Šeleh: Biełaruskija leki ničym nie adroźnivajucca ad starych preparataŭ bujnych farmaceŭtyčnych kampanij

Pavodle Siarhieja Šeleha, amal usie leki, jakija vypuskajucca ŭ Biełarusi, źjaŭlajucca hienieryčnymi preparatami — kopijami aryhinalnych preparataŭ, na jakija ŭžo skončyŭsia termin patentnaj abarony. Jon padkreśliŭ, što vytvorčaść tabletki — heta nie niešta zvyšskładanaje, i biełaruskija zavody majuć dostup da tych ža farmaceŭtyčnych substancyj, što i viadučyja suśvietnyja kampanii.

«Advažusia vas zapeŭnić: technałohii vyrabu tabletki heta nie supiertechnałohii. Farmaceŭtyčnyja substancyi — aktyŭnyja inhredyjenty tych ža tabletak — viadučaja kampanija i biełaruskija kampanii mohuć zakuplać u adnym miescy», — davodzić ekśpiert, ale pryznaje mahčymaść parušeńnia technałohii vytvorčaści na biełaruskich pradpryjemstvach:

«Pres, naprykład, nie zanadta mocna moža ścisnuć tabletku da patrebnaha pamieru, ci pakryć jaje [achoŭnaj] plonkaj».

Ale, jak zapeŭnivaje Šeleh, «lekavyja preparaty, jakija vyrablajucca na biełaruskich zavodach, ničym nie adroźnivajucca ad starych preparataŭ, što vypuskajucca bujnymi farmaceŭtyčnymi kampanijami».

Na pohlad Šeleha, sutnaść pracy farmaceŭtyčnych kampanij nie ŭ tym, kab biaskonca vyrablać adny i tyja ž leki, a ŭ tym, kab raspracoŭvać novyja. I tut, jak jon zaŭvažaje, zusim inšaja razmova:

«Biełaruskija farmaceŭtyčnyja zavody śvietu nie pradstavili ni adnaho novaha lekavaha srodku [ŭłasnaj raspracoŭki] za ŭsiu historyju isnavańnia. Heta ŭvohule vialikaja redkaść».

Jak davodzić ekśpiert, vynachodnictvam novych preparataŭ nie moh pachvalicca i Saviecki Sajuz.

Na pytańnie, ci nie kryjecca pryčyna hetaha ŭ niedastatkovym raźvićci navukovych daśledavańniaŭ u hetym kirunku, Šeleh patłumačyŭ:

«Navuka ŭžo daŭno stała industryjaj, u jakuju ŭciahnuty hihanckija srodki i vialikaja kolkaść ludziej. U Biełarusi niama takich materyjalnych i ludskich mahčymaściaŭ, kab usio heta realizavać.

Vy pavinny razumieć, što ŭsie stadyi vyvučeńnia lekavaha srodku, jakija ŭrešcie rešt pryvodziać da źjaŭleńnia preparata dla lačeńnia ludziej, zajmajuć mnohija hady, na heta traciacca miljardy dalaraŭ. Heta niekalki dziasiatkaŭ biudžetaŭ usioj našaj achovy zdaroŭja».

Nahadajem, što 64-hadovy Siarhiej Šeleh apynuŭsia za kratami za salidarnaść ź biełarusami: jon danaciŭ arhanizacyjam, jakija praz čas, zadnim dniom, byli pryznanyja ekstremisckimi i terarystyčnymi. 21 červienia 2025 hoda paśla vizitu ŭ Minsk śpiecpradstaŭnika prezidenta ZŠA Kita Kiełaha jon apynuŭsia ŭ składzie 14 čałaviek, jakija byli vypuščany na volu.

• 12
• 0
• 0
• 3
• 1
• 1
• 0
• 0