Što stała pryčynaj śmierci rabotnikaŭ «Biełarusnafty» padčas ramontu na trasie

Paśla trahiedyi byŭ admienieny karparatyŭny viečar upraŭleńnia, zapłanavany na 29 žniŭnia. U pablikach «Biełarusnafty» pakul tak i nie źjaviłasia nijakich spačuvańniaŭ i jakoj-niebudź infarmacyi pra incydent. «Fłahštok» razabraŭ situacyju razam z krynicaj, znajomaj z praviadzieńniem siejsmaraźviedačnych rabot u Homielskaj vobłaści.

Trahiedyja pad Zaščebjem

Pavodle papiarednich źviestak, incydent pablizu vioski Zaščebje Rečyckaha rajona adbyŭsia ŭ momant pieraviešvańnia hieafizičnaha kabiela — standartnaj apieracyi pry praviadzieńni naziemnaj siejsmaraźviedki. Raboty vialisia ŭ składzie bryhady UPSR (upraŭleńnia pa praviadzieńni siejsmaraźviedačnych rabot), jakaja zabiaśpiečvała vysakaščylnuju zdymku na miascovaści.

Vierahodna, rabotniki nie pahladzieli ŭvierch i začapili ŁEP. Pry hetym trymalisia za viešku dvoje — jana ciažkaja, mietaličnaja, zvyčajna jaje staviać utroch.

Niebiaśpiečnaja rucina: jak uładkavanaja siejsmaraźviedka

Padčas siejsmaraźviedačnych rabot hieafizičny kabiel ciahniecca na dziasiatki kiłamietraŭ i pierasiakaje darohi, pali, lasnyja masivy, pryvatnuju zabudovu. Pry vysakaščylnaj zdymcy linii nazirańnia mohuć raźmiaščacca kožnyja 200 mietraŭ.

Pavialičyć

Tradycyjna šmat uvahi nadajecca miescam pierasiačeńnia z aŭtamabilnymi darohami. Tam kabiel pavinien prachodzić nie pa ziamli, a nad prajeznaj častkaj — jaho naciahvajuć na časovyja vieški.

Akramia taho, praz učastki siejsmaraźviedki moža pieramiaščajecca śpiectechnika naftavikoŭ i leśnikoŭ. Navat bieź śpiecyjalnaha dazvołu na maršrutach mohuć pracavać mašyny da 4 mietraŭ vyšynioj, a značyć, vyšynia apor pavinna dadatkova ŭličvać nasyp darohi i ŭzrovień pravisańnia linii.

Pavodle danych krynicy, znajomaj z chodam rabot, raniej u UPSR dla takich metaŭ vykarystoŭvali draŭlanyja vieški. Adnak na fota ź miesca zdareńnia bačnaja časovaja apora, jana mietaličnaja.

«Spačatku nieabchodna pakłaści viešku ŭzdoŭž uzbočyny, tolki potym padymać. Treba być uvažlivym i nie razhojdvać viešku, kab nie zakranuć ŁEP», — raskazaŭ «Fłahštoku» surazmoŭca.

Pavodle źviestak krynicy, adzin z zahinułych supracoŭnikaŭ — mužčyna 43 hadoŭ, jaki raniej pracavaŭ u lasnoj haspadarcy. Druhomu było 25 hadoŭ, a treciamu, jaki spačatku trapiŭ u balnicu, a pamior na nastupny dzień — usiaho 22.

Pavodle infarmacyi surazmoŭcy, usie troje byli pryniatyja na pracu va UPSR tolki za niekalki miesiacaŭ da trahiedyi. U narmalnaj praktycy bryhady, jakija zajmajucca prakładkaj hieafizičnaha kabiela, kamplektujucca pieravažna daśviedčanymi rabočymi.

U hetym vypadku niezrazumieła, chto mienavita kiravaŭ bryhadaj na miescy. Kiraŭnika bryhady niama siarod paciarpiełych. Uźnikaje pytańnie — ci znachodziŭsia jon pobač u momant vykanańnia rabot, abo niavopytnyja supracoŭniki ŭkopvali aporu sami, uśviedamlała ci nie kiraŭnictva ŭpraŭleńnia pavyšeńnie ryzyki pry pracy kala ŁEP pry pierachodzie na časovyja mietaličnyja apory hieafizičnaha kabiela.

Sa słoŭ surazmoŭcy, na jaho pamiaci nikoli nie było nastolki surjoznaha incydentu:

«Tak, možna pakalečyć siabie łapataj abo siakieraj. Možna lohka padviarnuć nahu ŭ lesie. Mnie raskazvali, što kaliści zahinuŭ kiroŭca aŭtacysterny, ale heta było hadoŭ z 20-30 tamu, a moža i jašče bolš. Jašče byŭ vypadak — na padryŭnika vadavozkaj najechali. Paciarpieŭ davoli surjozna: razdrabniła taz, było šmat pierałomaŭ, traŭma lohkaha. Kiroŭca prajechaŭ pa ciele tudy i nazad, jon častkova pryznaŭ vinu, jamu dali štraf».

Hałoŭnaje — kadry?

Prablemy z kadrami va UPSR pačalisia nie ŭčora. Paśla 2020 hoda z upraŭleńnia zvolnili ci nie praciahnuli kantrakty ź dziasiatkami śpiecyjalistaŭ. U bazie asudžanych pa palityčnych spravach znachodziacca jak minimum šeść supracoŭnikaŭ UPSR — čatyry inžyniery i dvoje rabočych.

Jak adznačyła krynica, troje ź ich byli apieratarami siejsmaraźviedačnaj stancyi — heta klučavaja i adna z samych technična składanych pasad u palavych rabotach:

«Ja b paraŭnaŭ ich z avijadyśpietčarami — jany kirujuć dziasiatkam bryhad pa troch kanałach suviazi, adnačasova viaduć rehistracyju danych i kiravańnie vybuchami».

Pad represii trapiŭ supracoŭnik vytvorča-techničnaha adździeła, asudzili inžyniera ŭ hrupie kantrolu jakaści, jašče adzin zvolniŭsia.

Z «Biełarusnafty» pajšli jak minimum dvoje supiervajzieraŭ siejsmaraźviedačnych rabot: hieafizik vyjechaŭ u Polšču, hieadezist — u ZŠA paśla vyjhryšu hryn-karty. Adzin z asudžanych — syn adnaho z samych daśviedčanych rabočych, jaki taksama byŭ vymušany pakinuć upraŭleńnie.

«Niekalki zvolnienych chłopcaŭ byli inžynierami-hieafizikami abo technikami-hieafizikami jakraz z palavych bryhad. Heta značyć, tymi, chto zajmaŭsia pracaj pa prakładcy siejsmaraźviedačnaha kabiela», — dadaŭ surazmoŭca.

Pavodle prybliznych acenak, ahulnyja straty UPSR paśla 2020 hoda skłali nie mienš za 25-30 inžynieraŭ i rabočych, što moža dasiahać 10-15% ad śpisavaha składu. Dla technična vuzkaha i zamknionaha padraździaleńnia takija maštaby značać nie prosta «ciakučku». Mienavita ŭ siejsmapartyi UPSR bolš za ŭsio zvolnili inžynieraŭ i rabotnikaŭ.

Na fonie čystak va ŭpraŭleńni kiraŭnictva taksama źmianiłasia. Hałoŭny inžynier siońnia prajšoŭ šlach z bura-vybuchovaha atrada, načalnik upraŭleńnia pryjšoŭ da pačatku pratestaŭ, ale jon pieršy ŭ historyi UPSR, jaki nie maje siejsmaraźviedačnaha vopytu. U kiraŭnictvie siejsmapartyi i vytvorča-techničnym adździele pracujuć ludzi z hieadezičnaj adukacyjaj, a nie hieafiziki.

Pa słovach surazmoŭcy, «padnialisia pa pasadach tałkovyja chłopcy, ale jany nie hieafiziki, što davoli dziŭna, kali pamiatać, što heta siejsmaraźviedačnaje ŭpraŭleńnie»:

«Adčuvańnie, što čaściej pry pryznačeńniach važnaja nie profilnaja kvalifikacyja, a «ideałahičnaja čyścinia». Z 2020 hoda ŭpraŭleńnie nie maje vopytu ŭ mižnarodnych kantraktach, jakija taksama słužyli krynicami prafiesijnaha rostu supracoŭnikaŭ».

Sacsietki jak lusterka pieramienaŭ

Sacyjalnyja sietki ŭpraŭleńnia pa siejsmaraźviedcy za apošnija hady stali prykmietna bolš ideałahizavanymi. U instahramie UPSR zvyčajna publikujucca fota z palavych rabot, ale siońnia mnohaje ŭ stužcy — dałučeńnie rabotnikaŭ da patryjatyčnych aŭtaprabiehaŭ, spravazdačy ab udziele ŭ vychavaŭčaj pracy z supracoŭnikami.

Asobnaje miesca zajmaje zamacavany post z zaklikam da farmiravańnia kadravaha reziervu — administracyja prosić achvotnych nakiroŭvać ankiety i reziume dla mahčymaha pracaŭładkavańnia.

• 0
• 0
• 0
• 8
• 1
• 7
• 5
• 0