar Starykievič skazaŭ «NN»: «Paviedamleńnie ad «Biełpošty» pryjšło ŭčora (8 listapada. — ZD). Ja ŭpeŭnieny, što rašeńnie było pryniataje nie na ŭzroŭni «Biełpošty». I nia dumaju, što treba napružana vyrašać asobnaje pytańnie nakštałt «Što rabić?». Bo heta nie apošni zachad uładaŭ pa likvidacyi niezaležnaj presy. Treba rychtavacca da nastupu na Internet i samvydat (darečy, niadaŭna ŭ hazety źjaviŭsia sajt — www.gazetaby.com). Nijakaha niezaležnaha raspaŭsiudu niama. Skažam, Piotar Marcaŭ (hieneralny dyrektar pradpryjemstva «Marat») moža ciapier raspaŭsiudžvać tolki svaju hazetu («BDH». — ZD), a na raspaŭsiud inšych jon nie atrymaŭ licenzii. Da novaha hodu ničoha ŭ pracy hazety j hrafikach jaje vychadu nie źmianiajecca. Z 1 studzienia ŭźniknie novaja sytuacyja. Z zaŭtrašniaha dnia (razmova adbyłasia 9 listapada, u dzień zdačy čarhovaha numaru «Salidarnaści». — ZD) pačnu zajmacca hetaj prablemaj».

Taksama nia źmienicca hrafik vychadu «Narodnaj voli». Ale što rabić z 16 tysiačami padpisčykaŭ hazety, pieravažna ŭ pravincyi? Šef-redaktar hazety Śviatłana Kalinkina paviedamiła «NN»: «Zastajecca tolki adno vyjście — stvareńnie ŭłasnaj systemy raspaŭsiudu ŭ stalicy j rehijonach, admysłovych centraŭ».

Vydaviec i hałoŭny redaktar hazety «Zhoda» Alaksiej Karol raskazaŭ «NN», što hazeta ŭžo stvaryła svaju systemu raspaŭsiudu praz demakratyčnych aktyvistaŭ. Jon kaža, što asnoŭnaja častka nakładu ŭ 5 050 asobnikaŭ užo ciapier raspaŭsiudžvajecca nie praź dziaržaŭnyja manapolii. «Pierad vybarami nas šturchajuć na paŭlehalnaje stanovišča, litaralna zapichvajuć u samvydat. Stvaryli sabie mity, sami ich i bajacca», — kaža A.Karol.

Adziny pretendent na prezydenckuju pasadu ad demakratyčnych siłaŭ Alaksandar Milinkievič u interviju BiełaPAN adznačyŭ, što faktyčnaja zabarona na raspaŭsiud pa padpiscy — heta pryznańnie ŭładami mocy drukavanaha słova niezaležnych hazet. «U infarmacyjnaj prastory Biełarusi amal nie zastałosia niezaležnych vydańniaŭ. Ułada ŭsurjoz baicca vybaraŭ i imkniecca da taho, kab ludzi nie pračytali j nie pačuli nivodnaj alternatyŭnaj dumki», — skazaŭ jon.

Isnuje mierkavańnie, što delehalizacyja presy spraščaje sytuacyju: apazycyja ciapier moža ćviorda raźličvać tolki na bajavyja listki.

• 0
• 0
• 0
• 0
• 0
• 0
• 0
• 0